1Josiah khiah a kumpibawi cang pan fangin kum riat i ai, Jerusalem ah kum sawmthum le kum khat uk i. A nuu hming khiah Bozkath mi Adaiah fenu Jedidah i. 2Josiah in Bawipa hmai ah a hman niu in nung ai, a paa David bawnhnak hmuahhmuah khiah hlun ai, kiahhan lam le kekeh lamah lamtler lo i.
3Kumpibawipa Josiah in kumpibawi kum hlairiat tuan fangin, Meshullam fapa Azaliah fapa cazi Shaphan khiah Bawipa innah feh ruai ai, 4“Phungki upa Hilkiah hnenah kawi tulai, phungki pa in dawngkham kiltute in mite hnenai khawm ai Bawipa inn songah kawihhnak tangka khiah siar tu selai, 5Bawipa inn rol tu kuli te khawng tute khiah pe tu seh. Ciate in cia tangka khiah Bawipa inn roltu 6lettamate le innsatute le lungto tiang tute hnenah pe tu seh. Cen inn rol tuhin thing le lungto laihnak in khai hmang tu seh. 7Cen amahte in a tangka hmang dan khiah report kul lo i. Ziangmanti fangin amahte khiah mi rinsan tlak mite i.” ti in ruai i.
8Ciafangin phungki pa Hilkiah in cazi Shaphan hnenah, “Bawipa inn songah Upadi Dan Ca-uk tawk ing.” ti in rel i. Hilkiah in cia ca-uk khiah Shaphan hnenah pe ai ani khai cia ca-uk khiah siar i. 9Ciafangin cazi Shaphan khai kumpibawi pa hnen ah kawi ai, “Na hnenumte in Bawipa inn songai tawkhnak tangka khiah lang ai, Bawipa inn rol sah tu tuhte hnenah pe zo i.” ti in rel i. 10Ciafangin cazi Shaphan in kumpibawipa khiah, “Phungkipa Hilkiah in he ca-uk i pe i.” ti in hmuh i.
11Kumpibawipa in cia Upadi Dan Ca-uk songai siarhnak thu khiah za fangin, ani khai a thilthuam khiah zik i. 12Ciafangin kumpibawipa in phungki pa Hilkiah le Shaphan fapa Ahikam le Mikhaiah fapa Akbor le cazi Shaphan le kumpibawipa hnenum pakhat Asaiah te hnenah, 13“Feh tu i lai, he ca-uk songai nganhnak thu khiah kaimah ca le Judah mi veksen ca in Bawipa hnenah zawt tuu-ih. Kin paate in he ca-uk songai kin ca ai nganhnak bangin bawn lo manin kin lakah Bawipa rawhnak khiah a rauh ngai i.” ti in ruai i.
14Ciamanin phungki Hilkiah le Ahikam le Akbor le Shaphan le Asaih te khai Harhas fapa Tikvah fapa Shallum nu thilthuam kilkhawltu prawfet nupui Huldah hnenah kawi i. (Cia nuu khiah Jerusalem ai Quarter Panih hmun ah um i.) Amahte in cia nuu khiah rel i. 15Ciafangin cia nuu in amahte hnenah, “Israel Bawipa Pathian in, ‘I hnenah ning hlat tu pa khiah, 16“Bawipa in, ‘Judah kumpibawipa siarhnak ca-uk songai thu bangin, he ramah le he minungte vumah hnophnak hleng ruai tuh ing. 17Ziangmanti fangin amahte in i zam ai amahte kut thawn perhnak in thin i raw ruai tuhin, pathian dangte hmai ah rimhmui khiah tai i. Ciamanin i thinraw hnak khiah he ramah hleng tuhai hmit thill tuh lo i.’ ti in ti i.” tin rel tuu-ih.’ ti in i ruai i.” ti in rel i. 18Ikhalselai Bawipa hnenah zawt tuhin ning hlat tu Judah kumpibawi hnenah tu, hetih bangin rel tuu-ih: “Israel Bawipa Pathian in, ‘Na zahnak thu songah, 19Na thinlung khiah no ai, he ram le he mite khiah dapkhing in pai tuh sio in awrsia camhnak thu na za fangin, Bawipa hmai ah nangmah veve khiah thin niam ruai ai, na thilthuam khiah zik in kaphnak na za sah ing.” ti in Bawipa in ti i. 20“Ciamanin, na paa te bangin na thi fangin, thinnuam niu in na thi ruai tuh ing. Cen na mit in he ram ah i hleng ruai tuhhnak hnophnak khiah hmu tuh lo i si.” ti in ti i.’ ti in rel tuu-ih.” ti in sawn i. Ciamanin amahte in cia thu khiah kumpibawipa hnenah rel i.