1Israel fapa upaber Reuben fapate khiah (amah khiah a fa upaber inapui ai, amah in a paa khuahluan khiah rim ruai manin, a upa man a hmuifu ngah tuhhnak khiah Israel fapa Joseph fapate hnenah pe manin amahte pupa suahkehhnak thu khiah a upaber bangin khum lo i. 2Ikhalselai Judah in a unaute khiah lan ai a songin uktu khiah suak napui ai, fa upaber hmuifu tu Joseph in co i.) 3Israel fa upaber Reuben fapate khiah Hanok, Pallu, Hezron, le Kharmi i. 4Joel pafate khiah a fapa Shemaiah, a fapa Kok, a fapa Shimei, 5a fapa Mikah, a fapa Reaiah, a fapa Baal, 6a fapa Beerah i ai amah khiah Assyria kumpibawipa Tiklath-Pileser in thiar ai thawnghla i. Amah khiah Reuben te konghoitu i. 7Cen amahte pupa suahkehhnak khiah lai songah khum fangin, a unaute songkhat khiah: mi-uk Jeiel, le Zekhariah, le 8Nebo le Baal Meon tian ai Aroer ai umtu Joel fapa Shema fapa Azaz fapa Bela te i. 9Amahte sumhnam khiah Kilead ah zaai bial manin, anite in nisuah hmunlam ah Zufraitis Run tian banin nelrawn rongai ramah um i. 10Saul kumpibawi tuan teng in amahte in Hakri mite khiah tawng ai amahte khiah neh i. Ciafangin amahte in Kilead ramin nisuah hmunlam ramai Hakri te ram ah um i.
Kad fate
11Cen Kad fate khiah amahte hiangah Salkah tian in Bashan ramah um i. 12Bashan ah Joel khiah a mi-uk i. A sangtu khiah Shapham i. Cia sontu khiah Jaanai le Shaphat le 13a paate songai amahte unaute: Michael, Meshullum, Sheba, Jorai, Jachan, Zia, le Heber a veksenin pasarih te i. 14Hete khiah Buz fapa Jahdo fapa Jeshishai fapa Michael fapa Kilead fapa Jaroah fapa Huri fapa Abihail fate i. 15Kuni fapa Badiel fapa Ahi khiah amahte paate songkhat lakah a upaber i. 16Kad mite khiah Kilead ram le Bashan le a hiang ai khuate nau songah le Sharon ai hampa umhmun ramah um i. 17Hete khiah a veksenin Judah kumpibawipa Jotham le Israel kumpibawipa Jeroboam te kumpibawi uk tengin, amahte pupa suahkehhnak khiah lai songah khum i.
18Reuben le Kad le Manasseh fate a hrek te in lum le vangsau vong ai kahpuk kap thiam le raaltawng thiam le raaltawng tuhin feh thai raalkap minung thawng sawmlile thawng li le za sarih le sawmruk nai i. 19Amahte in Harkri, Jetur, Naphish le Nodab te khiah tawng i. 20Amahte in bawmhnak khiah ngah ai, amahte in raaltawng tengin Pathian hnenah ngen manin Hakri te le a bawmtute khiah amahte kut songah pe i. Amahte in Pathian khiah sang manin, Pathian in amahte sawngenhnak khiah ngai sah i. 21Ciafangin amahte in amahte kala-uk thawng sawmnga le tu thawng zanih le thawng sawmnga le lak thawng nih le minung thawng zakhat khiah pom sah i. 22Pathian in tawng sah manin, mi tam ngai khai thi i. Ciafangin amahte khiah thawngtla tuhin a raalte in thiar hlan tian anite khai cia ramah um i.
Manasseh hin hrekkhat fate pawl
23Ciamanin Manasseh hin hrekkhat fate khiah cia ramah um i. Amahte khiah Bashan ai panin Senir ihlahle Hermon Mual tihnak Baal Hermon tian in khaang i. 24Hete khiah amahte songkhat lakah mi upate i: Epher, Ishi, Eliel, Azriel, Jeremiah, Hodaviah, le Jahdiel te i. Amahte khiah raalpha le hmingthang ngai ai amahte inn songkhat lakah upate i.
25Amahte in a paate Pathian lakah sual ai amahte hleng hlanah Pathian ai hnawmcanhnak cia ram minungte ai milim zuk thawn phatemah tuan i. 26Ciamanin Israel Pathian in Assiria kumpibawi Tiklath-Pileser tihnak Assiria kumpibawi Pul thin khiah so ruai ai, Reuben te le Kad te le Manasseh hrekkhat te khiah pom ai tunnia tian in Halah le Habor le Hara le Kozan Run hiang ah phur i.