1 A hman niu ai vak tu mifarah pa khiah
Pon sia pong tu le mivoi pa tah in pha sawn i.
2 Aisu khai fimhnak nai lo in um tuh pha lo i.
A rang in vak tute in sual i.
3 Voihnak in mi pa lampui khiah kawn ruai i.
A thinlung in Bawipa lakah cam i.
4 Milian te in rualpui tamngai nai i.
Ikhalselai mi farahte tu a rual te hmunin khan i.
5 Thudon tettikhan tu khiah cawh lo in um tuh lo i.
Cen thudon rel tu khai luat ngah tuh lo i.
6 Mi tamngai in bawi te zarto hnak khiah sii i.
Cen aisu in khai lehsawng sumtu te khiah rualpui ah can i.
7 Mifarah pa ulenaute in cia farah pa khiah hua i.
Zai zah hla ah a rualte in a hnenin tlan tuh i!
Amah in amahte khiah a ponka thawn hnawh
napui ai amahte in amah khiah hlum lio i.
8 Fimhnak ngah tute in amah veve khiah it i.
Ling thiamhnak nai te in a pha tawk tuh i.
9 Thudon tettikhan tu khiah cawh lo in um tuh lo i.
Cen thudon rel tu khai rall tuh lio i.
10 Mivoite in nunnuam rauh ai um tuh khiah kaih lo i.
Cen a hnenum in a bawite uk tuh khai kaih veng lo i.
11 Fimhnak in mi pa khiah thinraw fung ruai i.
Sualhnak khiah sik lo khiah amah ca ah thangphathnak i.
12 Kumpibawipa thinraw khiah chintit hukhnak bang i.
Ikhalselai a zarto hnak tu hampa vumai naidawh bang i.
13 A voi fapa khiah a paa hnawmcan tu i.
Cam thai hnelhno nupui khiah
ti zun thliahthlo thawn bang i.
14 Inn le thilrite khiah paa te hnenai hluphnak ro i.
Ikhalselai mifim nupui tu Bawipa hnenin i.
15 Thazawnghnak in aisu khai thimang in mitmu sung ruai i.
Naper lo in um zel te khiah rikaam tuh i.
16 Thukham hlun tute in a nunhnak ngah tuh i.
Ikhalselai a nunhnak zainam lo te khiah thi tuh i.
17 Mifarah te hnenah thil zawn tu in Bawipa hnenah zawn i.
Bawipa in amah a pehnak zah in rul leh tuh i.
18 A can um lai in na fapa khiah tiam tu.
Amah in kap manin zah mah.
19 Bing lio ai thinraw thai te khiah cawhkuan ngah tuh i.
Cawh lo in luat ruai lesikhaw, amah in bawn tuh lala i.
20 Mi thusawmhnak le mi thurelhnak khiah ngai tu.
Na tar fangin na fim ruai tuh i.
21 Mi pakhat in tumhnak tam ngai nai thai i.
Ikhalselai Bawipa sawmhnak thu lek khim tuh i.
22 Mi ninghio tuh khiah aisu hmuahhmuah in nai kul i.
Mifarah pa khiah thudon rel tu pa tah in pha sawn i.
23 Bawipa kihhnak in nunhnak lampui lam ah konghoi i.
Ciafangin cia pa in thinkhim in nung tuh ai
Amah vumah a pha lo hleng tuh lo i.
24 Thazawng pa in a kut khiah pakan
songah dah ai a kaa songah a kut khiah bar ben leh lo i.
25 Mi zauhsuamtute khiah vit tulai, mivoi te in ngai tuh i.
Ling thiamhnak nai te khiah tiam tulai
cia pa in fimhnak ling tuh i.
26 A paa rok sah tu le a nuu hnawt tu fapa
in zakthi kul le mi zauhsuamhnak hleng ruai i.
27 I fapa, tiamhnak khiah ngai awl tulai,
Fimhnak thu hnenin na vai tuh i.
28 A hmingsia tettikhan tu in thu hman khiah zainam lo i.
Misualte kaa in sualhnak khiah ei i.
29 Mi zauhsuamtute khiah cawh tuh i.
Mivoite zaangkhun khai vithnak tuar tuh i.