1 He khiah za tuu-ih. aw Jacob inn sang te.
Ningte khiah Israel hming ai kohnak te i si.
Judah fate songin suakhnak te i si.
Bawipa hming in cukcam ai
Israel te Pathian hming khiah rel i si.
Ikhalselai a hman le a dikcang in rel lo i si.
2 Ziangmanti fangin ningmah veve khiah
a cianghlim khua mite ti in ko i si.
Israel mite Pathian khiah hngai i si.
A hming khiah vancung mite Bawipa i.
3 He hlanlai ai thute khiah a ngom ai panin ning rel zo ing.
I kaa in suak zo ai, ning za ruai zo ing.
I rel bangin bawn vut ai khim sio i.
4 Ningte khiah mi ungtuang le
Ning hawng khiah thir thari thawn bang ai,
Ning cal khiah dar bang i ti i ling manin,
5A ngom ai panin ning rel zo ing.
A cang hlan ah ning than zo ing.
Cialo fangin ningte in,
‘I milim zuk ai bawnhnak i.
I zuk suaihnak le i erhnak zukte in
bawnhnak i.’ti tuh i si.
6 Ningte in zazo i si.
Ningte in hmu zo i si.
Rel tuh lo i sim?
Tunai panin thu thar ni za ruai ing.
Ning ling awng lohnak
thuthupte khai ning za ruai ing.
7 Ciate khiah a ngom ai panai bawnhnak i lo ai
tunai bawnhnak i.
Tunnia hlanah za awng lo i si.
Cialo fangin ningte in,
‘Ling awng zo i ing.’ti ngah thai i si
8 Ningte in za awng lo i si.
Ling khai ling awng lo i si.
He hlanlai ah ning bil khiah kua awng lo i.
Ziangmanti fangin hrokhrawl ngai in
bawn tuh khiah ning ling ing.
Ning nuu pum songai panin misual ti in ning ko i.
9 I hming ca manin, i thinraw sup tuh ing.
I cuanhnak ca manin, i thinraw khiah kham tuh ing.
Cialo fangin ning rek ngah mawh ngang.
10 Sik tuu-ih. Ning er zo ing.
Ikhalselai ngun bangin ning er lo ing.
Rimsuhnak mai songah ning cu zo ing.
11 Kaimah ca man, kaimah ca man,
he khiah bawn ing.
Kontih in i hming khiah hnawm ruai tuh ing?
I thangphathnak khiah aisu khai pe tuh lo ing.
12 Aw Jacob, i ngai tu.
I kohnak, Israel, i ngai tu.
Kaimah khiah amah ing.
A Hmasaber le a Hnuataber ing.
13 I kut in laivum a ham khiah sa i.
I kiahhan kut thawn vancungte khiah tar i.
Amahte khiah i ko fangin,
Hmunkhat in ding tlang i.
14 Ning veksen in khawm tuu i lai, i ngai tuu-ih.
Ning lakah aisu in he thute khiah rel pa?
Bawipa in amah khiah it i.
Amah in Bawipa daihhnak bangin Babylon khiah bawn tuh i.
Amah in Khaldean te khiah tawng tuh i.
15 Kaimah in rel zo ing.
Kaimah in amah khiah ko zo ing.
Kaimah in amah khiah kawih zo ing.
A perhnak khiah ben tuh sio i.
16 I nong ah kawi tuu i lai, ngai tuu-ih.
A ngom ai panin a thup in rel lo ing.
A ngom ai panin kaimah khiah khiata ah um ing.
Tunin Bawipa Pathian le
a Ciang Rauhla in i hlat i.
17 Israel mite a Cianghlim Pa,
Ning Luangtlan tu Bawipa in,
“Kaimah khiah Bawipa na Pathian ing.
Na phathnak khiah na cuk ing.
Na feh hmun tuhah kong na hoi ing.
18 Aw, i thukham khiah ngai ta i silai!
Runti bangin thin ning nuam tuh napui i.
Ning dikcanghnak khiah tihual bang tuh napui i.
19 Ning tesin fate khai runsiat zah tuh napui i.
Ning songai suakhnak ning fate khai
runsiat zah tuh napui i.
A hming khiah ii hmai in cem le
hnawm sah tuh napui lo i.
20 Babylon khua in suak tu.
Khaldean ram in tlan tu.
Lasa kong in tlan tu.
He thu khiah rel tu.
Laivum a tong tianin rel tu.
“Bawipa in a hnenum Jacob
khiah luangtlan zo i.”ti in rel tu.
21 Amahte khiah amah in nelrawn songin fehpui fangin,
tihaal lo i.
Amah in lungpui songin amahte ca in ti suak ruai i.
Amah in lungpui khai khan ai ti suak bial i.
22 “Misual te khiah thinnuuam thill lo i.”ti in Bawipa in ti i.