1Aw vancungte, i ngai tu i lai thurel tuh ing.
Aw laivumte, i ka ai relhnak thu khiah i za
sah tuu-ih.
2 I thucukhnak khiah ruah bangin sii tu seh.
I thurelhnak khiah naidawh bangin tla tu seh.
Hnuhhing a no vumai ruahti bangin far tu seh.
Hampa vumai ruahsar bangin sii tu seh.
3 Ziangmanti fangin Bawipa hming khiah thang ruai ing.
Kin Pathian hnenah a lianhnak khiah laar ruai tuu-ih.
4 Amah khiah Lungto Pui i.
A perhnak khiah khim liang i.
Ziangmanti fangin a lampui khiah hman tio i.
Amah khiah thuhman Pathian i.
A hman lo in thukhan thai Pathian i lo i.
Amah khiah a dikcang Pathian i.
5 Amahte veve khiah hmon in zaan ruai i.
Amahte sualhnak manin amahte khiah a fate i lo i.
Amahte khiah a sual le a konkaw san minungte i.
6 Aw mivoi le fimhnak nai lo mite,
ciatih bangin Bawipa lakah bawn i sim?
Ning lai tu ning Pa i lo im?
Amah in ning bawn ai ning kho ruai i lo im?
7 He hlan thu khiah hih tuu-ih.
He hlan san tamngai le kum tamngai khiah ruat tuu-ih.
Ning paa khiah zawt tuu i lai ning hmuh tuh i.
Ning patarte khiah zawt tu i lai ning rel tuh i.
8 A Sangber in amahte ro khiah
mi dangte phun lakah khan sah fangin le
Adam fate khiah amah in a tumce in dah
fangin cia mite ramri khiah Israel minung zah
in dah sah i.
9 Ziangman ti fangin Bawipa ai ping tuh
a vo khiah a minung te i.
Zakuk khiah Amah roco hmun ram i.
10 Amah khiah nelrawn ngaal kualak le
zai khai um lo hmun hlizuang hmun
hampalak ah tawk i.
Amah khiah a hiang cingkim in kulh ai
amah khiah thu cuk i.
A mitfang bangin kilkhawl i.
11 Mu in a buu khiah sok ai a niute khiah a ko
thawn khuk ai a ko khiah pharh ai amahte
khiah lang ai a ko vumah phur bangin
12 Bawipa in khai amah lekin konghoi ai
Zakuk in pathian dang nai awng lo i.
13 Lo ai rongte khiah amah in ei thai in
Bawipa in amah khiah laivum ai
a sangber hmunah vak ruai i.
Lungpui songin khoiti khiah luak ruai ai
lungpui songin thau khiah lang ruai i.
14 Kawlpaw songin cawhnawi tar le
tuu le me songin cawhnawi khiah suak ruai i.
Tuu faniu songai thau le Bashan tuu cang le me te le
a phaber letlo sangvut khai pe ai
capitti songai capittizu khai ding i si.
15 Ikhalselai Jeshurun khai khang ai sirh i.
Na thau ai na mawng ai na thau thiang i.
Ciafangin a bawntu Pathian khiah zaam lio ai
a o tu Lungpui khiah nautat i.
16 Ramdangte pathian thawn Amah khiah iksik
ruai ai
ningdul kul thawn Amah khiah thinraw ruai i.
17 Amahte in Pathian hnenah raithawi lo ai
khuavang hnen sawnah raithawi i.
Amahte ling awng lohnak le
a thar pathiante hnenah le
ning paate ai kih awng lohnak
a hleng thar pathiante hnenah raithawi i.
18 Ning keuh ruai tu Lungpui khiah zainam lo
in um ai ning paa Pathian khiah hai lio i si.
19A fapate le a fenute in amah khiah thinraw ruai
ngian manin Bawipa in hmu fangin amahte
khiah zainam lo i.
20 Ciangin Bawipa in, ‘Amahte hnenin
i hmai khiah thup tuh lio ing.
Amahte bohnak nia khiah sik tuh ing.
Ziangmanti fangin amahte khiah misual san
minungte i.
Sanghnak nai lo fate i.
21 Amahte in Pathian lo a dang bia in ik i sik ruai i.
A taw milim zuk thawnin thin i raw ruai i.
Ikhalselai mi phun rin i lo mi te thawn
amahte khiah iksik ruai tuh ing.
A taw mi phun thawn amahte khiah thinraw ruai tuh ing.
22 Ziangmanti fangin i thinraw khiah mei bangin kang i.
Hell ahniataber tian in kang ruai tuh i.
Laipua khiah a vumai pohnak thawnin kang ruai tuhai
mual hamte khiah mei in tai tuh ing.
23 Amahte vumah hnophnak khiah hleng ruai tuh ing.
Amahte vumah i conkiang khiah hmang tuh ing.
24 Amahte khiah rikam in thi tuh ai
urhnak thawn hnawmcan tuh ing.
Ramsate in amahte khiah dawp ruai tuh ing.
Cen laivut lakai rul songai thihsi khai hleng ruai tuh ing.
25 Tlangval le pa nai lailo fenu le hnawifawp lai
naupang le puakpar nai pasalte ca ah
sumpua ah vangsau thawn rek tuhai
a songah laukulhnak um tuh i.
26 “Amahte khiah zaan sio in seu tuh ing.
Amahte khiah minung phun songin
hai ruai tuh berh ing.”ti in rel ing.
27 Ikhalselai i raal pa khiah i lau i.
Ziangmanti fangin a raalte in lo ling khelh thai i.
A raalte in, “Hete khiah Bawipa in bawnhnak i lo i.
Kin thahathnak ai bawnhnak i.” ti thai pang i.’ ti in rel i.
28 Ziangmanti fangin amahte in tiamtu khai nai lo i.
Linghnak khai nai lo i.
29 Lehhnua ah amahte vumah hleng tuhhnak khiah
ruat hal tuhin amahte khiah lo fim in
he khiah ling ta selai!
30 Amahte Lungpui in amahte khiah lo zuar lio tahlahselai,
Bawipa in amahte khiah zam tahlahselai,
a kontih in mi pakhat in mi thawng khat khiah
hnawh ben tuh i?
A kontihin mi panih in mi thawngha khiah neh tuh i?
31 Ziangmanti fangin kin raalte khiah thukhan
tute inapui ai amahte lungpui khiah kin Lung
pui thawn bang lo i.
32 Ziangmanti fangin anite capit kuang tu Sodom
capit kuang i.
Kawmawrah lo ramai suakhnak capit kuang i.
Anite capit thai khiah nikkha capit thai i.
Anite capit bawr khiah a kha ngerngo i.
33 Anite capittizu khiah rul thihsi bang i.
Khawbra rul songai thihsi bang i.
34 He khiah i hlawnthilte kawmin tacik thawn khet
in i hnenah khawihnak i lo im?
35 Phuzul khiah kaimah tavuan i;
kaimah in rul tuh i ing.
Amahte ke khiah zaicam lo ah bah tuh i.
Ziangmanti fangin amahte vumah hnophnak
khiah hleng banghma i hang.
Amahte vumah hleng tuhhnak thilte khiah
a rang in hleng tuh i.
36 Ziangmanti fangin Bawipa in a minungte khiah
thukhan sah tuh i.
Amahte power khiah bo sek ai
mi hnenum le mi hnenum lote khai pai sio
khiah hmu fangin
Bawipa in a hnenumte khiah ngaihhar tuh i.
37Ciafangin Amah in, “Amahte in ben tuhai
siihnak a pathiante tu a konah i hang?
38Amahte raithawihnak a thau ei sah tuh le
ding tuhai amahte in hluhnak capittizu ding
tuh pathiante khiah a konah i hang?
Amahte khiah tho tu selai ning bawm tu seh.
Ning buanhmun ah cang tu hang seh.
39‘Kaimah khiah Amah i ti khiah hmu tuu-ih.
Kaimah lo a dang Pathian um lo i.
Kaimah in rek ai kaimah in nung ruai ing.
Kaimah in ur ruai ai kaimah in cak ruai ing.
I kut songin aisu in khai luat ruai ben lo i.
40 Ziangmanti fangin i kut khiah vancung lamah pharh ai,
‘Kumzangza in i nung i bangin,
41 a tleu ngai i vangsau khiah tat lengkhaw
i kut thawn thukhan lengkhaw
i raalte khiah phuzul tuh ing.
I huatute khiah rul tuh ing
42 I conkiang khiah thi thawn mat tuh ing.
I vangsau in thawngtlate le a rekhnak mite le
i raalte uktute lu ai thi khiah ei tuh i.’ tin rel tuh i.
43Aw Zentile mite, A minungte kawmin ang tuu-ih.
Ziangmanti fangin A hnenumte thi ca in
Amah in phuzul tuh i.
A raalte khiah phuzul tuh i.
Amah ram le a minungte ca in sualkhukhnak
pe tuh i.”ti in rel i.
44Ciamanin Moses khai Nun fapa Joshua thawn kawi ai he la songai thu hmuah a veksenin mi zapui zak in rel i. 45Moses in he thute khiah Israel mite veksen hnenah rel ben fangin 46amahte hnenah, “Tunnia ah ningte hnenah i tettikhanhnak he thute a veksen khiah ning thin song ah khawl in ning fate in a kung niu in a dan upadi song ai thu hmuah hlun tuhin ruai tuh i si. 47Ziangmanti fangin he khiah ning ca ah a lovang i lo i. Ikhalselai he khiah ning nunhnak i. Ping tuhin Jordan khiah tanin ning feh hmun ramah he thute in nun ning sau ruai tuh i.” ti in rel i.
Moses thi i
48Cia nia ah Bawipa in Moses hnenah, 49He Jerikhu ralkhat ai Moab ramai Abarim mualtlang Nebo mual vumah hong tulai, ping tuhai Israel mite hnenah i pehnak Khanaan ram khiah sik tulai 50na u Aaron khiah Hor mual vumah thi ai a minuingte hnenah khawm bangin nang khai na hong hmun mual vumah na thi tuhai na minungte hnenah na khawm tuh ve i. 51Ziangmanti fangin Zin Nelrawn ai Meribah ti hnenah Israel mite hmai ah i lakah sual i si. Israel mite hmai ah i cianghlim ruai lo i si. 52Ikhalselai Israel mite hnenah i pehnak na hmai ai ram khiah hmu tuh i si. Inapui ai cia ramah feh tuh lo i si.” ti in rel i.