1 Ciazolo ah BAWIPA thu khiah i hnenah,
2 “Feh tulai, Jerusalem mite in za thai in,
‘BAWIPA in,
“Na naulai in na nunnem dan le monu bangin
hampalak in rong cing lo hmun ramah i hlun
awng fangin na ithnak khiah na hih sah ing.
3 Israel khiah BAWIPA hnenah a cianghlim awng rih i.
A rong thar a hmasaber i awng i.
A ei tu te khiah mawh tuhai,
Amahte vumah hnophnak hleng tuh i.” ti in
BAWIPA in rel i.’ ti in au tu.” ti in i ruai i.
4Aw Zakuk fate le Israel mite ning veksenin
BAWIPA thu khiah za tuu-ih.
5 BAWIPA in,
“Ning paate in i lakah zai mawhhnak tawk
manin, i hnenin a hla ngai ah tlan ai,
Milim zuk te khiah hlun ai,
Milim zuk biatute cang i?
6 Cen amahte in, ‘Izip ram ai kin suahtu,
Hampalak ah kong kin hoi tu,
Nelrawn le kua thuk umhmun ram song le
Ngaal keng ram le thihhnak hlaa umhmun ram song le
Aisu in khai tan awng lo, hluh awng lo
hmun ram songin kong kin hoitu BAWIPA
khiah akonah i?”ti in khai ti lo i.
7 Ram pha ngai songah a thai le a phathnak
ei tuhin ning kawih ing.
Ikhalselai cia ramah ning lut fangin
i ram khiah rim ruai ai, ningdul kul in can i si.
8 Phungkite in, “BAWIPA khiah akonah i?” ti in zawt lo i.
Dan upadi cuktute in i ling lo i.
Uktu bawite in khai i lakah sual i.
Prawfet te in Baal thu sawn rel i.
A miat um lo thilte sawn hlun i.
9 “Ciamanin mawh ning hluk tuh ing.”ti in BAWIPA in ti i.
“Ning fate ai fate tianin mawhhluk tuh ing.
10 Kittim ram khiah kaan tuu i lai, sik tuu-ih.
Kedar ramah hlat tuu i lai,
a kungniu in cul tuu-ih.
He bang um awng na maw ti in sik tuu-ih.
11 Mi phun dangte in amahte pathian khiah
pathian inapui lo ai, a pathian khiah thleng awm?
Ikhalselai i minungte in amahte
Thangphathnak khiah,
a miat um lo thil thawn thleng i.
12 Aw vancung mite, he khiah ngaihsun ning
ur rauh tu seh. Ning lau rauh tu seh.
Aisu umlo hmunah ning cang tu seh.”
ti in BAWIPA in ti i.
13 “Ziangmanti fangin i minungte in sual panih bawn i.
A nung ti um hmun tikhur kaimah khiah i zam i.
Cen ti zun thai a khoi tikua khiah co i.
14 Israel khiah mi hnenum im?
Innsang ai tehnak cengfa im?
Zaimanin amah khiah rok sah i?
15 Chintitte in amah khiah huk ai ca i.
Amah ram khiah a lovang cang ruai i.
A khuate khiah mai in kang ai
aisu in khai hluh lo i.
16 Noph le Tahanhes mite in khai,
na lu ai lukhuk khiah na khoi sah i.
17 Lamlak ah BAWIPA in kong ning hoi fangin,
ningmah in BAWIPA ning Pathian khiah zam
manin, he bang khiah ning vumah hleng ruai i lo i sim?
18 Tunin zaimanin Sihor ai ti ding tuhin
Izip lampui ah feh i si?
Ihlahle zaimanin Run pui ti ding tuhin
Assiria lampui ah feh i si?
19 Ning sualhnak in ning cawh tuh i.
Ning sang thanau hnakin ning tiam tuh i.
Ciamanin ningte in BAWIPA ning Pathian
khiah zam in ning songah i kihhnak um lo
khiah, zaitluk in phalo rauh i ti khiah ling in
hmu tuu-ih.” ti in BAWIPA in ti i.
20 “Hlan lai ah ning thilrit khiah ning hawk sahai,
ning penhnak ri khiah ning cat sah ing.
Ningte in, ‘Sual tuh lo ing.’ ti in ti ai,
Tlang saang vum caang le thing hing hnia
caang ah taal in phatemah tuan i si.
21 Ikhalselai a cii phaber capit kung pha
bangin ning cing awng ing.
Ikhalselai akontih in i hmai in let ai, a hnawm
beraw ram dang te capit kung ning cang lio i pa?
22 Ziangmanti fangin sapia tamngai thawn takhlu khal isikhaw,
Ning sualhnak khiah i hmai ah kharawh in
um tuh ngio i.” ti in BAWIPA in rel i.
23 “Akontih in, ‘I rim lo i. Baalte khiah hlun lo ing.’ ti thill i si?
Rawn zawllai ai na lampui khiah sik tu.
Na bawn awnghnak khiah ling tu.
Nangmah khiah nuamhmun cang ah
dawp hnelhno kala-uk laa bang i si.
24 Nangmah khiah a hur fangin hlivua
khiah hnim tu hampalak ai lak bang i si.
Aisu in cia lak khiah neh ben tuh i?
Cia lak nu sii tute in cawl kul lo i.
A hla khim fangin cia lak khiah tawk tuh i.
25 Na ke lo lek in vak mah.
Cen na daang khai tihaal in ro ruai mah.
Ikhalselai nangmah in, ‘Rel man um lo i.
Ziangmanti fangin ram dang mite i daih i.
Amahte hnua khiah hlun tuh ing.’ti in rel i si.
26 Ruko pa khiah tawk lio fangin zakthi bangin,
Israel mite khai zakthi i.
Amahte le a kumpibawite le a bawite le
amahte phungkite le amahte prawfette in,
27 Thingkung hnenah,’Nangmah khiah i pa i si.’ ti in ti i.
Lungto hnenah, ‘Na songin i te i.’ti in ti i si.
Ziangmanti fangin amahte in a hmailam i lo
ai a zaang sawn i tak i.
Ikhalselai amahte khiah harsa fangin,
‘Tho in kin o tu.’ti tuh i.
28 Ikhalselai ningmah ca tuhin ning bawnhnak
ning pathiante khiah akonah i hang?
Amahte khiah tho tu seh.
Rim ning su fangin ning bawm thill na maw.
Ziangmanti fangin ning khuate zah in,
pathian khai nai i si, aw Judah mite.
29 “Zaimanin i hau i si?
I lakah ning veksen in ning sual zo i.”ti in BAWIPA in ti i.
30 “Ning fate ning tiam sah ai a lovang i.
Amahte in tiamhnak ngai lo i.
Ning vangsau in ning prawfette khiah
a hnawmcan thai chintit bangin dawp zo i.
31 “Aw he san minungte,
BAWIPA thu khiah ruat tuu-ih.
Kaimah khiah Israel hnenah hampalak bang ing?
Kaimah khiah khuathim ram bang ing?
Zaimanin i minungte in, ‘Kin nuam bangin vak thai i ing.
Na hnenah kawi tuh lo i hang ing’ ti in rel i?
32 Fenu niu in a khi te khiah hai thill im?
Monu in a thuam khiah hai thill im?
Ikhalselai i minung te in ni a siar cawk lo in i hai i.
33 Mi ai tlak thai in zaiman in par hnelhno i si?
Ciamanin misual nupuite khai ning dan zirh hnelhno i si.
34 Ning hnik vumah khai mawh nai lo mi farahte thi khiah um i.
A thupniu ai sii hnelhno in tawk hnak i lo i.
Ikhalselai hete vumah a lar ngai in um i.
35 Ikhalselai ningte in, ‘I mawh lo i. I lakah
thinraw tuh lo i.’ ti in ti i si.
Ikhalselai mawh ning sii tuh ing.
Ziangmanti fangin, ningte in, ‘I sual lo i.’ ti i si.
36 Ning nundan thleng tuhin zaimanin he zah
vak hnelhno i si?
Assiria lakah zak ning thi bangin Izip
lakah khai zak ning thi tuh i.
37 Ning lu vumah ning kut dah kongin
amah hnenin suak tuh i si.
Ziangmanti fangin BAWIPA in ning
rinsanhnak mite khiah ning el sah zo i.
Amahte in ning bawm ben tuh lo i.