1Ningte lakah profet pakhat i tu seh, mangman tu pakhat suak in cia pa in hnikhnaihhnak le ngaihsun urkul ning hmuh lekhaw 2a hnikhnaihhnak le a ngaihsun urkul khiah khim peu fangin amah in, ‘ning ling awng lohnak a dang pathiante hlun in bia nga sing,’ti in ning ti lekhaw, 3cia profet le mangman tu pa thu khiah sang tuh lo i si. Ziangmanti fangin BAWIPA ning Pathian khiah ning thinlung veksen in le ning rauhla veksenin it le it lo khiah BAWIPA ning Pathian in ning cu i. 4BAWIPA ning Pathian khiah hlun in amah khiah kih tuh i si. A thukham khiah hlunin a aw khiah ngai tuh i si. Amah na khiah per sah in amah khiah a kho ngai in pom in lep tuh meng i si. 5Ikhalselai cia profet le mangman tu pa khiah rek tuh lio i si. Ziangmanti fang in sal le cengfa inn songai ning tlantu le Izip ramai ning suah tu BAWIPA ning Pathian hnenin lam ning tler ruai tuhin amah in thu ning rel i. BAWIPA ning Pathian ai ning ruaihnak bangin vak tuh lo in ning zawl i. Ciatih bangin ning lakai a pha lo khiah rek tuh i si.
6Na nuu fapa na unau i tu seh, na fapa le na fenu i tu seh, na ithnak na nu i tu seh, na rauhla bang rori ai na ithnak na rual i tu seh, hete pakhat khat in a thupniu in na zawl in, ‘Feh in a dang pathiante na per sah nga sing,’ti in na paate le na ling awng lohnak 7 l aivum pumpalah ning hiang cingkim umtu a nong le a hla mite pathiante thu khiah na rel lekhaw, 8Amah thu khiah lungkhim pui tuh lo i si. Ngai khai ngai tuh lo i si. Amah khiah zah khai zah tuh lo, thup khai thup tuh lo i si. 9Ikhalselai nangmah in cia pa khiah rek tuh rori i si. Amah khiah rek tuhin na kut khiah suah hmasaber tuhai ciafangin mi dangte veksenin suah tuh ve i. 10Lung to thawn amahte khiah a thi hlanlo sep tuh i si. Ziangmanti fangin sal le cengfa inn le Izip ramai ning suah tu BAWIPA ning Pathian hnenin ning zawl tum i. 11Ciafangin Israel mite veksen in za tuh ai lau tuh le he bang a siava khiah ning lakah bawn tuh nawn lo i si.
12BAWIPA ning Pathian in umhmun ai ning pehnak khua songai mi pakhat in, 13‘Ning lakai mi pha lote khiah fehin amahte khua songai umtu te khiah zawl ai, ning ling awng lo hnak pathiante khiah, “A na per sah nga sing,”ti in ti i,’ti in ning rel lekhaw, 14A kung bik in sii in zong in a thu zawt tuh i si. Ciafangin ning lakah ciabang ning dulkul khiah bawn peu khiah hman rori lekhaw, 15cia khua mite khiah a khua songai umhnak thil le a sumte kawmin a veksen in vangsau thawn rek tuh sek i si. 16BAWIPA ning Pathian ca in amahte thilri khiah lampui laiteng ah pum in a khua kawmin a veksenin mei in tai tuh i si. Cia khua khiah laipua pumhmun cang tuhai aisu in cia khua khiah sa leh tuh lo i. 17Ciafangin awrsia camhnak thilte khiah ning kut songah um tuh lo i. Ciafangin BAWIPA khai thinraw roh tuh lo ai ngaih ning har in ning ninghio tuh ai ning paate hnenah kham bangin ning zaai ruai tuh i. 18 Ziangmanti fangin ningte in tunnia ah kaimah ai ning ruaihnak thukhamte khiah hlun ai BAWIPA ning Pathian hmai ah a pha khiah bawn tuhin BAWIPA ning Pathian aw khiah ngai i si.