Joseph Ute Izip ah hleng i
1Zakuk in Izip ramah rong um ti ling fangin a fapate hnenah, “Zaimanin pakhat le pakhat sik luklo in um menma i si?” ti in ti i. 2Cen Zakuk in, “Izip ramah rong um i ti in za ing. Thi lo in kin nung thai in Izip ah zu in kin ca in rong lai tuu-ih.” ti in ruai i. 3Ciafangin Joseph u 10 khiah rong lai tuhin Izip ah zu i. 4Ikhalselai Zakuk in Joseph nau Benjamin tu a ute kawmin feh siang lo i. Ziangmanti fangin amah in hnophnak tawk tuh lau i. 5Ciamanin rong lai tuhin feh tute lakah Israel fapate khai tel ve i. Ziangmanti fangin Khanaan ramah khai rian tlung ve i.
6Ciafangin Joseph khiah Izip ram peng tu i ai amah khiah Izip mite hnenah rong zuartu khai i ve i. Ciamanin Joseph ute hleng fangin Joseph hmai ah a lu ut tlang i. 7Joseph in a ute hmu sawng fangin a ute khiah ling vut i. Ikhalselai ram dang mi bangin tuah khel ai amahte khiah riahsia ngai in pon i. “Konin hleng i si?”ti in zawt i. Amahte in, “Rong lai tuhin Khanaan ramin hleng i ing.” ti in sawn i. 8Joseph in a ute khiah ling napui ai anite in tu Joseph khiah ling lo i. 9Ciafangin Joseph in a mang khiah hih ai amahte hnenah, “Ningte khiah cungthauh i bang i si. Kin ram a kon teng ber khiah ralvil lo in um na maw ti cul tuhin kawi i si.”ti in ti i. 10Amahte in, “Bawipa, i lo i ing. Na hnenumte khiah rong lai tuhin hleng i ing. 11Kin veksenin mi pakhat fa i ing. Na hnenumte in thuhman rel i ing. Cungthauh te i lo i ing.” ti in sawn i. 12Joseph in, “I lo i. Kin ram a konteng ber khiah ralvil lo in um na maw ti cul tuhin kawi i si.” ti in ti ngio i. 13Ikhalselai amahte in, “Na hnen umte khiah unau 12 i ing. Khanaan ramai umtu mi pa pakhat fapate i ing. A nautaber khai kin paa hnenah um i lai. Pakhat tu thi zo i.” ti in rel i. 14Joseph in amahte hnenah, “Kaimah in ning rel bangin ningte khiah cungthauhte i si. 15Ciamanin hetih bangin ning thu ning chek tuh ing: Pharaoh nung song hmuah in ning nautaber heta ah kawi hlahleisikhaw aisu khai heta in tlung thill tuh lo i si. 16Ning lakai ningte pakhat khiah ning nau lang tuhin hlat tu i lai ning a dangte tu thawng ning tauh tuh ing. Ciafangin ningte in thuhman rel le rel lo ning chek thill tuh ing. Thuhman rel lo i leisikhaw, Pharaoh nung song hmuah in, ningte khiah cungthauh i si.” ti in ti ai 17amahte khiah ni thum song thawng tauh i.
18Ni thum nia fangin Joseph in amahte hnenah, “Pathian kih ing. Ciamanin hetih bangin bawn tu i lai ning nung tuh i: 19Thuhman rel peu leisikhaw, ning innkua rikamte rong kawih sah tuhin ning a dangte khiah feh lakin, ning unau pakhat thawngto tu seh. 20Ikhalselai ning thurelhnak ning chek tuhin le ning thi lo hnak tuhin ning nautaber khiah i hnenah kawih tuh i si.” ti in rel i. Anite khai ciatih in bawn i. 21Ciafangin amahte khai pakhat le pakhat khiah, “Kin nau thu manin kin cawh rori i. A nunhnak ca in kin ngen hlehhlo fangin zaitluk in lungsia i ti hmu i sing. Inapui ngai sah lo i sing. Ciamanin he lungsiahnak khiah kin vumah hleng i hang.” ti in rel tlang i. 22Ciafang Reuben in, “Kin nau hnen ah sual mah ih tin ning rel i ta lo ing? Inapui i ngai ning nuam lo i. Ciamanin tunin a thi man rul kul tuh i hang sing.” ti in ti i. 23Anite relhnak khiah Joseph in ling sah i ti khiah anite in ling lo i. Ziangmanti fangin Joseph in cakapian thawn amahte hnenah pong i. 24Ciamanin Joseph khai amahte hmunin her teu ai kap i. Ciaben fangin amahte hnenlam ah her leh i. Simeon khiah pom ruai ai amahte hmai ah pen ruai i. 25Amahte dip khiah rong thawn thun tuhin le amahte tangka khiah amahte dip tenah dah leh tuhin le amahte khualsi hmunah ei tuh rong pe tuhin Joseph in thu pe i.
26Hete ben fangin anite khai amahte rong khiah lak vumah phurh ai feh i. 27Amahte zancam hmun ah pakhat pa in lak paih tuhin a dip hong fangin tangka khiah a dip songah hmu i. 28A unaute hnenah, “I tangka khiah i khirh lio i. He i dip songah um i.” ti in rel i. Ciafangin anite khai a thin khiah zul lio ai pakhat le pakhat hnenah thing biakbo kongin sik dun tlang ai, “Pathian in kin vumah zai bawn i pa?”ti in ti dun i.
29Khanaan ramah a paa Zakuk hmunah hleng fangin, amahte thu khiah a veksenin rel i. 30Amahte in, “Ram-uk tu bawipa in riahsia ngai in kin pon ai cungthauh bang in kin dah i. 31Ikhalselai kin in, ‘Thuhman rel i ing. Cungthauh i lo i ing. 32Kinte khiah unau 12 i awng i ing. Cen paa pakhat fate i ing. Pakhat tu thi zo i. A nautaber tu Khanaan ramah kin paa hnenah um i.’ti in rel i ing. 33Ciafangin cia ram-uk tu bawi in, ‘Thuhman rel le rel lo khiah hetih bangin ning ling tuh ing: Ning unau pakhat khiah i hnenah hlum tu i lai a rikam ning innkuate rong kawih sah tu i lai feh tuu-ih. 34Cen ning nautaber khai heta ah kawih tuu-ih. Ciafangin cungthauh i lo ai thuhman rel i si ti ning ling tuh ing. Ciafangin ning unau khiah ning pe leh tuh ai ciafangin he ram songah thil lai thill tuh i si.’ ti in kin rel i.” ti in rel i.
35Anite khai amahte dip khiah bung fangin amahte dip song ten ah tangka khiah hmu i. Amahte le a paa in cia tangka hmu fangin lau i. 36Ciafangin a paa Zakuk in amahte hnenah, “Ningte in i fate khiah i lang sah lio i si. Joseph khai um nawn lo i hang. Cen Simeon khai um nawn lo i hang. Cia tunin Benjamin lang ning nuam i. A zongza in i tawng i.” ti in ti i. 37Ciafang Reuben in a paa hnenah, “Benjamin khiah i kut ah i ap tulai tlun leh tuh ing. Heta ah hlen leh hlahlengkhaw i fapa panihte khiah rek tu lio.” ti in ti i. 38Ikhalselai Zakuk in, “I fapa khiah ning thawn in zu tuh lo i. A u khiah thi zo i. Amah lek taang i hang. Ning khualtlawng hmunah amah vumah rimsuhnak hleng lekhaw puak thawn dim i lu vumah lungsia thawn hlan songah i kawih tuh i si.” ti in ti i.