1Shealtiel fapa Zerubbabel le Jeshua thawn hleng tu phungkite le Levi te khiah hete i: Seraiah, Jeremiah, Ezra, 2Amariah, Malluk, Hattush, 3Shekhaniah, Rehum, Meremoth, 4Iddo, Kinnethoi, Abijah, 5Mijamin, Maadiah, Bilkah, 6Shemaiah, Joiarib, Jedaiah, 7Sallu, Amok, Hilkiah le Jedaiah te i. He mite khiah Jeshau sanah phungkite le a unaute lakai a bawite i.
8Ciazolo ah Levi mite khiah Jeshua, Binnui, Kadmiel, Sherebiah, Judah le Mattaniah te i. Mattaniah in a unaute kawmin anhnak la sa pan tute i. 9Cen Bakbukiah le Unni le a unaute khai amahte na per kongin, amahte hmai ah ding i.
10Jeshua fa khiah Joiakim, Joiakim fa khiah Eliashib, Eliashib fa khiah Joiada 11Joiada fa khiah Jonathan, Jonathan fa khiah Jaddua i.
12Joiakim san lai in phungkite songkhat song ai bawite khiah, Seraiah songin Meraiah; Jeremiah songin Hananiah; 13Ezra songin Meshullam; Amariah songin Jehohanan; 14Melichu songin Jonathan; Shebaniah songin Joseph; 15Harim songin Adna; Meraioth songin Helkai; 16Iddo songin Zekhariah; Kinnethon songin Meshullam; 17Abijah songin Minjamin fapa Zikhri; Moadiah songin Piltai; 18Bilkah songin Shammua; Shemaiah songin Jehonathan; 19Joiarib songin Mattenai; Jedaih songin Uzzi; 20Sallai songin Kallai; Amok songin Eber; 21Hilkiah songin Hashabiah; le Jedaiah songin Nethaneal i.
22Persia kumpibawi Darius uk tengin Eliashib, Joiada, Johanan le Jaddua te san ai a paate songkhat songai Levi le phungki songai bawite khiah cazin songah khum i. 23Eliashib fapa Johanan san tian a paate songai bawite Levi fapate thu khiah pupa san thu ca-uk songah khum liang i. 24Levi te lakai bawite khiah Hashabiah, Sherebiah, le Kadmiel fapa Jeshua le Pathian mimung David ai ruaihnak bangin, amahte hmai ah ding ai a cuandun in anhnak lasatu a ulenaute pawl i. 25Mattaniah, Bakbukiah, Obadiah, Meshullam, Talmon le Akkub te khiah dawngkham kiltute i ai amahte in rongkhawi hmun khaan khiah dawngkham in kil i. 26He mite khiah Jozadak Jeshua fapa Joiakim san le uktu bawipa Nehemiah le cazi phungki Ezra san lai ah lo um awng i.
27Jerusalem renhnak sen ca in puai bawn fangin, Levi mite khiah Jerusalem ah kawi in cia puai khiah anghnak le anhnak thawn le lasahnak le darbu le guitar le congcingte kawmin sa tuhin Levi mite khiah amah te umhmun caangah sii i. 28Ciafangin lasatute fate khai Jerusalem hiang ai khua, Netophat te khua le 29Kilkal khua le Keba le Azmaveth ram in hmunkhat in Jerusalem ah khawm tlang i. Ziangmanti fangin lasatute in Jerusalem hiang cingkim ah khua niuniu sa tlang i. 30Ciafangin phungkite le Levi te in amahte veve le mizapui le dawngkhamte le sente khiah cianghlim ruai i.
31Ciamanin kai in Judah bawite khiah sen vumah kawih ai, anhnak lasatu tuh choir lian ngai panih khiah dah ing. Choir pakhat khiah Hnawmborh Dawngkham lamah sen vumin kiahhan lamah kawi ruai ing. 32Amahte khiah Hoshaiah le Judah bawi tlamhmat te le 33Azariah, Ezra, Meshullam, 34Judah, Benjamin, Shemaiah, Jeremiah, le 35phungki hrekkhatte fate Asaph fa Zakkur fa Mikhaiah fa Mattaniah fa Shemaiah fa Jonathan fapa Zekhariah te in thirhlung kawmin hlun i. 36Cen a unaute Shemaiah, Azarel, Milalai, Kilalai, Maai, Nathaneal, Judah le Hanani te in Pathian minung David ai lasahnak thilrite kawmin hlun i. Cen cazi pa Ezra in amahte hmai in feh i. 37Cirhti Dawngkham ah hleng fangin, anite khai David Khua hong hmun kaipum in sen vumah kaai ai David inn khiah khel ai nisuak hmunlam ai Ti Dawngkham ah kawi i.
38A khatta anhnak lasatu choir te khai a khatta lamin feh ai sen vumai mite kawmin kai khai anite hnua in hlun ing. Lungthu Inn saangpui tihnak hmun khiah khel ai a Kau Sen tian feh ai 39Efraim Dawngkham le a Hlun Dawngkham le Nga Dawngkham vum le Hananeal le Zakhat tihnak inn sang ngai khiah khel ai Tu Dawngkham tian feh ai Thawnginn Dawngkham hiang ah com i. 40Ciamanin anhnak lasatu choir panih te khai Pathian inn songah ding i. Ciatih bangin kai khai kaimah thawn umtu bawi tlam hmat le 41phungkite Eliakim, Maaseiah, Minjamin, Mikhaiah, Elioenai, Zekhariah le Hananiah khiah thirhlung kawmin le 42Maaseiah, Shemaiah, Eleazar, Uzzi, Jehohanan, Malkhijah, Elam le Ezer te kawmin um i ing. Lasatute khai choir uktu Jezrahiah kawmin a cawm ngai in lasa i. 43Cen cia nia ah amahte in a lian ngai in raithawi ai ang rauh i. Ziangmanti fangin amahte khiah Pathian in ang ruai rauh i. Nupuite le naupangte khai ang rauh ve i. Ciamanin Jerusalem ai amahte anghnak khiah a hla ngai in zak i.
44Ciafangin pasalte khiah rongkhawi hmun khaan kiltu tuhin le a hlu le rongthar le sephuhtaphuhte khawltu tuhin tavuan pe i. Khua hiang ai lo songin amahte in rongkhawl hmunah Dan upadi ai ruai hnak bangin phungkite le Levi mite ca in rong khiah kawih ruai i. Ziangmanti fangin Judah mite khiah napertu phungkite le Levi mite lakah ang ngai i. 45David le a fapa Solomon ai ruaihnak bangin lasatute le dawngkham kiltute in amahte Pathian na le amahte ciang ruaihnak na khiah per i. 46Ziangmanti fangin David le Asaph san ah lasatute uktute le cuanhnak late le Pathian anhnak late lo um awng i. 47Ciamanin Zerubbabel le Nehemiah sanah Israel mi veksenin lasatute le dawngkham kiltute ca in ni siarin rong khon de i. Amahte in a dang Levi mite ca in khai rong khon de ai Levi te in Aaron fate ca in a tumce in dah sah ve i.