1 Zaitluk in sui khiah tleu nawn lo i.
Zaitluk in a phaber sui khiah hnawm lio i.
Temple ai lungtote khiah lampui cang ah piak sio i.
2 Zion fate khiah a phaber sui bangin, mankhung i.
Zaitluk in bel bawntu pa kut ai laibel
bangin mite in amahte khiah hmu i.
3 Mahlengte rinin a fate hnawitul tuhin
a hnawi khiah pe i.
Ikhalselai i minungte khiah hampalak ai
ostrich bangin ninghiohnak nai lo i.
4 Nausen lei khiah tihaal ze in
a kaa songah bek meng i.
Naupangte in rong ngen ai
aisu in khai amahte khiah rong khan lo i.
5 Rongur ei awngtu te khai
lam lakah zai ei tuh nai lo in um i.
Pon num sil awng tute khai
vutkuang vumah tal menma i hang.
6 I minungte sualhnak manin cawhkuan khiah
cammalak in hnawm lio hnak
Sodom te sualhnak tahin rauh sawn i.
A bawmtu tuh aisu khai um lo i.
7 A bawite khiah vur tah in tleu sawn ai
Cawhnawi tahin ngo sawn i.
Amahte pum khiah rubi hnak in san sawn i.
Amahte hmel khiah safai-a lungto mankhung bang i.
8 Tuntu amahte hmuihmel khiah
belmang tah in hang sawn i.
Lam lakah aisu in khai amahte khiah ling lo i.
Amahte vun khiah amahte ruh ah bek meng i.
Thing bang in ro keng i.
9 Vangsau ai rekhnak tuartu te khiah,
rikam ai thi tute tahin pha sawn i.
Ziangmanti fangin lo ai thingthai ei tuh
um lo manin amahte khiah voi berh i.
10 Mi ngaihhar thai nupuite in
amahte fate rori khiah suang lio i.
I minungte hnawmcan teng fangin,
a fate khiah amahte ei tuh rong ah cang lio i.
11 BAWIPA in a thinraw hnak bangin khim ruai i.
A rauh ngai ai a thinraw hnak khiah bung zo i hang.
Amah in Zion ah mai sem ai
Cia mai in Zion ham khiah kang sek i.
12 A raalte le a tawngtu te in Jerusalem
kawldawngkham songah lut ben tuh khiah
Laivum ai kumpibawite le laivum ai
umtu mi hmuahhmuah in sang tuh lo i.
13 Cia khiah a prawfet te sualhnak le
a phungki te mawh hnak man in i.
Amahte in amahte songai mi dikcangte
thi khiah luang ruai manin i.
14 Amahte khiah lampui lakah khuahmu lo in vak i.
Amahte veve khiah thi thawn riim ruai i.
Ciamanin amahte khiah aisu in khai
a thilthuam te khiah tok sah nuam lo i.
15 Mite in amahte hnenah,
“Tlan tuu-ih, mi riimte!
Tlan tuu-ih, tlan tuu-ih.
Kin khing mah ih!” ti in au i.
16 BAWIPA in amahte khiah
nuamhmun caang ah tlan ruai sio i.
Amah in amahte khiah zainam tau lo i.
Mite in phungki te khiah zul lo i.
Mi upate khai hmaisong lo i.
17 Kin mit khai kin hnawm berh i.
Kin bawm tu tuh khiah
a lovang in hlir hnelhno i ing.
Kin hlir kongin, kin o ben tuh lo
mi phunte khiah hmu i ing.
18 Amahte in kin keniah khiah kin kan manin
Kin lampui ah vak ngam lo i ing.
Kin bo cu khiah nong i hang.
Kin bo nia khiah khim i hang.
Kin bo nia khiah hleng i hang.
19 Kin hnawhtu te khiah
van ai mu tah in rang sawn i.
Amahte in mual vumah kin hnawh i.
Nelrawn songah kin bawh i.
20 Kin hnar ai kin haihawh bang
BAWIPA ai rilhnak pa khiah,
amahte thang in awk lio i.
Amah khiah rinsan in mi ram dangte
lakah um tuh vuah cop i ing.
21 Uz ramai umtu, aw Edom fenu,
Hiam ngai in ang tu.
Khuat khai na khawn tuh ve ai
Nangmah khiah zu na kham tuh ai,
kawngkolh in na haih tuh i.
22 Aw Zion Fenu, na cawhkuan khiah
bo tuh i hang.
Ram dangah thawngtla tuhin
na kuat tuh lo i hang.
Aw Edom fenu, na mawhhnak khiah
na cawh tuh i.
Na sualhnak khiah na phuang sah tuh i.