1Ciafangin BAWIPA in Moses le Aaron hnen ah, 2“Levi fate songin Kohath te songkhat khiah 3tawkdunhmun tabernacle songah naper tuhin luttu te kum sawmthum le a tan vum kum sawmnga tian a pum siar tu.
4He khiah Kohath fate in tawkdunhmun tabernacle songah per tuhhnak a tavuan i. Amahte naper khiah a cianghlim ber thil thawn senghnak i. 5Israel mite khiah camp in thawn fangin Aaron le a fate khai kawi tuhai khukhnak tuh pon khiah lang in Tettikhanhnak thingkuang khiah khuk tu seh. 6Ciaben fangin cia pon vumah batzer ramsa phaw khiah pharh tu selai cia vumah mepian pon in khuk tu seh. Ciaben fangin a zawnghnak thingpum khiah rolh tu seh. 7Cen sangper dahhmun cabuai vumah mepian pon khiah pharh tu selai cia vumah pakante le belte le hlengte le a burh hnak tuhin kaza-u dah tu seh. Cen sangper khai cia vumah dah tu seh. 8Ciate khiah pon san thawn khuk tu selai cia vumah betza phaw khiah pharh tu selai ciaben fangin thingpumte khiah rolh tu seh. 9Cen mepian pon khiah lang in amahte naperhnak mei-inn varhmun le a mei-innte le mica cemhnak kaihci le a pakan le mei-ti palangte khiah khuk tu seh. 10Ciaben fangin ciate khiah a belte kawmin betza ramsa phaw songah dahin a zawng tuhin thingtlang vumah khih tu seh. 11Sui tabernacle vumah mepian pon khiah pharh tu selai betza ramsa phaw thawn khuk ben fangin a thingpumte khiah rolh tu seh. 12Ciaben fangin sanginn songah amahte hmanghnak belte khiah mepian pon songah dah tu selai betza ramsa phaw thawn khuk ben fangin a zawng tuhin thingtlang vumah khih tu seh. 13Cen amahte in awlta ai vutkuang khai lang tu selai a vumah pon num thawn khuk tu seh. 14Cia awlta vumah amahte naperhnak thilrite – bel le mei phurhnak bel le fork le kawpia le hleng le awlta belte vumah dah tu selai a vumah betza ramsa phaw thawn khuk tu selai a thingpumte rolh tu seh. 15Aaron le a fate in sanginn le a thilri hmuah khuk ben fangin, Israel mite khiah thawn fangin Kohath fate in phur tuh i. Ikhalselai amahte in a cianghlim thilte khiah khing ma seh. Cialo fangin thi mawh ngai. Hete khiah Kohath fate ai phur tuhhnak thilrite i. 16Cen phungki Aaron fapa Eleazar natuan khiah meivar hnak thau le a rimhmui le nisiar ai hlu tuhhnak rongmu le a nawih tuhhnak thau le tabernacle le a songai thilte le sanginn le a thilte sik tuh khiah a tavuan i.”ti in rel i.
17Ciafangin BAWIPA in Moses hnenah, 18“Kohath te songkhat khiah Levi te lakin cem lio mah. 19Ikhalselai amahte in a cianghlim thilrite hnenah kawi fangin thi lohnak tuhin hetih bangin bawn tu: Aaron le a fate khiah lut tu selai Kohath fate ai per tuhhnak na khiah sem tu seh. 20Ikhalselai a cianghlimte thilte khuk laitak sik tuhin lut ma seh. Cialo fangin amahte khiah thi mawh ngai.”ti in rel i..
21Ciafangin BAWIPA in Moses hnenah, 22“Cen Kershon te songkhat khiah a pum siar tu. 23Tawkdunhmun tabernacle songah naper tuhin luttu te kum sawmthum le a tan vum kum sawmnga tian a pum siar tu. 24He khiah Kershon fate in per tuh le phur tuh hnak naper i: 25Amahte in tabernacle dawngkham hmai ai zarhnak pon le tawkdunhmun tabernacle le a khukhnak ponte le a vumai khukhnak betza ramsaphaw le tawkdunhmun tabernacle dawngkham berhnak pon le 26tualvan dawngkham berhnak pon le tabernacle le awlta hiang cingkim ai tarhnak ponte le rihualte le amahte naperhnak tuhai thilri hmuahhmuah khiah amahte in phur tuh i. Ciatih bangin per tuh i. 27Aaron le a fate in Kershon fate khiah a natuan a veksenin sem tuh i. Cen nangmah in amahte per tuhhnak natuan pe tuh i si. 28Hete khiah tawkdunhmun tabernacle songah Kershon fate ai per tuhhnak natuan i. Amahte tavuan khiah phungki Aaron fapa Ithamar kut hnia ah per tuh i.
29Cen Merari fate khiah amahte innkua songkhat bangin a pum siar tuh i si. 30Tawkdunhmun tabernacle ca in amahte in hete khiah phur tuh i: tabernacle thingtlepte le a zauhnak thingte le a khuamte le a mun hmun kuate le 32tualvan hiang cingkim ai khuamte le a mun hmun kuate le thil tar hmunte le a rihual te le a thilri hmuah khiah amahte in phur tuh i. Cen amahte ten phur tuh hnak thil khiah a hming rel tuh i si. 33Hete khiah Merari fate in tawkdunhmun tabernacle songai per tuh hnak natuan i ai phungki Aaron fapa Ithamar kut hnia ah per tuh i.”ti in rel i.
34Ciafangin Moses le Aaron le Israel mi upate in Kohath fate songkhat khiah 35tawkdunhmun tabernacle songah naper tuhin luttu te kum sawmthum le a tan vum kum sawmnga tian a pum siar i. 36Ciafangin a pum siarhnakte khiah thawng nih le za sarih le sawm nga i. 37Hete khiah BAWIPA in Moses kut songin ruaihnak bangin Moses le Aaron in siar ai tawkdunhmun tabernacle songah naper tuh ai siarhnak Kohath te songkhat i.
38Cen Kershon fate le a songkhat khiah 39tawkdunhmun tabernacle songah naper tuhin luttu te kum sawmthum le a tan vum kum sawmnga tian a pum siar ai 40amahte songkhat songai siarhnak khiah thawng nih le za ruk le sawm thum i. 41Hete khiah BAWIPA in Moses kut songin ruai hnak bangin Moses le Aaron in a pum siar ai tawkdunhmun tabernacle songah naper tuh ai siarhnak Kershon te songkhat i.
42Cen Merari fate songkhat khiah, 43tawkdunhmun tabernacle songah naper tuhin luttu te kum sawmthum le a tan vum kum sawmnga tian 44amahte songkhat ai pum siarhnak khiah thawng thum le za nih i. 45Hete khiah BAWIPA in Moses kut songin ruaihnak bangin Moses le Aaron in siarhnak Merari te songkhat i.
46Moses le Aaron le Israel mi upate in Levi te songkhat khiah 47tawkdunhmun tabernacle songah naper tute le thil phurtute kum sawm thum le a tan vum kum sawm nga tian 48a pum siarhnak khiah thawng riat le za nga le sawm riat i. 49BAWIPA ruaihnak bangin Moses kut songin amahte naperhnak le amahte tavuan bangin a pum siar i. Ciatih in BAWIPA in Moses ruaihnak bangin amahte pum khiah siar i.