1Solomon in sawngen ben fangin, vancung in mai khiah tlok ai, mai thawn hluhnak le raithawihnakte khiah a vekin cia mai in kang berh i. Ciale cia temple khiah Bawipa thangphathnak thawn dim i. 2Bawipa inn khiah Bawipa thangphathnak thawn dim manin, phungkite in Bawipa inn songah lut thill lo i. 4Israel mi veksenin mai tlokhnak le temple vumah Bawipa thangphathnak hmu fangin, anite khai amahte hmai laipua ah bok ai Bawipa khiah bia ai, “Bawipa khiah a pha i. Ziangmanti fangin, a ngaihharhnak khiah kumzangza in taang ngio i.”ti in cuan i.
4Ciafangin kumpibawipa le Israel mite a veksen in Bawipa hnenah raithawi i. 5Solomon in Bawipa hnenah raithawi ai, kawlpaw cang thawng kul hluannih le tu thawng za le thawng kul hlu i. Ciamanin kumpibawi pa le Israel mite in Bawipa inn khiah puai bawt i. 6Phungkite in amahte natuan khiah per i. Levi mite in khai Bawipa cuanhnak tuhin Kumpibawi pa David ai bawn awnghnak Bawipa lasa fangai tumhnak thilrite kawmin, “Ziangmanti fangin a ngaihhar hnak khiah kumzangza in taang ngio i.” ti in David in Pathian cuan caang fangin cuan awng bangin Levi te in khai cuan ve i.
7Ciazolo ah Solomon in Bawipa inn hmai ai tualvan a laitaber khai Bawipa hnenah hlu ai, ciata ah mai thawn taihnak a hlu le remhnak a hlu ai a thau te khiah hlu i. Ziangmanti fangin, Bawipa hmai ai dar awlta khiah a cik ze manin mai thawn taihnak le rongmu a hlu le remhnak a hlu ai a thau a hlute khiah va lo i.
8Ciafangin Solomon le amah thawn ai umtu Israel mite khiah Hamath luthmun ai panin Izip Rawn tianai Israel mite kawmin ni sarih song puai bawn i. 9Ni riat nia fangin amahte khiah pumkhawm in Pathian bia ai, awlta khiah ni sarih song hlu ai ni sarih song puai bawn i. 10Hla sarih hnak ni kul hluanthum nia fangin Solomon in amahte khiah inn ah tlung ruai i. Anite khai Bawipa in a hnenum David le Solomon hnenah le a minung Israel mite ca ai a pha bawn manin, ang ngai in tlung tlaang i. 11Ciatih bangin Solomon in Bawipa inn le kumpibawipa inn khiah sa ben i. Bawipa inn song ah le amah inn song ah a bawn nuamhnak hmuah khiah a thin songai ruathnak bangin a khim liang in bawn ben i.
12Ciafangin Bawipa khiah Solomon hnenah zanlai in daak ai, amah hnenah, “Na sawngenhnak khiah na za sah zo ing. Cen he hmun khiah raithawi hmun tuhin kaimah rori in ril zo ing. 13Kaimah in van khiah dawng khaam manin ruahsi lo in um i tu seh, laipua khiah khokhuak in ei ruai i tu seh, i minungte hnenah pul tlung ruai fangin, 14 i hming thawn ai kohnak i minungte in thinniam in um in, i hmai khiah sii in sawngen in amahte sualhnak lampui in let leh lekhaw, amahte sawngenhnak khiah vancung in za sah tuhai, amahte sual khiah hlat khiah hlat sah tuhai, amahte ram khiah cak ruai tuh ing. 15He hmunai sawngenhnak khiah i mit in sik tuhai i naa in ngai tuh ing. 16He inn ah i hming khiah kumzangza um tuhin, he inn khiah ril zo ai cianghlim ruai zo ing. I mit le i thinlung khiah he inn ah a catlo in um tuh i. 17Cen nangmah khiah na paa David bangin i hmai ah vak in i ruaihnak bangin a vekin bawn in i thukhamte le i thukhanhnakte khiah hlun lesikhaw, 18Na paa David hnenah, ‘Israel ramah mi uktu tuhin pasal nai lo in um awng tuh lo i si.’ti in thu i kham bangin, na kumpibawi ukhnak khiah kho ruai tuh ing.
19Ikhalselai na hmai ai i dahhnak i upadi dan le i thukhamte khiah zam in hlun awl in a dang pathiante na khiah per in bia lesikhaw, 20Israel mite khiah amahte hnenah i pehnak ramin phai tuh ai i hming ca ai i cianghlim ruaihnak he inn khiah i mithmuh in sep tuh teu ing. Israel khiah mi phun hmuahhmuah zauhsuamhnak le thuthimhnak cang tuh i. 21Cen a hming thang ngai he inn khiah, a kheltu hmuah in hmu fangin ngaihsun ur in, ‘Zaimanin Bawipa in he ram le he inn khiah hetih bangin bawn i pa?’ti in zawt tuh i. 22Ciafangin amahte in, ‘Amahte in Izip ramin a paate suahtu Bawipa amahte Pathian khiah zam ai a dang pathiante khiah kuah ai bia ai amahte na khiah per sah manin Bawipa in he rimsuhnak khiah amahte vumah hleng ruai i.’ti in sawn tuh i.” ti in rel i.