1Jehoshaphat in thilri le upathnak khiah a tam rauh in nai i. Jehoshaphat in Ahab songkhat te nu manin ani khai Ahab thawn tangkhat i. 2Kum tampui khim fangin ani khai Samaria ah Ahab leng tuhin zu i. Ahab in Jehosphaphat le amah kawmai kawitu mite ca in tu le kawlpaw khiah a tamngai in ro le Ahab in Jehosphaphat khiah Ramoth Kilead ah hong tuhin so bel i. 3Ciamanin Israel kumpibawipa Ahab in Judah kumpibawipa Jehoshaphat hnen ah, “Ramoth Kilead tawng tuhin kai thawn feh nga sim?”ti in zawt i. Jehoshaphat in Israel kumpibawi pa hnenah, “Kaimah khiah nangmah bang ing. I minungte khiah na minung bang i. Raal na tawng bawm tuh i ing.”ti in sawn i.
4Ciafang Jehoshaphat in Israel kumpibawipa hnen ah, “Tunnia ah Bawipa hnenah thu zong tu.”ti in ti i. 5Ciafangin Israel kumpibawipa in prawfet pasal zali khiah hmun khat in khawm ai amahte hnenah, “Ramoth Kilead tawng tuh in feh ngang maw, feh hlah ing?”ti in zawt i. Ciamanin amahte in, “Feh tu. Ziangmanti fangin Bawipa in Ramoth Kilead khiah kumpibawipa kut songah na pe tuh i.” ti in sawn i.
6Ciafangin Jehoshaphat in, “Bawipa khiah zong tuhin, heta ah a dang Bawipa praofet um lo im?”ti in zawt i. 7Ciamanin Israel kumpibawipa in Jehoshaphat hnenah, “Pakhat um i lai. Amah khiah Imla fapa Mikaiah i ai amah hnenah Bawipa thu zawt thai i sing. Inapui amah khiah i daih lo i. Ziangmanti fangin i thu khiah a pha in rel awng lo ai a pha lo lo lek rel de i.”ti in ti i. Ciafangin Jehoshaphat in, “Kumpibawipa in ciatih bang thu rel zel ma seh.”ti in ti i. 8Ciafangin Israel kumpibawipa in raalbawi pakhat khiah ko ai, Imla fapa Mikaiah khiah a rang ngai in kawih tu.”ti in ruai i. 9Israel kumpibawipa le Judah kumpibawipa Jehoshaphat khai amahte kumpibawi thuam sil in kumpibawi tauhkheng vumah, Samaria kawl dawngkham lut hmun rongcil hmunah to kawm ai prawfet te a veksenin amahte hmai ah prawfet thu rel lianglo i. 10Ciafangin Khenaanah fapa Zekediah in amah ca in thir thawn ki bawn ai, “Bawipa in, ‘He ki thawn Siria mite khiah a thi sio hlanlo nemh tuh i si.’ti in ti i.”ti in rel i. 11Ciatih bangin prawfet veksenin rel ai, “Ramoth Kilead ah hong tulai, neh tuh i si. Ziangmanti fangin Bawipa in Ramoth Kilead khiah kumpibawipa kut songah ap tuh i.”ti in rel tlaang i.
12Ciafangin Mikaiah hnenah kawitu hnenum in Mikaiah hnenah, “Ngai tu. Prawfet a veksenin thinkhat in kumpibawipa khiah thaso i. Ciamanin na relhnak thu khai amahte relhnak bang i tu selai kumpibawipa khiah thaso ruai tuhin rel tu.”ti in ti i. 13Ciafangin Mikaiah in, “Bawipa nung bangin, Bawipa ai i rel ruaihnak khiah rel tuh ing.”ti in sawn i. 14Ciafangin Mikaiah khai kumpibawi hnen ah hleng i. Ciafangin kumpibawipa in amah hnen ah, “Mikaiah, Ramoth Kilead tawng tuhin feh ngang maw, feh hlah ing?”ti in zawt i. Mikaiah in amahte khiah, “Feh tulai, neh tuh i si. Ziangmanti fangin Bawipa in Ramoth Kilead khiah kumpibawipa kut songah ap tuh i.”ti in sawn i. 15Ciamanin kumpibawipa in, “Bawipa hming in thu hman lo ziang khai i rel tuh lo in vel zai thu na kham ruai ing?”ti in ti i. 16Ciafangin amah in, “Israel mite khiah a veksenin mual vumah khaltu nai lo tu te bangin peu sio hmu ing. Ciafangin Bawipa in, ‘He mite in a uktu nai lo i. Amahte inn tenah thinnuam niu in tlung tu seh.’ti in ti i.”ti in rel i. 17Ciafangin Israel kumpibawipa in Jehoshaphat hnenah, “Kai thawn senghnak lamah a pha i lo ai a sia lek i rel sah tu i, ti in na rel cia lo ing?”ti in ti i.
18Ciafangin Mikaiah in, “Ciamanin Bawipa thu khiah ngai tuu-ih. Bawipa khiah a tauhkheng vumah to ai a kiahhan lam le a kekeh lamah vancung mite a veksenin ding khiah hmu ing. 19Ciafangin Bawipa in, ‘Ramoth Kilead ah thi tuhin aisu in Ahab khiah so ngaih?’ti in ti i. Ciamanin pakhat in hetih bangin pongai a dang pakhat in khiatih bangin pong i. 20Ciafangin rauhla pakhat khiah hmai ah suak ai Bawipa hmai ah ding ai, ‘Kaimah in so tuh ing.’ti in ti i. Ciafangin Bawipa in amah hnenah, ‘Kontih in?’ti in zawt i. 21Ciamanin amahin, ‘Feh ngangkhaw, a prawfet veksen te kaa songah thudon rel tu rauhla cang tuh ing.’ti in ti i. Ciafangin Amah in, ‘Nang in so tulai so ben tuh i si. Feh tulai ciatih in bawn tu.’ti in ruai i.”ti in rel i. 22Ciamanin sik tu! Bawipa in he prawfet veksen te kaa songah thudon rel tu rauhla khiah dah ai Bawipa in na sunghnak tuhin sungphiat zo i.”ti in rel i.
23Ciafangin Khenaanah fapa Zekediah khai a nong ah kawi ai, Mikaiah biang khiah beng ai, “Bawipa hmunai rauhla khiah i hmunin na hmunah thu na rel tuhin a kon lamin kawi pa?”ti in zawt i. 24Ciafangin Micaiah in, “Cia nia ah inn khaan songta ah relh tuhin na tlum fangin hmu tuh i si.”ti in sawn i. 25Ciafangin Israel kumpibawipa in, “Mikaiah khiah pom tu i lai, khua bawipa Amon le kumpibawi fapa Joash hnenah kawih tuu-ih. 26Cen amahte hnenah, ‘Kumpibawipa in, “He pa khiah raalrem ai i let leh hlan lo thawng hla tu i lai, anharhnak rong le anharhnak ti lek pe tuu-ih.”ti in ti i.’ti in rel tuu-ih.”ti in ruai i. 27Ciafangin Mikaiah in, “Raal rem in tlung leh lesikhaw, Bawipa in i songin pong lo i.”ti in ti i. Ciafangin Mikaiah in mahte hnenah ah, “Ning mi veksenin, ralring tuu-ih.”ti in ti i.
Ahab thihnak thu
28Ciamanin Israel kumpibawipa le Judah kumpibawipa Jehoshaphat khai Ramoth Kilead ah feh i. 29Ciafangin Israel kumpibawi pa in Jehoshaphat hnenah, “I thuam thleng in mi dang bangin paal in raaltawng hmunah feh tuh ing. Ikhalselai nang tu na kumpibawi thuam sil tu hlen.”ti in ti i. Ciamanin Israel kumpibawipa khai a paal in raaltawng hmunah feh i. 30Siria kumpibawipa in a siphuhleng totu raalbawi te khiah, “Israel kumpibawi lek tawng tu i lai, a cik le a lian aisu khai tawng mah ih.”ti in rel i. 31Ciamanin, cia bawite in Jehoshaphat khiah hmu fangin, amahte in, “Thungai in amah khiah Israel kumpibawi i tuh i.”ti in ti i. Ciamanin amah tawng tuhin kulh fangin Jeshoshaphat khai au ai Bawipa in amah khiah bawm ai amahte khiah a hmunin tlan ruai sek i. 32Siphuh leng totu bawite in amah khiah Israel kumpibawi i lo i ti ling fangin, anite khai let leh ai amah khiah hnawh awl i. 33Ciafangin mi pakhat in a kahpuk khiah kap menma le Israel kumpibawi silhnak raal thilthuam kualak khiah kha i. Ciamanin kumpibawipa in a siphuh leng mawng tu pa hnenah, “Siphuh leng khiah her tulai raal tawng hmunin i suah tu. Ziangmanti fangin, i kha lio i.”ti in ruai i. 34Cia nia ah amahte in hehlaw ti in tawng dunai, kumpibawipa khiah Siria te hmunlam hoi in siphuh leng caal kong in to ruai ai zanlam nitla fangin thi i.