Zisu khiah a khuate in sang lo i
(Mate 13:53-58; Luke 4:16-30)
6Ani khai ciata in feh ai amah ram ah hleng i. A hnuahlunte in amah khiah hlun i. 2Sabbath nia ah amahin sanginn songah thucuk ai a zatute tamngai khiah ngaihsunur ngai i. Ciamanin a mahte in, “He pa in a konin thu he hmuahhmuah ling i pa? Konin he bang fimhnak ngah i pa? A kut thawn zaitluk ngaihsun urkul na per i! 3Amah khiah Mary fapa, James le Joses le Judas le Simon u lettama i lo im? Cen a farnute tang kin hnenah um i lo im?” ti in ti ai Zisu lakah thinkhim lo i. 4Ciafangin Zisu in amahte hnenah, “Prawfet khiah amah ram le amah phunpui le amah inn sang minungte ian in zainam lo i. Ikhalselai mi dangte in ngawn upat i.” ti in ti i. 5Mi-ur tlawmniu vumah a kut dah ai ciate khiah cakruai i. Cialotu ngaihsunurkul naper per thill lo i. 6Ciamanin amahte in Zisu khiah sang lo manin Zisu khai ngaihsunur ngai i. Ani khai khuatenau caang ah feh in thucuk i.
A hnuahlun hlainih te hlat i
(Matt. 10:1, 5-15; Luke 9:1-6)
7Ciafangin Zisu in a hnuahlun hlainihte khiah a hnenah kawi ruai ai panih panih in feh ruai ai a ciang lo khuavangte nehhnak tuh power pe i. 8“Ning khualsi hmunah tokrolh lek keng tuu-ih. Rong le dip le paisa dip songah paisa keng mah ih 9Cen kezep dawl tuu-ih. Angki panih khai sil mah ih. 10Mi inn ah ning tlung fangin, cia hmun in ning thawn hlan lo cia inn ah um tuu-ih. 11Cen ning tlung siang lo le ning thu ngai nuam lo in um lekhaw, cia hmun in ning thawn fangin amahte lakah tetti khanhnak tuhin ning ke ai laivut khiah thiing tu berh ih. Thungai in ning rel ing, Sawdom le Kawmawrrah khiah thukhan nia ah cia khua hnak in tuar khop tuh sawn i.” ti in rel i. 12Anite khai feh ai mite in sualsir tuhin tazahaw i. 13Khuavang tamngai hnawt ai a urte khiah thau pawh ai cakruai i.
Herod in Zisu khiah Tinimtu John vuah i
(Matt 14:1-12; Luke 9:7-9)
14Kumpibawipa Herod in Zisu thu za i. (Ziangmanti fangin Zisu hming khiah thaang i). Herod in, “Tinimtu John khiah thihhnak in tholeh zo i. Ciamanin amah songin ngaihsunurkul naper lian ngaingai khiah suak i.” ti in ti i. 15A dangte in, “Amah khiah Elijah i.” ti ai a dangte in, “Amah khiah prawfet i.” ti a dangte in prawfet pakhat bang i.” ti in ti i. 16Ikhalselai Herod in za fangin, “Amah khiah a lu i cemhnak John i. Cia thihhnak in tholeh i hang.” ti in ti i. 17Ziangmanti fangin a nau Filip nu Herodias manin Herod amah rori in John khiah pom tuhin hlat ai John khiah thawnghla i. 18Ziangmanti fangin John, “Na nau nu nu sah tuh khiah dan lo i.” ti in ti i. 19Ciamanin Herodias in John lakah thinraw le rek nuam napui ai rek thill lo i. 20Ziangmanti fangin Herod in John khiah mi dikcang le mi cianghlim i ti ling manin kih ai John khiah o ngio i. Herod in John thurelhnak za fangin a thin hnaihnok ngai napui ai ang ngai in a threlhnak ngai i. 21Ciafangin Herod tenia hleng fangin a tlangsuakte le a raalbawite le Galilee ram ai mi upate ca in puai bawn fangin, a cuu hleng i. 22Ziangmanti fangin Herodias fenu niu khiah tlum ai lam fangin, Herod le a sualengte khiah ang ngai i. Ciamanin kumpibawipa in cia nuu hnenah, “Na daihhnak zaizai khai i ngen tu lai, na pe tuh ing.” ti in ti i. 23Ciafangin Herod in cia fenu niu hnenah, “Nangmah ai i ngenhnak zaizai khai i ukhnak a hrek tianin na pe tuh ing.” ti in thukham i. 24Ciafang in cia fenu khai feh ai a nuu hnenah, “Zai ngen ngang?” ti in zawt i. A nuu in, “Tinimtu John lu ngen tu.” ti in sawn i. 25Ciafangin ani khai a rang ngai in kumpibawipa hnenah kawi ai, “Hleng thawn Tinimtu John lu i pe tu vut.” ti in ngen i. 26Kumpibawipa khai sir ngai napui ai a thukhamhnak manin le a sualengte manin cia nuu hnenai a thukhamhnak pilh nuam lo i. 27Ciafangin mirektu pakhat hlat ai John lu kawih ruai i. Cia pa khai feh ai John lu khiah thawnginn songah cem ai 28Hleng thawn a lu kawih ai fenu pe le fenu nu in a nuu pe i. 29John hnuahlunte in za fangin anite khai kawi ai John ruang khiah lang ai vui i.
Mi thawngnga rongdohnak
(Matt. 14:13-21;Lu.9:10-17; John 6:1-14)
30A hnuahlun apawstal te khiah Zisu hnenah khawm tlang ai, amahte bawnhnak le amah te cukhnak thu hmuahhmuah khiah Zisu rel i. 31Zisu in amahte hnenah, “Mite um lo hmun ah ningmah lekin kawi in campuikhat com rih tuu-ih.” ti in ti i. Ziangmanti fangin mite khiah zomzet in kawitu le fehtu um manin amahte in rongei peu khai thill lo i. 32Ciamanin amahte lek in khawm thawn aisu khai um lo hmun ah feh i. 33Ikhalselai mirunpui in amahte thawn hmu ai mi tampui in Zisu ling manin, anite khai khuapui hmuahhmuah songin ciata ah a ke thawn dawp i. Amahte khai anite hlan ah hleng ai anite khai Zisu hnenah hleng tlang i. 34Zisu khai suak fangin mi tamngai hmu ai ninghio ngai i. Ziangmanti fangin amahte khiah khaltu nai lo tute bang i. Ciamanin Zisu in amahte khiah thu tam ngai cuk i. 35Khuahnua ngai manin, a hnuahlunte in Zisu hnenah kawi ai, “He heh hampalak i; khuahnua ngai i hang. 36Amahte khiah he hiang cingkim ai ram songah le khua songah rong lai tuh in feh ruai tu. Ziangmanti fangin amahte in zai ei tuh khai nai lo i.” ti in ti i. 37Zisu in amahte hnenah, “Ningmah in amahte khiah rong ei tuh pe tuu-ih.” ti in ti i. Ciafangin anite in, “Feh in tangka zanih man rong lai in amahte ei tuhin pe tuh i ing?” ti in sawn i. 38Ciafangin Zisu in, “Sang hlom zaizah nai i si? Feh in sik tu cuk ih.” ti in ti i. Amahte in ling fangin, “Hlom nga le nga panih nai i ing.”ti in rel i. 39Ciafangin Zisu in amahte khiah a veksenin a pawl a pawl in hampa hing vumah to ruai i. 40Ciamanin anite khai a pawl a pawl in to ai pawl hrekkhat ah minung sawm nga, pawl hrekkhat ah miung zakhat um i. 41Ciafangin Zisu in sang hlom nga le nga panih khiah lang ai vancung sik ai sawngen ben fangin miburpui zem tuhin a hnua hlunte pe i. Cen nga panih khai amahte ca tuhin khan i. 42Mi veksenin rong ei ai kham sio i. 43Ciafangin anite khai rongeih val sang le nga khiah bawm hlainih khul i. 44Cen rongei tute khai pasal thawng nga tluk i.
Zisu ti vumah vak i
(Mate 14:22-33; John 6:15-21)
45Ciasawng fangin Zisu in miburpui khiah hla lakin a hnuahlunte khiah ralkhat lam Bethsaida khua ah a hlanin feh tuhin khawm songah lut ruai i. 46Zisu khai mite hla ben fangin sawngen tuhin mual vumah hong i. 47Zanlam khuathim fangin khawm khiah tipui laiteng ah um ai Zisu tu amah lekin lairo vumah um i. 48Amate in rimsu ngai in khawm cawk hmu i. Ziangmanti fangin hlivua khiah amahte hnen lamah ah zuang i. Zinglam arkhuang dung fangin Zisu khai ti vumin vak ai amahte hnenah kawi ai amahte khel tum i. 49Amahte in Zisu ti vum ai vak khiah hmu fangin mi rauhla vuah in au tlang i. 50Ziangmanti fangin a veksenin amah khiah hmu ai amahte khiah daam i. Ikhalselai Zisu in amahte khiah pon vut ai, “Thin nuam in um tuu-ih. Kaimah ing, lau mah ih.” ti in ti i. 51Ciafangin Zisu khai khawm songah lut ai hlivua khai zuang awl lio i. Ciafang in anite khai ngaihsunur ngai i. 52Ziangmanti fangin amahte in sang hlom le minungte rong cawmhnak thu khiah ling tho tho lo i. Amahte thinlung khiah ruh meng i lai.
Kennesaret ah miurte cakruai i
(Matt. 14:34-36)
53Amahte in ti tan ben fangin Kennesaret khua ah hleng ai varkam ah khawm cawm ruai i. 54Amahte khiah khawm songin tolh fangin, amahte in Zisu khiah ling ai, 55Anite khai cia ram pumpalah dawp ai Zisu um hmun caang ah mi-urte khiah a khuahluan thawn zawng ai hmunah kawih i. 56Cen a feh hmun khuatenau le khuapui le ram caang ah i tu seh, mite in a urte khiah lamkhek cang ah zau ai, a ponpar teng teng khai khing thillhnak tuhin khuan ngen ai a khing tu hmuah khiah cak i.