1 Efraim in thu rel fangin mite khiah lau awng i.
Amah khiah Israel ah upa ngai i.
Ikhalselai amah in Baal khiah bia fangin, amah khiah thi i.
2 Tuntu amahte in a tam amam in sual i.
Amahte bia tuh in a erhnak milim zuk te bawn i.
Amahte ngun tangka khiah milim zuk in bawn thiam ngai i.
Cia milim zuk khiah pumsutu pa ai bawnhnak i.
Mite in amahte khiah,
“A hlu tu te in,
kawlpaw niute zuk khiah thut tu seh.”ti in ti i.
3 Ciamanin amahte khiah zing ai mairo le
zing niu ai naidawh bang in pai tuh lio i.
Amahte khiah fangcil hmun ai hli ai
lanhnak vaikung bang in le padinpauh
songai suakhnak maikhu bang tuh i.
4 Ikhalselai Izip ram ai panin
Kaimah khiah BAWIPA na Pathian ing.
Kaimah lo a dang Pathian ling tuh lo i si.
Kaimah lo a dang o tu um lo i.
5 Nelrawn songah ning um fangin ning cawm ing.
Ruahsi lo hmun a ro keng ram ah ning cawm ing.
6 Amahte in hampa nai fangin, rongkham i.
Amahte khiah rongkham fangin a thinlung khiah hngal i.
Ciafangin kaimah khiah i hai i.
7 Ciamanin kaimah khiah chintit bang in le
lam hiang ai tlavang bang in amahte khiah cul tuh ing.
8 A fate lang sahhnak vom bangin amahte khiah tawk tuh ing.
Amahte nak khiah hlik tuh dek ing.
Chintit bang in amahte khiah ciata ah dawp tuh ing.
Ramsa te in amahte khiah dawp tuh i.
9 Aw Israel mite, ning hnawm berh i hang.
Kaimah khiah ning bawm tu ing.
10 Kaimah khiah ning kumpibawi cang tuh ing.
Ning khua caang ah ning o tu tuh in
a dang kumpibawipa akonah um pa?
‘Kumpibawipa le bawite kin pe tu.’ ti ai
ning ngenhnak ning thukhantu te tang akonah i hang?
11 I thinraw kong in kumpibawi pakhat ning pe ai,
i thinraw in amah khiah ning lang sah leh lio ing.
12 Efraim mawhhnak khiah pen meng i.
A sualhnak khiah khawi sah hlen i.
13 Nupui nuu in naukai fangin ur bang in amah khiah ur tuh i.
Amah khiah a fim lo fa i.
Ziangmanti fangin a te hmun kua ah
a cuu khim fang in kawi lo i.
14 Amahte khiah hlankua songin luangtlan tuh ing.
Thihhnak songin luat ruai tuh ing.
Aw Thihhnak, kaimah in na ur ruai tuh ing.
Aw Hlankua, kaimah in na hnawmcan tuh ing.
Ning na hio tuh lo ing.
15 A unaute lakah amah in thai nai bial na puikhaw,
Ni suak hmunlam in hlivua hleng tuh i.
Nelrawn songin BAWIPA hlivua khiah hleng tuh i.
Ciafangin a cirhti khiah kaang tuh i.
A tikhur khiah ro tuh sek i.
A hlawnthil khawi hmun inn ai daih kul hnak
thilri khiah a veksenin amah in rok sah tuh i.
16 Samaria mite khiah mawhhluk tuh i.
Ziangmanti fangin a Pathian khiah tawng i.
Amahte khiah vangsau thawn rek tuh i.
Amahte nausen te khiah nawi lio in seu tuh sio i.
Cen naupaai nupuite khai a ril puah sah tuh berh i.