1 Ziangmanti fangin cia niakhua le
ciateng fangin,
Raalte ai pom hnak Judah le
Jerusalem mite i tlun leh fangin,
2 Mi phun hmuahhmuah khai a veksen in
kaimah in khawm tuh ai
Jehoshaphat Rawn Zawllai kawih tuh ing.
Amahte in i rothil i minung Israel mite khiah,
mi phun cang lakah peu ruai manin,
amahte khiah ciata ah cawh tuh ing.
Cen amahte in i ram khai khan sah i.
3 I minungte khai aungbali suai bang in suai i.
Tlangval niu khai phatameh tham tuh in zuar i.
Cen fenu niu pakhat khai
amahte ding tuh capittizu ca in zuar i.
4Aw Tyre le Sidon le Filistia ram te, i lakah zai ning raw i? I rul leh nga i sim? I rul leisikhaw, a rang ngai le cammalak in ning rulhnak khiah ning lu vumah hleng ruai tuh ing. 5Ziangmanti fangin ningte in, i daihhnak ber i ngun le i sui te khiah lang ai, ning temple songah thiar i si. 6Cen Judah mi le Jerusalem mite khiah thiar ai, amahte khiah amahte ramri in a hla ngai ai um tuhin, Greek mite hnenah zuar i si. 7Inapuikhaw amahte khiah ning zuar hmun ram in tho ruai tuh ing. Ning rul hnak khiah ning lu vumah hleng ruai tuh ing. 8Ning fapa le ning fenu te khiah Judah mite hnenah ning zuar sah tuh ing. Ciafangin amahte in a hla ngai ram ai umtu Sabean mi te hnenah zuar tuh i.”ti in BAWIPA in rel zo i.
9 He thu khiah mi phun caang hnenah rel tuu-ih.
“Raaltawng tuhin pai tu.
Mi tha cak te khiah phawr tu.
Raalkap te khiah a veksen in a nong ah
kawi in heta ah hong tu seh.
10 Ning tuhmui khiah vangsau ah seu tuu-ih.
Thinghlawrhnak vang te khai feipui ah bawn tuu-ih.
Thanau te in, ‘Tha i hat i.’ ti tu seh.”ti in rel tu.
11 Mi phun dang te, ning veksen in
hmunkhat in khawm in kawi tuu-ih.
Aw BAWIPA, a thahat ngai
na minung te khiah kawi ruai tu.
12 Mi phun hmuahhmuah khiah phawk tu selai,
Jehoshaphat Rawn Zawllai ah kawi tu seh.
Ziangmanti fangin ciata ah a hiang cingkim ai
mi phunte thukhan tuh in to tuh ing.
13 Vangkawn khiah suah tu.
Ziangmanti fangin rongkhawm cu i hang.
Kawi tulai, capit te khiah tlawh tu.
Ziangmanti fangin capitti rialhmun khiah dim i.
Capitti khawihmun bel te khiah a let in dim i.
Ziangmanti fangin amahte sualhnak khiah lian rauh i.
14 Thukhan hmun tuh rawn zawllai ah,
minung khiah a dim lio in um i.
Ziangmanti fangin cia thukhan hmun tuh rawn zawllai ah,
BAWIPA niakhua khiah nong i hang.
15 Ni le hla te khiah thim tuh i.
Arsi te khai a tlawm deuh in tleu tuh i.
16 BAWIPA khiah Zion in huk tuh i.
Jerusalem in pong tuh i.
Van le laipua khiah hlin tuh i.
Ikhalselai BAWIPA khiah a minungte buanhmun tuh i.
Amah khiah Israel mite tha i tuh i.
17 Ciafangin nangmah in kaimah khiah
na Pathian BAWIPA le a cianghlim
i mual Zion ah um i ti khiah ling tuh i si.
Ciafangin Jerusalem khai cianghlim tuh ai,
A songin ram dang mite khiah khel tuh nawn lo i hang.
18 Cia niakhua ah mualtlang te khiah
capittizu thar thawn far tuh i.
Tlang vumin cawhnawi luang tuh i.
Judah ai rawn te khai ti thawn a dim in let tuh i.
BAWIPA inn songin cirhti luang tuh i.
Cia ti in Shittim Rawn Zawllai khiah burh tuh i.
19 Amahte in Judah mite khiah tawng ai,
Amahte ram ah mawh nai lo te thi luang ruai manin,
Izip ram khiah zaikhai um lo in hnawm tuh i.
Edom khai zaikhai um lo nelrawn cang tuh i.
20 Ikhalselai Judah tu kumzangza in taang tuh i.
Jerusalem khai san khat hnua san khat um tuh ngio i.
21 Ziangmanti fangin amahte thi
luang ruai tu te khiah phuzul lai lo
manin phuzul tuh ing.
Ziangmanti fangin BAWIPA khiah Zion ah um i.
(08/07/99@1:18PM /02/29/2000@1:15PM, 1/16/17@4:17PM)