1Ciata in Bashan hmun lam lampui ah feh i sing. Kin tawng tuhin Bashan kumpibawi Ok le a minungte veksenin Edrei ah kawi i. 2Ciafangin BAWIPA in i hnenah, ‘Amah khiah kih mah. Ziangmanti fangn amah le a minungte le a ram khiah a veksenin na pe zo ing. Heshbon ai umtu Amorte kumpibawi Sihon vumah na bawn bangin bawn tuh i si.’ ti in i rel i. 3Ciamanin BAWIPA kin Pathian in Bashan kumpibawi Ok khai a minung kawmin a veksen in kin kut ah kin pe ai amah khiah a nung ai taanghnak mi pakhat bang khai um lo tianin tawng i sing. 4Ciafang in a khuate khiah lang sah sio i sing. Kin lang lohnak khua pakhat bang khai um lo ai Bashan kumpibawi ram Arkob ai khua sawmruk khiah lang sah i sing. 5He khuapuite khiah ram songai khuate nau niuniu kawm in sen sang ngaingai in kulhhnak khuate i ai kawl dawngkham le dawngrolhte khai nai i. 6Heshbon kumpibawi Sihon vumah kin bawn bangin anite khai a pasal le nupang le a fate thawn khua caang ah a veksenin hnawmcan sio i sing. 7Ikhalselai a suumte le a khuate khiah kinmah ping tuhin lang sah i sing. 8Ciafangin Jordan in he lamah umtu Amorte kumpibawi panih te kut in cia ram khiah Arnon Run ai panin Hermon Mual tian lang sah i sing. 9(Sidon te in Hermon Sirion ti in ko ai Amorte in Senir ti in ko i) 10Cen zawllai hmun ai khuapuite le Kilead a veksenin le Bashan a veksen khiah Bashan kumpibawi Ok khuate Salkah le Edrei tian in lang sah i sing. 11Ziangmanti fangin Bashan kumpibawi Ok lek ian tlami fate songin taanghnak i. A khuahluan khiah thir khuahluan i. A saulam khiah dong kua sau ai a kau lam khiah dong li kau i. Cia khiah Ammon ai Rabbah hnenah um hlen i lai.
12Ciafangin kin ping ngahhnak ram Arnon Run hiang ai Aroer ai panin Kilead mual le a khuate a hrek tian khiah Reuben le Kad mite pe ing. 13A taanghnak Kilead ram le Ok kumpibawi ram Bashan a veksen khiah Manasseh hin a hrekkhatte hnenah pe ing. (Arkob ram le Bashan ram khiah a veksenin tlami ram ti in ko i. 14Manasseh fapa Jair in Arkob ram khiah Keshur le Maakat te ramri tianin a veksenin lang sah ai Bashan khiah amah hming lang in Havoth Jair ti in tunnia tian in ko i.) 15Kilead khiah Machir pe ing. 16Cen Reuben le Kad te hnenah Kilead in Arnon Run laiteng khiah a ramri i tuhin Ammon mite ramri ai Jabbok Run tian le 17a zawllai hmun ram khai Jordan Run khiah a ramri i tuhin Piskah mualtang hnia ai Chinnereth in Arabah Tipui (Ci Tipui) nisuak hmunlam tian pe ing.
18Ciafangin ning hnenah, ‘BAWIPA ning Pathian in he ram khiah ping tuhin ning pe zo i. Ning pasalte a ben hmuah in ning unau Israel mite hmai in raal thilthuam vongin ning ke thawn tan tuh i si. 19Ikhalselai ning nute le ning fate le ning suumte (suum tamngai nai khiah ning ling ing) tu kaimah ai ning pehnak khuate songah, 20BAWIPA in comhmun ning pe bangin anite khai comhmun pe in Jordan ralkhat lamai BAWIPA ning Pathian ai pehnak ram khiah ping ngah hlan tian, lo um tu seh. Ciaben fangin ningte khai i pehnak ning ramah tlung thai i si.’ ti in thu ning pe ing. 21Ciafangin Joshua hnenah, ‘BAWIPA na Pathian in he kumpibawi panih te hnenah bawn hnak khiah na mit in hmu zo i si. Ciatih bangin na khel hmun kumpibawi ram cang ah BAWIPA in bawn tuh i. 22Amahte khiah kih tuh lo i si. Ziangmanti fangin BAWIPA na Pathian in nangmah ca in tawng tuh i.’ ti in rel ing.
23Ciafangin BAWIPA hnenah thukham ing, 24‘Aw BAWIPA Pathian, Na hnenum hnenah na lianhnak le na power khiah i hmuh pan i hang si. Ziangmanti fangin van le laipua ah Na perhnak le a lian ngai Na bawnhnak bang bawn ben thai aisu bang pathian um i? 25Ninghio na ngen ing, Jordan ralkhat ai ram pha le khia a mawi mualte le Lebanon hmu tuhin i tan siang tu.’ti in ngen ing. 26Ikhalselai ningmah manin BAWIPA khiah i lakah raw ai i ngai nuam lo i. Ciamanin BAWIPA in, ‘Tawk zo hang. Cia thu khiah i rel nawn mah. 27Piskah mual vum a sangber hmunah hong tulai ciata in nitla hlumlam, saklam, hlanglam le nisuak hmun lam khiah sik tu. Na mit thawn hmu tu. Ziangmanti fangin he Jordan khiah tan tuh lo i si. 28Ikhalselai Joshua khiah ruai tulai so tulai tha pe tu. Ziangmanti fangin he mite hmai in feh tuhai na hmuhnak ram khiah co ruai tuh i,’ti in i rel i. 29Ciamanin Beth Peor ralkhat ai zawllai hmunah um i sing.