1Ciafangin Israel mite pawlpui a veksenin hla hmasaber hla ah Zin Nelrawn ah hleng ai anite khai Kadesh ah com i. Ciata ah Miriam khai thi ai ciata ah vui i. 2Ciafangin ciata ah ti ding tuh um nawn lo i. Ciamanin anite khai Moses le Aaron tawng tuhin hmunkhat in tai tlang ai, 3“Bawipa hmai ah kin unaute thi fangin kin thi sawn ta selai! 4He hampalak ah kin suumte kawmin kin thi tuhin zaimanin Bawipa pawlpui te khiah kawih i si? 5Ziangmanin Izip ramin kin suak ruai ai he a siava hmunah kin hong ruai ngian i si? Heta ah rongmu le thaihmin le capitti le taleti khai um lo i. Cen ti ding tuh khai um lo i.”ti in hau i. 6Ciamanin Moses le Aaron khai pawlpuite hnenin suak ai tawkdunhmun tabernacle dawngkham ah kawi ai anite khai a hmai ah bok i. Ciafangin Bawipa thangphathnak khiah amahte hmai ah dak i.
7Ciafangin Bawipa in Moses hnenah, 8Na tokrolh khiah lang tulai na u Aaron thawn pawlpuite khiah hmunkhat in khawm ruai tu. Amahte hmai ai lungpui khiah pon tulai ti suak tuh i. Ciatih in lungpui songin suakhnak ti khiah amahte hnenah kawih sah tulai pawlpui le a suumte kawm in ding tuhin pe tu.”ti in ruai i.
9Ciamanin Moses in Bawipa ruaihnak bangin a tokrolh khiah Bawipa hmai in lang i. 10Ciafangin Moses le Aaron in pawlpuite khiah hmunkhat in lungpui hmai ah tai ruai le amahte hnenah, “Ngai tuu-ih, mi suaksualte! He lungpui songin ti ning suah sah tuh ing?”ti in ti i. 11Ciaben fangin Moses in a kut khiah daang ai lungpui khiah a tokrolh thawn vel nih seu i. Ciafangin ti khiah a tamngai in suak ai pawlpuite le a suumte in ding i. 12Ciafangin Bawipa in Moses le Aaron hnenah, “Nangmah in i sang lo ai Israel mite mit hmai ah kaimah khiah a cianghlim ti in i zul lo manin amahte hnenah i pehnak ramah fehpui tuh lo i si.”ti in ti i. 13He khiah Meribah ti ti in ko i. Ziangmanti fangin Israel mite in Bawipa khiah tawng ai Bawipa khiah amahte lakah a cianghlim in hmuh i.
14Ciafangin Moses khai Kadesh in Edom kumpibawipa hnenah, “Na unau Israel in, ‘Kin vumah harsahnak hlenghnak khiah kin ling sah liang i si. 15Kin paate in Izip ramah zu ai a rai ngai um awng ai Izip mite in amahte khiah rim awng i. 16Bawipa hnenah kap fangin kin aw khiah kin za sah ai, Vancung Mi khiah kin hlat sah le Izip ramin kin suah i. Cen tunin na ramri ai Kadesh ramah hleng i hang ing. 17Na ram songin kin feh siang tu. Lo lai le vuandum songah khai vak tuh lo i ing. Cen namkum songai ti khai ding tuh lo i ing. Kumpibawi Lampui song lekin feh tuh ngawn i ing. Na ram kin kan hlan lo kiahhan lam le kekeh lamah lamtler tuh lo i ing.’ti in na ti i.”ti in ngen i. 18Ciafangin Edom in Moses hnenah, “I ram songin feh tuh lo i si. Feh le isikhaw vangsau thawn ning tawng tuh ing,”ti in sawn i. 19Ciamanin Israel mite in, “Kumpibawi Lampui song in vak tuh ngawn i ing. Cen kaimah le kin suumte in ning ti khai ning ding sah lekhaw a man ning pe tuh ing. Kin ke thawn kin feh siang tu. Cialek ngawn i.”ti in ti i. 20Ciafang amah in, “Feh tuh lo i si.”ti in sawn i. Ciamanin Edom khai amahte tawng tuhin minung tamngai le raal thilthuam thawn kawi i. 21Ciatih bangin Edom in Israel khiah a ram songin feh siang lo i. Ciamanin Israel khai amahte hmun in let i.
22Ciafangin Israel mite khiah a pawlpui veksen in Kadesh in feh ai Hor Mual vumah hleng i. 23Ciafangin Bawipa in Moses le Aaron hnenah, “Edom ram hiang ai Hor Mual vum ah, 24Aaron khiah thi tuh i. Ziangmanti fangin ningmah in Meribah ti ah i thu i ngai lo manin Israel mite hnenah i pehnak ramah amah khiah lut tuh lo i. 25Aaron le a fapa Eleazar khiah Hor Mual vumah kawih tulai 26Aaron thuam khiah hawk sah tu lio lai a fapa Eleazar khiah silh tu. Ziangmanti fangin Aaron khiah thi tuh i.”ti in rel i. 27Ciamanin Moses khai Bawipa ruaihnak bangin bawn ai pawlpui veksen hmuh in Hor Mual vumah amahte khiah feh i. 28Moses in Aaron thuam khiah hawk sah ai a fapa Eleazar khiah silh ai Aaron khai mual vumah thi i. Ciafangin Moses le Eleazar khai mual vumin zu i. 29Pawlpui veksenin Aaron thi khiah hmu fangin Israel mi veksenin Aaron khiah ni sawmthum song kah i.