1Bawipa ning Patian ai ro bangin co tuhin ning pehnak ramah hleng in cia ram khiah ping in cia ramah khua ning to fangin, 2Bawipa ning Pathian ai ning pehnak ning ram songai suakhnak rong a hmasaber a hrekkhatte khiah bawm songah thun tu i lai Bawipa ning Pathian in a hming dah hmun tuhai rilhnak hmunah kawih tuh i si. 3Ciafangin ciateng ai phungki tuantu pa hnenah, ‘Bawipa in kin paate hnenah khamhnak ram songah hleng zo ing ti in Bawipa ning Pathian rel tuh ing.’ ti in rel tu seh. 4Ciafangin phungki pa in ning kut songin cia bawm khiah lang tuhai Bawipa ning Pathian awlta hmai ah tauh tuh i. 5Ciafangin Bawipa ning Pathian hnenah, ‘I paa khiah a thi banghma Siria mi i awng le Izip ah zu ai Izip ramah um awng i. Ciafangin amah khiah mi tlawmniu i. Ciata ah mi phun lian ngai le tamngai in pung i. 6Ikhalselai Izip mite in zauh kin suam in kin rimh ai ceng ah kin hmang i. 7Ciafangin kin khai kin papuite Bawipa Pathian hnenah kap ai Bawipa in kin aw khiah kin za sah ai kin rimsu kin naperhnak le kin tuarhnak khiah kin hmu sah i. 8Ciamanin Bawipa in huthawm lian ngai le ngaihsun urkul le hnikhnaihhnakte le laukul ngai in Izip ramin kin suah i. 9Heta ah kin kawh ai, ‘cawhnawi le khoitilu luang hmun’ he ram khiah kin pe i. 10Ciamanin tunin Aw Bawipa, nangmah ai i pehnak rong thar a hmasaber khiah kawih ing.’ti in rel tu. Ciafangin Bawipa na Pathian hmai ah dah tulai Bawipa na Pathian khiah bia tu. 11Ciatih bangin Bawipa na Pathian in nangmah le na innkua le ning lakai Levi le mikhualte ca ai na pehnak a pha thil hmuah lakah ang tu.
12Kum thumhnak kum sephuhtaphuh hlu kum ah na naihhnak khiah sephuhtaphuh ca in khawi in Levi mi le mikhual le paa nai lote le hmaitongte in na kawl dawng ah ei in kham fangin, 13Bawipa na Pathian hnenah, ‘A cianghlim sephuhtaphuh khiah i inn songin suahzo ai nangmah ai i ruaihnak na thukham bangin Levi te le mikhualte le paa nailo te le hmaitongte khai pe zo ing. Na thukham lakah sual lo ing. Cen hai khai hai lo ing. 14Cen mithi kah tengin khai ei lo ing. A cianglo in hmang tuhin khai lang lo ing. A thite ca in khai pe lo ing. Bawipa i Pathian aw khiah ngai ai na ruaihnak bangin a veksenin bawn ing. 15Na umhmun vancung in sik tulai na minung Israel mi le kin paate hnenah na kham bangin kin hnenah kin pehnak “cawhnawi le khoitilu luang hmun ram” khiah hmuifu bur tu.’ ti in rel tuh i si.
16Bawipa ning Pathian in he thukhamte le thukhanhnakte khiah hlun tuhin tunnia ah ning ruai i. Ciamanin ning thinlung veksen le ning rauhla veksen thawn ciate khiah hlun tuhin ralring tuu-ih. 17Tunnia ah Bawipa khiah ning Pathian tuhin rel zo i si. Cen amah lampui ah vak tuhin le a thukhamte le a dan upadi le a thukhanhnakte khiah hlun tuhin rel zo i si. Cen a aw ngai tuhin khai rel zo i si. 18Cen tunnia Bawipa in khai ningte khiah ning kham awng bangin a thukhamhnak hluntu tuhin mi phun a special in ning dah zo i. 19Cen a bawnhnak mi phun hmuahhmuah hnak in ningte khiah anhnak lam le a hming lam le upathnak lamah ning saang sawn tuhin ning bawn zo ai Amah ai rel zo bangin ningte khiah Bawipa ning Pathian hnenah mi cianghlim cang tuhin rel zo i.”ti in rel i.