1Ciamanin David khai a nun sau ngai nung ai tar fangin, a fapa Solomon khiah Israel kumpibawi cang ruai i. 2Israel mi upate khiah phungkite le Levi te kawm in khawm ruai i. 3Levi mite khiah kum sawmthum tan vum hmuah siar ai a vek in pasal thawng sawmthum le thawng riat um i. 4He songah,thawng kul hluanli te khiah Bawipa inn songah naper hnak khawngtute i. Thawng ruk te khiah bawi upa le thukhantute i. 5Thawng li te khiah dawngkham kiltute i. Cen thawng li te in David in, “Cuanhnak tuhin i bawnhnak i”a tihnak lasahnak thilri te thawn Bawipa cuan i. 6David in amahte khiah Levi fate Gershon, Kohath le Marari fate thawn a kaih in khan i.
7Gershon songin Laadan le Shimei. 8Laada fapate: a hmasaber Jehiel, ciaben fangin Zetham le Joel a veksen in pathum. 9Shimei fapate: Shelomith, Haziel, le Haran a veksen in pathum. Hete khiah Laadan songkhatte lakah mi upate i. 10Shimei fapate: Jahath, Zina, Jeush, le Beriah. Hete khiah Shimei fapa pali te i. 11Jahath khiah a hmasaber i. A panihhnak khiah Zizah i. Ikhalselai Jeush le Beriah in fapa tampui nai lo i. Ciamanin amahte khiah paa pakhat songah dah i.
12Kohath fapate: Amram, Izhar, Hebron, le Uzziel a veksenin pali i. 13Amram fapate: Aaron le Moses; Aaron a fapate khiah a cianghlim ber thilte khiah cianghlim ruaitu tuhin le Bawipa hmai ah rimhmui tai tu tuhin le a naper sah tu tuhin le a hming in hmuifu khiah kumzangza in bur tuhin, Aaron khiah a tumce in ril i. 14Pathian minung Moses fapate khiah Levi hin songah siar i. 15Moses fapate khiah Gershon le Eliezer i. 16Gershon fapate: a hmasaber Shebuel i. 17Eliezer tesin fate lakah Rehabiah khiah a hmasaber i. Eliezer in a dang fapa nai lo i. Ikhalselai Rehabiah in fapa tam ngai nai i. 18Izhar fapate songah Shelomith khiah a hmasaber i. 19Hebron fapate songah Jeriah khiah a hmasaber i. Amariah khiah a panihhnak i. Jahaziel khiah a pathumhnak, Jekameam khiah a palihnak i. 20Uzziel fapate lakah Michah khiah a hmasaber i. Jesshiah khiah a panihhnak i.
21Merari fapate khiah Mahli le Mushi i. Mahli fapate khiah Eleazar le Kish i. 22Eleazar khai fapa nai lo in thi i. Fenu lek nai i. Cia fenute khiah a unau Kish fapate in hoi i. 23Mushi fapate khiah Mahli, Eder, le Jeremoth a veksenin pathum i.
24Hete khiah Levi tesin fate i ai amahte songkhat songin siarhnak i. Amahte khiah amahte hming ten in khum ai pakhat ten in siar i. Cen amahte khiah Bawipa inn songah napertu kum 20 le a tanvum mite i. 25Ziangmanti fangin David in, “Israel mite Bawipa Pathian in A minung Israel mite khiah Jerusalem ah kumzangza um tuhin comhmun pe zo i.”ti in ti i. 26Cen Levi mite hnenah khai, “Amahte in tabernacle le a naperhnak thilrite khiah phur tuh nawn lo i hang.”ti in ti i. 27Ziangmanti fangin David in a hnuataber ai ponghnak bangin, Levi mite khiah kum 20 le a tanvum hmuah siar i. 28Ziangmanti fangin amahte natuan khiah Bawipa inn songah Aaron fapate bawm tuh i: Ciate khiah tualvan le inn khan song kilkhawl tuh le a cianghlim thilrite khiah a veksen in ciang ruai tuh le Pathian inn songah naper tuhhnak te i. 29Cen cabuai vumah sangreu dah tuh le rongmu hluhnak sangvut le col tel lo sang per em le cok tuh le thil khai le tehhnak te khai amahte tavuan i. 30Zing siar in Bawipa hmai ah ding in Bawipa cuan tuh le zanlam fangin khai cuan tuh i. 31Cen Sabbath cang le Hla thar puai le bawn kulhnak a dang puai ah khai amahte in Bawipa cuan tuh khiah a tavuan i. Cen amahte in Bawipa na khiah a semhnak zah minung thawn le a dan bangin per sah tuh i. 32Ciatih in Levi mite in Tawkdun hmun tabernacle ca le a Cianghlim Hmun ca in amahte unaupui Aaron tesin fate kuthnia ah Bawipa inn songah amahte tavuan bangin naper i.