1 Pethuel fapa Joel hnenah hleng hnak BAWIPA thu:
2 Mi upate, he khiah za tuu-ih.
Israel ram ai um tu mite, ngai tuu-ih.
He bang khiah ning san ah hleng awng awm?
Ning paate san ah tang hleng awng awm?
3 Ning fate khiah cia thu rel tuu-ih.
Ning fate in a fate rel tu seh.
A fate in a fate rel tu sei seh.
4 A kial ai rong ei pawl khokhuak te eih val khiah
Khokhuak lian puipui in ei i.
Khokhuak lian puipui eih val khiah
Khokhuak cik niuniu in ei i.
Khokhuak cik niuniu eih val khiah
a dang khokhuak te in ei i.
5 Zurite, phawk tu i lai, kap tuu-ih.
Capittizu ding tu te ning veksen in,
A thar capittizu ca in kap tuu-ih.
Ziangmanti fangin cia capittizu thar khiah
ning ka in ning sut sah lio i hang.
6 Ziangmanti fangin ram dang mi phun
pakhat in i ram khiah sim i.
Amahte khiah hat ngai ai a siar zo lo i.
Amahte kam khiah chintit kam bang i.
Amahte in riahsia ngai chintit haa bang nai i.
7 Amah in i capit kung khiah i hnawm sah i.
I thai thing te khiah hnawm ruai i.
Amah in a thingkawng khiah hlik sio ai lon sek i.
Ciamanin a kakte khiah a ngo in um i.
8 Fenu niu in a naulai ai a pa khiah
vaidip sil in kah bang in kap tu.
9 Rongmu a hlu le ding tuh ai hlu hnak te
khiah BAWIPA inn songah hlu awl lio i.
BAWIPA naper sah tu phungki te khai kap i.
10 Lo khai hnawm sek i.
Ciamanin laipua khai lungsia i.
Ziangmanti fangin rongmu te khai hnawm sek i.
Capittizu thar khai kaang berh i.
Thau khai bo sio i.
11 Lovai tute, lungsia tuu-ih.
Capit vuandum nai te, kap tuu-ih.
Sangvut le kawlkawn te ca in kap tuu-ih.
Ziangmanti fangin lo lai ah rongkhawm tuh um nawn lo i.
12 Capit kung khai ro lio i.
Thai thing khai voi lio i.
Taleti, ungti, le apple thingte,
Lo lai ai thingkung hmuahhmuah voi sek i.
Ciamanin minung te khai ang nawn lo i.
13 Ning phungki te,
Ning pon sil in kap tuu-ih.
Awlta cabuai hmai ah naper tu te,
Lungsia tuu-ih.
I Pathian hnenah naper tu te,
zan khuavar in vaidip sil in mitmu tuu-ih.
Ziangmanti fangin rongmu a hlu le
ding tuh a hlu te khiah ning Pathian inn songah um nawn lo i.
14 Rong ul tuu-ih.
Sawngen tuhin pumkhawm ko tuu-ih.
Mi upate le Israel ram ai um tu veksen
khiah ning Pathian Bawipa inn ah tai tuu-ih.
Bawipa hnenah sawngen tuu-ih.
15 Ai aw, cia nia khiah!
Ziangmanti fangin Bawipa niakhua khiah
a nong niu i hang.
Bawipa Pathian hnenin hnawmcanhnak
tuh in hleng tuh i.
16 Kin mit hmuh in rong khiah bo sek i lo im?
Kin Pathian inn song ai hiamhnak le
anghnak khai bo sek i lo im?
17 Rong cii te khai laipua songah vai berh i.
Rongkhawl hmun inn te khai hnawm berh i.
Rong khawi hmun ben te khai khoi sio i.
Ziangmanti fangin rongmu te khai ro sio i.
18 Ramsate khai rung liang lo i.
Kawlpaw te khai cai murhmo i.
Ziangmanti fangin leng hmun tuh hampa um lo i.
Tu run te rinin rimsu tuar ve i.
19 Aw Bawipa, na hnenah kap ing.
Ziangmanti fangin mai in hampa te khiah kang sio i.
Cen mai in lo ai thing te khai a veksen in kang sio i.
20 Lo lai ai ramsa te in khai na hnenah kap i.
Ziangmanti fangin rawn ai ti khai kaang sek i.
Mai in hampa te khai kang sio i.