1BAWIPA in Israel hmuifu bur khiah Balaam in hmu fangin vel dang bangin a dawi hmang tuh in sii lo ai nelrawn lam sawn sik ai, 2Balaam khai khuahlir le Israel mite khiah amahte hin bangin buk sa in um tlaang khiah hmu i. Pathian Ciang Rauhla khiah a vumah hleng i. 3Ciafangin hetih bangin rel i:
“Beor fapa Balaam relhnak thu,
a mit khiah hong sah liohnak pa relhnak thu,
4 Pathian ponhnak zatu pa relhnak thu,
A Sangber Pa khiah mang le han rawl bangai hmutu,
A mit tak thawn laipua ah tlu tu pa relhnak thu:
5 Aw Zakuk, na bukte khiah zaitluk in mawi i!
Zaitluk in na innte khai mawi i, Aw Israel!
6 A kau ruaihnak rawn te le runti hiangai vuandum le
BAWIPA ai cinghnak aloe le ti hiang ai sida thing bang i.
7 A zinzir in ti khiah burh tuh ai a cii in ti tamngai ngah tuh i.
A kumpibawipa khiah Akak hnak in sang sawn tuhai
a ukhnak khiah do tuh i.
8 Amah khiah Izip songin Pathian in suah i.
A tha khiah hampalakai kawlpaw cang bangin hat i.
Mi phun tamngai le a raalte khiah neh tuh i.
Amahte ruh khiah ek sah tuhai amahte khiah
a conkiang thawn sun tuh i.
9 Chintit bangin bok ai bual i.
Chintit bangin aisu in phawr tuh i?
Hmuifu na bur tu khiah hmuifu i.
Na camtu khiah camhnak ngah tuh i.”ti in rel i.
10Ciafangin Balak khai Balaam lakah thinraw ai papabeng le Balak in Balaam hnenah, “I raalte cam tuhin na ko ai he vel thum amahte khiah a tamngai in hmuifu bur i si! 11Ciamanin na ramah tlan tu. A tam bik in na tham tuh ing tin na rel ing. Inapui ai BAWIPA in i lehsawng ngah tuh in na kham lio i.”ti in ti i. 12Ciamanin Balaam in Balak hnenah, “Kaimah in khai na thuthantu te hnenah na rel lo ing? 13‘Balak in a inn dim in sui le ngun i pe rinin kaimah thu in a pha le a pha lo bawn tuhin BAWIPA ruaihnak kaan in feh thill lo ing. Ikhalselai BAWIPA ponghnak bangin rel tuh ing.’ti in na rel lo ing? 14I mite hnenah tlung tuh ing. Kawi tu lai tunhnua ah he mite in na minungte hnenah bawn tuhhnak na rel ngang.”ti in sawn i.
15Ciafangin he tih bangin rel i:
“Beor fapa Balaam relhnak thu,
a mit khiah hong sah liohnak pa relhnak thu,
16Pathian ponhnak zatu pa relhnak thu,
A Sangber Pa hnenai fimhnak nai tu:
A Sangber Pa khiah mang le han rawl bangai hmutu:
A mit tak thawn laipua ah tlu tu pa relhnak thu:
17Amah khiah hmu ing. Tunin hmu lo ing.
Amah khiah hmu ing. Ikhalselai a nongah i lo i.
Zakuk songin Arsi suak tuh i. Israel songin Kumpibawi
suak tuh ai Moab te calpang khiah seu tuh le Seth fate
khiah hnawmcan tuh sio i.
18Edom khiah ping tuh i. A raal Seir khai ping tuh i.
Cialak in Israel tu kho tuh amam i.
19Zakuk songin Uktu Bawi suak tuhai a taanghnak
khua khai hnawmcan tuh berh i.”ti in rel i.
20Ciafangin Amalek khai sik ai hetih in rel i:
“Amalek khiah mi phun lakah nambat pakhat i.
Inapui ai amah khiah rall tuhai a hnuataber cang tuh i.”
21Ciaben fangin Ken mite khiah sik ai hetih in rel i:
“Ning umhmun khiah a kho ngai i.
Ning bu khiah lungsirpui vumah sa i si.
22Ikhalselai Asshur te in ning pom fangin
Ken mite khiah hnawmcan tuh berh i.”
23 Ciafangin hetih in thu rel i:
“Ai aw! Pathian in ciata khiah hetih bangin
bawn fangin aisu nung tuh i?
24Ikhalselai Saipras ramin timbawte hleng tuh ai Asshurte le Eberte khiah neh tuh i. Ciafangin amahte khai hnawm tuh sio ve i.”ti in rel i.
25Ciafangin Balaam khai tho ai a khua ah tlung leh ai Balak khai tlung ve i.