1 Aw BAWIPA, kin vumah hlenghnak khiah
kin hih sah tu.
Kin zauhsuam hnak khiah sik sah in kin hmu sah tu.
2 Kin ro khiah ram dang minungte hnenah ap zo sek i.
Kin innte khiah ram dang mite hnenah pe zo sek i.
3 Kinte khiah nuu le paa nai lo fate le
a vaizel fate kin cang sek i.
Kin nuute khiah hmaitong bang i.
4 Kin dinghnak ti khiah lai i ing.
Kin thingtum te khiah a man pe kul i ing.
5 Amahte in kin hnua niu in kin hnawh i.
Naper ai com khai man lo i ing.
6 Rong kin kham tuhin, Izip mite le
Assiria mite kuthnia ah lut i ing.
7 Kin paate in sual manin thi zo sio i.
Ikhalselai kinte in amahte sualhnak khiah tuar i ing.
8 Hnenumte in kin uk ai,
Amahte kut songin kin luat ruai tu tuh
pakhat khai um lo i.
9 Nelrawn lakai vangsau manin,
kin nunhnak lau kongin rong ngah i ing.
10 Rikaam in kin vun khai lungthu bangin kin sa i.
11 Zion ai nupangte khiah amahte in sualpui i.
Judah khua ai fenute khai amahte in sualpui i.
12 Bawite khiah amahte kut in tar ai,
Patar te khiah zul bul lo i.
13 Tlangvalte khiah lungrial hmunah naper i.
Naupangte khiah thingtum phur in tlu hnelhno i.
14 Patar te khiah kawldawngkham ah khawm awl i.
Tlangval te in khai lasa awl i.
15 Kin thin songah anghnak um nawn lo i.
Kin tlanglam khai lungsia hnak ah cang i.
16 Kin lu vumai kin lukhuk khai tlok lio i.
Kin sual manin kin vumah rimsuhnak hleng i.
17 Ciamanin kin thinlung khai zul lio i.
Hete manin kin mit khai malria in um i.
18 Ziangmanti fangin Zion Mual ah aisu khai um lo ai,
Mahlengte lek vak hnelhno i.
19 Aw BAWIPA, nangmah khiah kumzangza in um i si.
Na kumpibawi tauhkheng khiah
san khat hnua san khat raai i.
20 Zaimanin kumzangza in kin hai i si?
Zaicam tian kin zam tuh i si?
21 Aw BAWIPA, na hnenah kin let ruai leh tulai,
Nun kin nuam leh tuh i.
Hlanlai ai bangin kin ni te thar ruai leh tu.
22 Nangmah in kin hnawl lio ai,
Kin lakah thin na raw rauh i.
(March 22,1999/02/27/2000@6:36P/01/04/2017;1:23PM)