1Sanballat le Tobiah le Arab mi Keshem le kin raalte a veksen in kaimah in sen sa leh ben lio ai, a karlak ai kuate khai pit sio i ti in za fang in(ciateng in dawngkham ah dawngkhamte khiah tar napui lailo ai), 2Sanballat le Keshem in kaimah khiah i ko ai, “Ono zawllai ai khua pakhat khat ah tawkdun nga sing.” ti in i kuat i. Ikhalselai amahte in i rek nuam i. 3Ciamanin kai in khai nalangte khiah hlat ai, “Naper lian ngai per laitak ing. Ciamanin zu man lo ing. Zaimanin kaimah khiah ning hnenah zu lakin kin naperhnak khiah com kul tuh i?” ti in rel ruai ing. 4Ikhalselai amahte in ciatih bangin vel li i kuat ai kai in a bangpah in sawn ing. 5Ciafangin Sanballat in a hnenum khiah a vel ngahnak i hnenah a kut ah a hongsa lai thawn kawi ruai i. 6A lai khiah hetih bangin ngan i: Mi phun dangte lakah le Keshem in khai rel i. Nangmah le Judah mite khiah kumpibawipa kuthnia in suak tum i si. Ciamanin ciate relhnak thu bang fang tu, Jerusalem sen khiah sa leh ai, nangmah khiah kumpibawi cang tum i si. 7Cen nangmah thu khiah, ‘Judah ramah kumpibawi um i.’ ti in phuang tu tuhin prawfette khai dah zo i si. He thute khiah kumpibawipa hnenah than tuh i. Ciamanin kawi tulai thusawm kawm nga sing.” ti in ngan i. 8Ciafangin amah hnenah, “Na relhnak bangin zai khai bawn zel lo ing. Na thin song ai puahhnak ngawn i bang.” ti in lai rul ing. 9Ziangmanti fangin amahte in kin lau ruai tum i. Ciamanin amahte in, “Amahte kut khiah thanau tu selai, amahte in naper awl tuh i.” ti in ti i. Ciamanin Aw Pathian, i kut khiah tha i hat ruai tu.
10Ciahnua fangin kai khai Mehetabeel fapa Delaiah fapa Shemaiah inn ah kawi ing. Shemaiah khiah micul tu i. Ciafangin amah in, “Pathian inn temple songah tawkdun nga sing. Temple dawngkham khiah kham nga sing. Ziangmanti fangin amahte in na rek tum i. Zanlai in na rek tuhin kawi tuh i.”ti in i ti i. 11Ciafangin kai in, “Kai bang minung khiah tlan tur ing? Cen kaimah bang minung khiah amah nunhnak o tuhin temple ah tlum tu aisu um tuh i? Tlum tuh lo ing.”ti in sawn ing. 12Ciafang amah khiah Pathian in ruai lo ai, amah khiah Tobiah le Sanballat ai hlawhtham manin hetih bangin i thu rel i ti khiah ling ing. 13Kaimah khiah amahte in i lau ruai tuh le amhte ruaihnak bangin bawn fangin i sual tuh le ciafang in amahte in i siat tuhai zauh i suam tuh i. Ciamanin amahte in Shemaiah khiah hlawhtham i.
14I Pathian, Tobiah le Saballat te khiah amahte bawnhnak bangin lo hih tulaw. Cen i lau ruaitu prawfet nupang Noadiah le a dang prawfette khai lo hih tulaw.
15Ciamanin Jerusalem sen khiah Elul hla ni kul hluan nga nia ni sawmnga le ni nih fangin ben i. 16Kin raal hmuahhmuah le kin hiang cingkim ai mi phun dangte in cia sen khiah hmu fangin, amahte khiah thincawl ngai i. Ziangmanti fangin he naper khiah kin Pathian ai perhnak i ti khiah amahte in hmu i.
17Ciahlai ah Judah mi bawite in Tobiah hnenah lai tamngai kuat ai Tobiah in khai amahte khiah lai tam ngai rul i. 18Ziangmanti fangin Judah mi tamngai in Tobiah hnenah thukam i. Ziangmanti fangin Tobiah nu khiah Arah fapa Sekhaniah fenu i. Cen a fapa Jehohanan in Berekhiah fapa Meshullam fenu nu i. 19Cen amahte in Tobiah phathnak thu khai i rel i. Cen i thu khai Tobiah rel i. Tobiah in i lau thai in lai i kuat i.