Naaman Phar bawlhnak thu
1Siria kumpibawipa ai raalkapte khawngtu paa Naaman khiah a bawipa hmai ah upat tlak le a thupui ngai i. Ziangmanti fangin, amah manin Bawipa in Siria mite in amahte raal khiah neh ruai i. Naaman khiah raalpha ngai napui ai miphar i. 2Siria mite in Israel ram khiah rok fangin, fenu niu pakhat khiah pom ai tlun le Naaman ai nu hnenum in hmang i. 3Ciafangin cia nuu in a bawinuu hnenah, “I bawipa khiah Samaria ai prawfet thawn umkhat ta selai, amah in a phar khiah cak ruai tuh napui i.”ti in rel i. 4Ciafangin Naaman khai inn songah lut ai a bawipa hnenah, “Israel ramai nupang nuu in ciatih bangin rel i.”ti in rel i.
5Ciamanin Siria kumpibawipa in, “Israel kumpibawipa hnenah lai kuat ngang.” ti in ti i. Ciamanin ani khai ngun talan sawmkhat le sui shekel thawngruk le thilthuam thuam ha thawn feh i. 6Ciafangin Israel kumpibawipa hnenah, “He lai thawn in na hnenah i hnenum na kuat ing. A pharhnak lo cak ruai tu.” ti ai nganhnak lai kawih i. 7Israel kumpibawipa in cia lai khiah siar fangin, ani khai a thuam khiah zik ai, “Kaimah khiah Pathian ing? Mi rek inglai nung ruai ben tuh ing? Ziangmanin he pa in a hnenum phar khiah cak ruai tuhin i hnenah i kuat i? Zaitluk in tawng i caai hnelhno i pa!” ti in ti i.
8Israel kumpibawipa in a thuam zik i ti khiah Pathian minung pa Elisha in za fangin, kumpibawipa hnenah, “Zaimanin na thuam zik i si? Amah khiah i hnenah kawi tu selai, Israel ramah prawfet um i ti khiah ling tuh i.” ti in thu cah i. 9Ciafangin Naaman khai a siphuhte le a siphuh leng thawn feh ai Elisha inn dawngkham ah ding i. 10Ciafangin Elisha in amah hnenah a hnenum hlat ai, “Jordan runah feh tulai vel sarih som tulai, na taksa khiah cak tuh ai, na ciang tuh i.” ti in rel i. 11Ikhalselai Naaman khai thinraw rauh in suak ai, “Amah khiah i hnenah suak in i hmai ah dingin, Bawipa a Pathian hming khiah ko in a kut khiah i hmaihma vumah zap in i phar khiah i ciang ruai tuh vuah cop ing. 12Damaskhas ai run Abana le Pharpar te khiah Israel ramai ti veksen tah in pha sawn lo im? Ciate ti songah som in i ciang thill lo im?” ti in ti i. Ciamanin ani khai thinraw thimang in let i. 13Ciafangin a hnenumte khai a hnenah kawi ai, “I pa, prawfet paa in thil lian ngai na bawn ruai selai, bawn tuh lo i sim? Cia ilekhaw, amah in, ‘Som tulai, na ciang tu seh.’ti in na ti fangin, a tam rauh in bawn tuh lo i sim?” ti in ti i. 14Ciamanin ani khai zu ai Jordan ti songah Pathian minung paa ai ruaihnak bangin vel sarih nim i. Ciafangin a taksa khiah naupang taksa bangin cak ai, amah khiah ciang lio i.
15Ciafangin ani khai Pathian minung paa hnenah a hnenumte kawmin let leh ai, Elisha hmai ah ding ai, “Israel ram lo ah, laivum veksen ah Pathian um lo i, ti khiah ling i hang ing. Ciamanin na hnenum hnenai lehsawng khiah i saang tu.” ti in ruai i. 16Ikhalselai Elisha in, “ A hmai ah i dinghnak Bwipa nung bangin, zai khai na saang tuh lo ing.” ti in ti i. Amah in khengkhebel in ruai napui ai lang nuam lo i. 17Ciamanin Naaman in, “Cia ilekhaw, na hnenum khiah lak panih phurh tuh laipua i pe tu. Ziangmanti fangin kaimah na hnenum in Bawipa siar lo a dang pathiante hnenah mai thawn taihnak a hlu le raithawi tuh nawn lo i hang ing. 18Ikhalselai i bawipa khiah Rimmon temple ah a pathian bia tuhin kawi fangin, i hngai in ding fangin, Rimmon temple songah lu i ut fangin, Bawipa in na hnenum khiah sual lo i hlat tu seh.” ti in ti i. 19Ciafangin Elisha in amah hnenah, “Thinnuam in tlung tu.” ti in ti i. Ciamanin ani khai amah hmunin zaicam lo hla ah feh i.
20Ikhalselai Pathian minung paa hnenum Kehazi in, “I bawipa in Siria paa Naaman khiah zah ai a kut ai kawihhnak lehsawng khiah saang sah lo i. Ikhalselai Bawipa nung bangin, amah khiah hnawh ngangkhaw, a thil khiah lang sah tuh ing.” ti in ti i. 21Ciamanin Kehazi in Naaman khiah hnawh i. Naaman in amah khiah a hnua in dawp khiah hmu fangin, a siphuh leng vumin amah tawk tuhin tolh ai, “A veksenin pha liang im?” ti in zawt i. 22Kehazi in, “Pha liang i. I bawipa in, ‘Mitua niu ah prawfet fapa panih khiah Efraim mual lamin hleng i. Amahte khiah ngun tangka talan pakhat le thilthuam thuam nih pe tu.’ ti in na ti i.” ti in sawn i. 23Ciamanin Naaman in, “Talan panih lang tu.” ti in ti i. Ciafangin talan panih khiah thilthuam thuam nih thawn dip panih songah thun ai a hnenum panihte khiah pe ai cia hnenumte in Kehazi hmai ah feh ai phur i.
24Amahte umhmun ah hleng fangin, Kehazi in cia thilte khiah amahte kut in lang ai, inn songah khawi i. Ciafangin amahte khiah hlat ai anite khai feh i. 25Ciaben fangin ani khai tlum ai a bawipa hmai ah ding i. Ciafangin Elisha in amah hnenah, “Kehazi, konah kawi i si?” ti in zawt i. Ciafangin Kehazi in, “Na hnenum khiah konah khai kawi lo ing.” ti in sawn i. 26Ciafangin Elisha in Kehazi hnenah, “Naaman in a siphuh leng vumin na tawk tuhin let leh fangin, i rauhla khiah nangmah thawn umkhat lo ing? Tun heh tangka le thilthuam le oliv vuandum le capit vuandum le tu le kawlpaw le hnenum pasal le nupang saang sah cu im? 27Ciamanin Naaman phar khiah na vumah le na tesin fate vumah kumzangza in um tuh ngio i hang.” ti in ti i. Ciafangin ani khai Elisha hmai in suak ai phar lio ai vur bangin ngo i.