1Siria le Israel khai raaltawng dun lo in kum thum um i. 2Kum thumhnak fangin Judah kumpibawipa Jehoshaphat in Israel kumpibawi tlawng tuhin zu i. 3Israel kumpibawipa in a hnenumte hnenah, “Kilead ai Ramoth khiah kinmah ai i. Ikhalselai Siria kumpibawi pa kut songin sut tuhin ngam deuh lo i sing ti khiah ling aw i sim?”ti in zawt i. 4Ciamanin amah in Jehoshaphat hnenah, “Ramoth Kilead tawng tuhin kai thawn feh nga sim?”ti in zawt i. Jehoshaphat in Israel kumpibawi pa hnenah, “Kaimah khiah nangmah bang ing. I minungte khiah na minung bang i. I siphuhte khiah na siphuh bang i.”ti in sawn i. 5Ciafang Jehoshaphat in Israel kumpibawipa hnenah, “Tunnia ah Bawipa hnenah thu zong tu.”ti in ti i. 6Ciafangin Israel kumpibawipa in prawfet pasal zali tluk khiah hmun khat in khawm ai amahte hnenah, “Ramoth Kilead tawng tuh in feh ngang maw feh hlah ing?”ti in zawt i. Ciamanin amahte in, “Feh tu. Ziangmanti fangin Bawipa in Ramoth Kilead khiah kumpibawipa hnenah pe tuh i.”ti in sawn i. 7Ciafangin Jehoshaphat in, “Bawipa khiah zong tuhin, heta ah a dang Bawipa prawfet um lo im?”ti in zawt i. 8Ciamanin Israel kumpibawipa in Jehoshaphat hnenah, “Pakhat um i lai. Amah khiah Imlah fapa Mikaiah i ai amah khiah Bawipa thu zawt thai i sing. Inapui amah khiah i daih lo i. Ziangmanti fangin i thu khiah a pha in rel awng lo ai a pha lo lolek rel de i.”ti in ti i. Ciafangin Jehoshaphat in, “Kumpibawipa in ciatih bang thu rel zel ma seh.”ti in ti i. 9Ciafangin Israel kumpibawipa in raalbawi pakhat khiah ko ai, Imlah fapa Mikaiah khiah a rang ngai in kawih tu.”ti in ruai i. 10Israel kumpibawipa le Judah kumpibawipa Jehoshaphat khiah amahte kumpibawi thuam sil in kumpibawi tauhkheng vumah, Samaria kawl dawngkham lut hmun rongcil hmunah to kawm ai prawfet te a veksenin amahte hmai ah prawfet thu rel lianglo i. 11Ciafangin Chenaanah fapa Zekediah in amah ca in thir thawn ki bawn ai, “Bawipa in, ‘He ki thawn Siria mite khiah a thi sio hlanlo nemh tuh i si.’ti in ti i.”ti in rel i. 12Ciatih bangin prawfet veksenin rel ai, “Ramoth Kilead ah hong tulai, neh tuh i si. Ziangmanti fangin Bawipa in Ramoth Kilead khiah kumpibawipa kut songah ap tuh i.”ti in rel tlaang i.
13Ciafangin Mikaiah hnenah kawitu raalbawipa in Mikaiah hnenah, “Ngai tu. Prawfet a veksenin thinkhat in kumpibawipa khiah thaso i. Ciamanin na relhnak thu khai amahte relhnak bang i tu selai kumpibawipa khiah thaso ruai tuhin rel tu.”ti in ti i. 14Ciafangin Mikaiah in, “Bawipa nung bangin, Bawipa ai i rel ruaihnak khiah rel tuh ing.”ti in ti i. 15Ciafangin Mikaiah khai kumpibawi hnenah hleng i. Ciafangin kumpibawipa in amah hnenah, “Mikaiah, Ramoth Kilead tawng tuhin feh ngang maw, feh hlah ing?”ti in zawt i. Mikaiah in amahte khiah, “Feh tulai, neh tuh i si. Ziangmanti fangin Bawipa in Ramoth Kilead khiah kumpibawipa kut songah ap tuh i.”ti in sawn i. 16Ciamanin kumpibawipa in, “Bawipa hming in thu hman lo ziang khai i rel tuh lo in vel zai thu na kham ruai ing?”ti in ti i.
17Ciafangin amah in, “Israel mite khiah a veksenin mual vumah khaltu nai lo tu te bangin peu sio khiah hmu ing. Ciafangin Bawipa in, ‘He mite in a uktu nai lo i. Amahte inn tenah thinnuam niu in tlung tu seh.’ti in ti i.”ti in rel i. 18 Ciafangin Israel kumpibawipa in Jehoshaphat hnenah, “Kai thawn senghnak lamah a pha i lo ai a sia lek i rel sah tuh i, ti in na rel cia lo ing?”ti in ti i. 19Ciafangin Mikaiah in, “Ciamanin Bawipa thu khiah ngai tuu-ih. Bawipa khiah a tauhkheng vumah to ai a kiahhan lam le a kekeh lamah vancung mite a veksenin ding khiah hmu ing. 20Ciafangin Bawipa in, ‘Ramoth Kilead ah thi tuhin aisu in Ahab khiah so ngaih?’ti in ti i. Ciamanin pakhat in hetih bangin pongai a dang pakhat in khiatih bangin pong i. 21Ciafangin rauhla pakhat khiah hmai ah suak ai Bawipa hmai ah ding ai, ‘Kaimah in so tuh ing.’ti in ti i. 22Ciafangin Bawipa in amah hnenah, ‘Kontih in?’ti in zawt i. Ciamanin amahin, ‘Feh ngangkhaw, a prawfet veksen te kaa songah thudon rel tu rauhla cang tuh ing.’ti in ti i. Ciafangin Amah in, ‘Nang in so tulai so ben tuh i si. Feh tulai ciatih in bawn tu.’ti in ruai i.”ti in rel i. 23Ciamanin sik tu! Bawipa in he prawfet veksen te kaa songah thudon rel tu rauhla khiah dah ai Bawipa in na sunghnak tuhin sungphiat zo i.”ti in rel i.
24Ciafangin Chenaanah fapa Zekediah khai a nongah kawi ai, Mikaiah biang khiah beng ai, “Bawipa hmunai rauhla khiah i hmunin na hmunah thu na rel tuhin a kon lamin kawi pa?”ti in zawt i. 25Ciafangin Mikaiah in, “Cia nia ah inn khaan songta ah relh tuhin na tlum fangin hmu tuh i si.”ti in sawn i. 26Ciafangin Israel kumpibawipa in, “Mikaiah khiah lang tu i lai, khua bawipa Amon le kumpibawi fapa Joash hnenah kawih tuu-ih. 27Cen amahte hnenah, ‘Kumpibawipa in, “He pa khiah raalrem ai i let leh hlan lo thawng hla tu i lai, anharhnak rong le anhnarhnak ti lek pe tuu-ih.”ti in ti i.’ti in rel tuu-ih.”ti in ruai i. 28Ciafangin Mikaiah in, “Raal rem in tlung leh lesikhaw, Bawipa in i songin pong lo i.”ti in ti i. Ciafangin amah in, “Ning mi veksenin, ralring tuu-ih.”ti in ti i.
Ahab thihnak thu
29Ciamanin Israel kumpibawipa le Judah kumpibawipa Jehoshaphat khai Ramoth Kilead ah feh i. 30Ciafangin Israel kumpibawipa in Jehoshaphat hnenah, “I thuam thleng in mi dang bangin pal in raaltawng hmunah feh tuh ing. Ikhalselai nang tu na kumpibawi thuam sil tu hlen.”ti in ti i. Ciamanin Israel kumpibawipa khai a pal in raaltawng hmunah feh i. 31Siria kumpibawipa in a siphuh leng totu raalbawi sawmthum le panih te khiah, “Israel kumpibawi lek tawng in a cik le a lian aisu khai tawng mah ih.”ti in rel i. 32Ciamanin, cia bawite in Jehoshaphat khiah hmu fangin, amahte in, “Thungai in amah khiah Israel kumpibawi i tuh i.”ti in ti i. Ciamanin amah tawng tuhin her fangin Jeshoshaphat khai au i. 33Siphuh leng totu bawite in amah khiah Israel kumpibawi i lo i ti ling fangin, anite khai let leh ai amah khiah hnawh awl i. 34Ciafangin mi pakhat in a kahpuk khiah kap menma le Israel kumpibawi silhnak raal thilthuam kualak khiah kha lio i. Ciamanin kumpibawipa in a siphuh leng mawng tu pa hnenah, “Siphuh leng khiah her tulai raal tawng hmunin i suah tu. Ziangmanti fangin, i kha lio i.”ti in ruai i. 35Sun nivui tawng dunai, kumpibawipa khiah Siria te hmunlam hoi in siphuh leng vumah a caal kongin in to ruai i. Zanlam fangin thi i. A kha hmun ai kumpibawipa thi khiah siphuh leng khang vumah luang i. 36Ni tla fangin, raalkaapte songin, “Mah khua ten le mah ram ten ah tlung tuu-ih,”ti in au i.
37Ciamanin kumpibawipa khai thi ai Samaria ah tlun i. Kumpibawipa khiah Samaria ah vui i. 38Ciafangin mi pakhat in cia siphuh leng khiah Samaria ai tikhur ah som ai, Bawipa ai relhnak bangin, phatemah te takhlu lakin uicote in a thi khiah liak i. 39Ahab bawnhnak a veksen le vuiha thawn a sahnak inn le a sahnak khua veksen khiah Israel kumpibawite thuanthu ca-uk songah khum i lo im? 40Ciamanin Ahab khai a paate bangin thi i. Ciafangin a ca in a fapa Ahaziah khiah kumpibawi cang i.
Jehoshaphat ukhnak thu
41Israel kumpibawi Ahab ukhnak kum li kum ah, Asa fapa Jehoshaphat khiah Judah te kumpibawi cang i. 42Jehoshaphat khiah kumpibawi a cang fangin kum sawmthum le kum nga i ai Jerusalem ah kum kul hluan nga uk i. A nuu hming khiah Shilhi fenu Azubah i. 43A paa Asa lampui ah a vekin hlun i. Bawipa hmai ah a hman khiah bawn ai lamtler lo in hlun i. Ikhalselai a sanghmun ai biahmun innte khiah baal lo i. Ziangmanti fangin mite in cia biahmun inn ah raithawi ai rimhmuite tai i. 44Israel kumpibawipa thawn khai raalrem in um i.
45Jehoshaphat bawnhnak a veksen le a thahat dan le a raaltawng dan khiah, Judah kumpibawite thuanthu ca-uk songah khum i lo im? 46A paa san ai taanghnak mi santlai lo te khiah Judah ramin hnawt sio i. 47Ciafangin Edom ah kumpibawi um lo ai kumpibawipa bawm tu lek um i. 48Jehoshaphat in dawr bawntu te timbawte khiah Orphir ah sui phur tuhin feh ruai i. Ikhalselai cia timbawte khiah feh ngah lo i. Ziangmanti fangin Ezion Keber ah cia timbawi te khoi sek i. 49Ciafangin Ahab fapa Ahaziah in Jehoshaphat hnenah, “I hnenumte khiah na hnenumte thawn timbaw songah feh tu seh.”ti in ti i. Inapui ai Jehoshaphat in nuam lo i.
Ahaziah ukhnak thu
51Judah kumpibawi Jehoshaphat ukhnak kum hlai sarih fangin, Ahab fapa Ahaziah khiah Samaria ah Israel mite uk i. Israel mite khiah kum nih uk i. 52Amah in Bawipa hmai ah a pha lo bawn ai, a paa lampui le a nuu lampui le Israel mite sual ruai tu Nebat fapa Jeroboam lampui khiah hlun i. 53Ziangmanti fangin Baal na per sah ai Baal khiah bia ai, a paa ai bawn awng hnak hmuahhmuah bangin, Israel Bawipa Pathian khiah raw ruai tuhin thintok ruai i.
May11998:7:14PM 11/3/99@9:34PM
01/25/2000@4:37PM