1 Thirhlung khiah na kahmur ah dah tu.
Amahte in i thukham lakah sual ai
i upadi dan khiah hlun lo manin,
amah khiah mudokka bangin
BAWIPA mite hnenah hleng tuh i.
2 Israel mite in i hnenah,
‘I Pathian, na ling i ing.’ ti in au tuh i.
3 Israel mite in a pha khiah lon teu i.
A raal te in hnawh tuh i.
4 Amahte in kumpibawite khiah dah i.
Ikhalselai kai in dahhnak um lo i.
Amahte in bawite khai dah ai,
kai in ling sah lo ing.
Amahte sui le ngun thawn amahte
hnawmcan tuhin milim zuk te bawn i.
5 Aw Samaria, na kawlpaw niu zuk khiah na saang sah lo i.
Amahte lakah thin i raw i.
Zaikom fangin amahte khiah
mawh lo in um leh tuh i?
6 He kawlpaw zuk khiah Israel ai bawn hnak i.
Pumsu tu pa in bawn hnak i.
Ciamanin Pathian i lo i.
Ikhalselai Samaria ai kawlpaw zuk khiah
khoi sah tuh berh i.
7 Amahte in hlivua khiah cing i.
Ciamanin khuahu khiah khawm tuh i.
A kung in a pu nai lo i.
Rongmu suak tuh lo i.
Suak tapang lekhaw
ram dang mite in ei tuh sek i.
8 Israel mite khiah mi te in lem lio i.
Aisu in khai daih lo hnak bel bang in,
Amahte khiah Zental mite lakah um i.
9 Hampalak ai lak khiah amah lek in um bang in
Israel mite khai Assiria ramah hong i.
Efraim in a it tute khiah nga i.
10 Amahte veve khiah ram dang mite hnenah zuar napuikhaw,
Amahte khiah khawm leh tuh ing.
Bawite lakai kumpibawipa in amahte khiah
rimsu pe manin amahte khiah pai tuh riaro i.
11 Efraim in sual tuh in awlta cabuai tam ngai bawn i.
Ciamanin cia awlta cabuai khiah amahte
sual ruai tu cabuai cang i.
12 Amahte ca in i upadi dan a lian ngai khiah
ngat napui ai amahte in zaikhai nam lo i.
13 I hnenah raithawi ai hlu hnak khiah
amahte in a sa khiah hlu ai ei i.
Ikhalselai BAWIPA in saang sah lo i.
BAWIPA in amahte sualhnak khiah
hih sah tuh ai amahte khiah cawh tuh i.
Amahte khiah Izip ramah let leh tuh i.
14 Ziangmanti fangin Israel mite in
a Bawntu khiah hai lio i.
Kumpibawi inn tam ngai sa i.
Judah in khai a khuapui tam ngai khiah
kho ngai in ren i.
Ikhalselai a khuapuite hnenah mai hlat tuh ing.
Cia mai in a kumpibawi inn te khiah kang tuh i.”ti in ti i.