1 “Amahte in, ‘Mi pakhat in a nu khiah ma selai,
Cia nuu khai a hnenin tlan in mi dang pa selai,
A pa hmasa khiah a hnenah let leh tur im?’ ti in ti i.
Cia ram khiah rim rauh tuh lo im?
Ikhalselai ningte in mi tamngai thawn phatemah bawn i si.
Inapui ai i hnenah let leh i si.”ti in BAWIPA in ti i.
2 “Zai khai um lo hmun a saang hmun khiah
hlir in sik tu cuk ih.
Mi thawn ning it lo hmun akonah um i?
Nelrawn lakai umtu Arab mi bangin
lam hiang ah amahte iang in um i si.
Phatemah ning tuanhnak in le
ning sualhnak in ning ram khiah rim ruai i si.
3 Ciamanin ruah si lo in kham i.
A hnuata ruah khai si lo i.
Ning calpang ah phatemah hmel nai i si.
Zak ning thi lo i.
4 Tunai panin i hnenah,
‘I paa, i naulai pahin i konghoitu i lo i sim?
5 Amah khiah a kumzangza in thinraw ngai im?
A tong tian in raw ni ngai im?’ti in kap tuh lo i sim?
Ciatih in pong napui ai ning ben tawp in
a pha lo khiah bawn i si.”tin rel i.
6BAWIPA in kumpibawipa Josiah sanah, “Sang thanau mi Israel ai bawnhnak khiah hmu aw sim? Amah in mual saang vum caang ah kaai ai, thing hing hnia caangah phatemah tuan i. 7Ciafangin, amah in hete hmuah bawn ben fangin, kai in, ‘I hnenah let leh tu.’ti in ko ing. Ikhalselai amah in let nuam lo i. Ciafangin a hlotlau a farnu Judah in hmu i. 8Sang thanau Israel in nulepa sualhhnak bawn manin a mahnak lai khiah pe ing. Ikhalselai a hlotlau a farnu Judah in lau lo ai, phatemah tuan ve i. 9Ciatih in amah Judah in tuan manin, Judah in a ram khiah rim ruai ai lungto le thing thawn phatemah bawn i. 10He hmuah per napui ai, a hlotlau farnu Judah in i hnenah a thin ngaingai in sir lo ai a sir khel in um i.”ti in BAWIPA in ti i.
11Ciafangin BAWIPA in i hnenah, “Sang thanau Israel in amah veve khiah a hlotlau Judah tahin dikcang sawn khiah lar ruai i. 12Feh tulai he thu khiah saklamah rel tu:
“‘Let leh tu, sang thanau Israel.’ti in BAWIPA in ti i.
‘I rawhnak khiah na vumah hleng ruai tuh lo ing.
Ziangmanti fangin kaimah khiah mi ngaihhar thai ing.
A zomzet in thin i raw tuh lo i.’ti in BAWIPA in ti i.
13 BAWIPA na Pathian lakah sual zo i si.
Cen ram dang mite pathian khiah thing
hing hnia caang ah bia zo i si.
I aw khiah i ngai lo i si.
He na sualhnak khiah sir tu,’”
ti in BAWIPA in ti i.
14BAWIPA in, “Sang thanau mite, let leh tuu-ih. Ziangmanti fangin kaimah in ning hoi zo ing. Khua khat songin pakhat, innkua khat songin panih in ning lang tuhai Zion ah ning kawih tuh ing. 15Ciafangin i daihhnak bang tukhaltute ning pe tuhai amahte in fimhnak le linghnak ning cuk tuh i. 16Ciafangin, ningte khiah cia ramah ning zaai in ning khaang fangin, amahte in, ‘BAWIPA thawn lungkhim dunhnak thukham thingkuang.’ti in rel tuh lo i hang. Amahte in ruat tuh lo i; hih khai hih tuh lo i; leng khai leng tuh lo i; bawn khai bawn tuh lo i. 17Ciafangin Jerusalem khiah BAWIPA kumpibawi Tauhkheng ti in ko tuhai, mi phun hmuahhmuah in ciata ah BAWIPA hming in Jerusalem ah khawm tuh i. Ciafangin amahte thinruh le sualhnak thinlung thawn vak tuh nawn lo i. 18Cia nia ah Judah mi khiah Israel mite thawn vak khat tuhai, amahte khiah hmunkhat in saklam ramin suak tuhai, ning paate hnenah roco tuhai i pehnak ramah kawi tuh i.”ti in BAWIPA in rel i.
19 “Ikhalselai kai in,
‘Ningte khiah zaitluk in fapate bangin ning dah in
Mi ram dang lakah a mawi ber ram khiah
roco tuhin ning pe i nuam napui i.
Ning te in kaimah khiah ‘I Pa’ ti in ko in
i hlun awl lo in um tuh ning vuah ing.
20 Ikhalselai nupui in a pa hnenin hlotlau bangin,
Ningte khai i hnenin hlotlau i si,
aw Israel mite.”ti in BAWIPA in ti i.
21 Zai um lo hmun a saang hmunin,
Israel mite kaphnak aw le sawngenhnak aw khiah zak i.
Ziangmanti fangin amahte in a sual in um ai,
BAWIPA amahte Pathian khiah hai manin i.
22 “Let leh tuu-ih, sang thanau mite.
Ning sang thanau hnak khiah ning bawl sah ngang.”
“Na hnenah kawi peu i ing.
Ziangmanti fangin nangmah khiah
BAWIPA kin Pathian i si.
23 Tlaangte le mual caangcaang hmunin
ohnak ngah tuh umm khiah thu lovang i.
BAWIPA kin Pathian hnen lekah Israel ohnak um i.
24 Ziangmanti fangin kin naupang lai pah in,
zakthi kul milim in kin pa te naihhnak,
tu le me le kawlpawte le, a fapa le a
fenute khiah kin ei sah sek i.
25 Zakthi kongin mitmu ai
Zakthi pon thawn kin khuk i.
Ziangmanti fangin kin naupang lai ai panin
tuntian kinmah le kin paate in BAWIPA
kin Pathian lakah sual ai,
BAWIPA kin Pathian aw khiah ngai lo i sing.”