1BAWIPA hnenin Jeremiah hnenah hleng hnak thu. 2“Tho tulai bel bawntu pa inn ah kawi tulai ciata ah i thu na za ruai tuhing.” ti in ti i. 3Ciafangin kai khai bel bawntu pa inn ah kawi ai, amah in bel bawn i.
4Ciafangin a kut thawn a bel bawnhnak laisawr khiah mam lo manin, ani in cia laisawr khiah amah lungkhimhnak bangin bel a dang pakhat ah bawn leh thio i.
5Ciafangin BAWIPA thu khiah i hnenah, 6“Aw Israel mite, ningte khiah he bel bawntu pa ai bawn bangin ning bawn thill lo ing? Aw Israel mite, laisawr khiah bel bawntu pa kut songah um bangin ning khai i kut songah um i si. 7Mi phun khat le kumpibawi ram pakhat khiah phai tuhai, duk tuhai hnawm tuh ing, ti in kaimah in i rel sawng fangin, 8cia mite in amahte sualhnak khiah sir lekhaw, amahte vumah i hleng ruai tuhhnak a pha lo khiah hleng awl ruai leh tuh ing. 9Mi phun khat le kumpibawi ram pakhat khiah bir in kho ruai tuh ing ti in i rel sawng fangin, 10amahte in i hmai ah a pha lo khiah bawn in i aw khiah ngai hlahlekhaw, amahte phathnak tuh ai bawn tuh ing i tihnak khiah bawn awl leh tuh ing.
11Ciamanin Judah mite le Jerusalem ai um tu mite hnenah, ‘BAWIPA in, “A pha lo khiah ning ca in tum ai ruat ing. Ciamanin aisu hmuah in ning nun sualhnak khiah sir in ning nundan le ning perhnak khiah pha ruai tuu-ih.” ti in rel tu.’ ti in i ruai i. 12Ciafangin amahte in, “He khiah thu lovang i. Ciamanin kinmah tumhnak le kinmah thin songin ruat sualhnak bang in bawn tuh i ing.” ti in ti i.
13 Ciamanin , ‘BAWIPA in,
“He bang khiah za awng na maw ti in Zental mite khiah zawt tu cuk ih?
Israel fenu niu in a pha lo bawn i.
14 Lebanon lung lakai suakhnak vurti khiah pai awng awm?
A dang ai luang hnak tidap tang hlum thill awm?
15 I minungte in i hai lio manin,
Amahte in zaitlak lo milim te hmai ah rimhmui tai i.
Amahte veve khiah amahte lamlak ah bah ruai i.
Hlanlai ai khung khiah zam in
lampui ah vak lo in lamkhung niu ah vak i.
16 Amahte ram khiah zaikhai um lo in dah tuh ai
a catlo in zauhsuam hnak ram cang tuh i.
Cia ramai khel tu hmuahhmuah ngaihsun ur in
a lu khiah leuh tuh i.
17 Amahte raal hmai ah nisuak lamai
hlivua thawn peu ruai tuh ing.
Amahte rimsuhnak nia ah i hmai khiah
hmuh lo in i hnua lam sawn hmuh tuh ing.
18 Ciafangin amahte in, “Jeremiah khiah tawng tuh pai nga sing. Ziangmanti fangin phungkite ai cukhnak dan upadi le mifim te ai relhnak thu le prawfet te relhnak thu khiah pai ma seh. Amah khiah kin kaa in tawng nga singkhaw a thu ngai sah tuh lo i sing.” ti in rel i.
19 Aw BAWIPA, i ngai tu.
I tawngtu te relhnak thu khiah ngai tu.
20 A pha khiah a pha lo thawn rul tuh im?
Ziangmanti fangin amahte in i rek tuhin kua co zo i.
Amahte hnenah a pha rel tuhin le
Amahte hnenin na thin raw khiah tlan ruai
tuhin Na hmai ah ding khiah hih tulaw.
21 Ciamanin amahte fate vumah rian tlung ruai tu.
Amahte thi khiah vangsau thawn luang ruai tu.
Amahte nu khiah hmaitong cang tu seh.
Amahte fate khiah lang sah tu sek.
Amahte pasalpui te khiah thi tu sio seh.
A tlangvalte khiah raaltawng hmunah
vangsau in rek tu sio seh.
22 Nangmah in amahte taihtu tuh kawih vut fangin
Amahte inn songin kaphnak aw khiah dak tu seh.
Ziangmanti fangin i rek tuhin amahte in kua co zo i.
I ke awk tuhin thang tauh i.
23 Ikhalselai, BAWIPA, amahte in i rek tuh ai
a sawmhnak khiah ling sah i si.
Amahte sualhnak ca in zaikhai pe sah mah.
Amahte sualhnak khiah na hmai in phiat sah mah.
Ikhalselai amahte khiah hnawmcan tu berh.
Na thinraw teng in ciatih bangin amahte khiah bawn tu.