1Ciafangin BAWIPA thu khiah i hnenah hleng i. 2BAWIPA in, “Mi fapa, Israel ramai prawfet thurel tu prawfette thu khiah hetih in rel tu. Amahte thin song ai ruathnak bang menma ai prawfet thurel tu te, ‘BAWIPA thu khiah ngai tuu-ih.’ ti in rel tu.”ti in i ruai i. 3BAWIPA Pathian in, “Amahte in zai khai hmu napui lo ai amahte ruathnak hlun menma tu a voi prawfette hnenah rimsuhnak hleng tu seh. 4Aw Israel, ning prawfette khiah nelrawn songai mehlengte bang i. 5BAWIPA niakhua ah raaltawng hnak hleng fangin Israel mite khiah raaltawng ben thai in, khua renhnak khan ai a kuate khiah pit ruai tuhin kawi lo i si. 6Amahte ai hmuhnak khiah a lovang i ai, amahte in prawfet thurelhnak, ‘BAWIPA in khia tihin rel i.’ ti a relhnak khiah thudon i. Ikhalselai amahte khiah BAWIPA in feh ruai lo i. Ikhalselai amahte relhnak thu bang in khim tuhin umm cop i. 7Ningte in a lovang pui hmu lo i sim? Cen thudon pui in prawfet thu khiah rel lo i sim? Ning in, ‘BAWIPA in rel i.’ti in rel i si. Ikhalselai kai in rel lo ing.”ti in ti i.
8Ciamanin BAWIPA Pathian in, “Ningte in thu lovang pui khiah rel ai thudon khiah hmu manin, ning lakah thin i raw i.”ti in BAWIPA Pathian in rel i. 9A lovang hmu tu le prawfet thudon reltu prawfet te khiah i kut thawn tawng tuh ing. Amahte khiah i minung te pumkhawm hmunah tel tuh lo i. Israel mite hming khumhnak ca-uk songah khai tel tuh lo i. Cen Israel ramah khai lut tuh lo i. Ciafangin ningte in kaimah khiah BAWIPA Pathian i, ti in ling tuh i si. 10Amahte in i minungte hnenah raalremhnak um napui lo ai ‘Raalrem tuh i.’ti in zawl ai a innte khiah zai fai lo bangkhang thawn ren ai simat manin, 11ciatih ai simat tu te hnenah, cia bangkhang khiah sawn tuh i ti in rel tu. Ruah sia horsia zu tuhai, rial lian ngaingai tla tuh i. Khuahu lian ngai in cia inn khiah seu tuh i. 12Cia bangkhangte khiah sawn fangin, ningte hnenah, ‘Ning simat hnak tu akonah i hang? ti in ning ti tuh lo im? 13Ciamanin BAWIPA Pathian in, “Thin i raw manin khuahu lian ngai khiah hleng ruai tuh ing. Thin i raw manin ruah sia hor sia zu ruai tuh ing. Cia bangkhang hnawm ruai tuhin rial lian ngaingai tla ruai tuh ing. 14Ciamanin si ning mathnak bangkhangte khiah ning ek sah tuhai laipua ah tlok ruai tuh ing. Ciafangin inn ham te khiah zai in khai khuk tuh lo i. Cia bangkhang khiah tlu fangin ningte khai a songah ning rall tuh ve i. Ciafangin ningte in kaimah khiah BAWIPA i ti in ling tuh i si. 15Ciatih bangin i thinrawhnak khiah bangkhang le simat tu te vumah hleng ruai tuh ing. Cen ningte hnenah, ‘Bangkhang le a vumah simat tute khiah um nawn lo i hang.’ti in rel tuh ing. 16Cia mite khiah raalremhnak um napui lo ai Jerusalem ca in raalremhnak hmu sah tu Israel prawfette i.”ti in BAWIPA Pathian in ti i.
17“Cen, mi fapa, amahte ruathnak bangai prawfet thu rel tu na minungte fenute khiah sik tu. Amahte hnenah prawfet thu khiah he tih in rel tu. 18Amahte hnenah, ‘BAWIPA Pathian in, “Mite zawl tuhin amahte angki ban ah mizawlhnak pon khui ai mi te lu ah velh tuhin pon niu a saulam a phun phun in bawntu nupuite hnenah rimsuhnak hleng tu seh. I minungte khiah zawl sah in ningmah veve tu luat ruai tum i sim? 19Kawlkawn kut dim le rong val a tlawm niu ca in i minung te lakah i hming khiah i siat tuh i sim? A thi tuh lo mite khiah rek ai a nung tuh lo mite khiah nung ruai ai thudon thu ngai thai i minungte khiah zawl i si.
20Ciamanin BAWIPA Pathian in, “Vaniu zul bang ai minungte ning zulhnak thudon pon khiah i luah i. Cia ponte khiah ning banpui in ning zik sah tuh ai, vaniu bang ai ning zulhnak mite khiah luat ruai tuh ing. 21Cen ning lukhukhnak pon niute khai ning zik sah tuhai i minungte khiah ning kut songin luat ruai tuh ing. Amahte khiah ning kut song in luat tuh i. Ciafangin ningte in kaimah khiah BAWIPA i, ti in ling tuh i si. 22Thudon thawn in mi dikcangte khiah ningmah in lungsia ruai i si. Amahte khiah lungsia ruai napui lo ing. Cen misualte in amahte nunhnak o tuhin amahte sualhnak khiah sir tuh lo in ningte in amahte kut khiah kho ruai i si. 23Ciamanin ningte in thu lovang khiah hmu tuh nawn lo i si. Cen prawfet thu khai rel tuh nawn lo i si. Ziangmanti fangin i minungte khiah ning kut songin luat ruai tuh ai ciafangin ningte in kaimah khiah BAWIPA i, ti ling tuh i si.”ti in ti i.’ti in rel tu.”ti in i ruai i.