1Rehoboam khiah Jerusalem ah hleng leh fangin, kumpibawi ukhnak ram khiah Solomon fapa Rehoboam hnenah hlen leh tuhin, Rehoboam in Judah mite le Benjamin hin songin mi thawng zakhat le thawng sawmriat khiah Israel mite tawng tuhin ril i. 2Ikhalselai Pathian thu khiah Pathian minung Shemaiah hnenah hleng ai, 3“Solomon fapa, Judah kumpibawi Rehoboam le Judah le Benjamin ram ai umtu Israel mi veksen hnenah, 4‘Bawipa in, “Khiata ah ning unau Israel mite tawng tuhin hong tuh lo i si. Ning vekin ning inn ah tlung tu sio ih. Ziangmanti fangin he khiah kaimah ai bawnhnak i.” ti in ti i.’ti in rel tu.”ti in ruai i. Ciamanin anite khai Bawipa thu khiah ngai ai, Jeroboam khiah tawng lo in anite khai let leh i.
5Ciamanin Rehoboam khai Jerusalem ah um ai Judah ram khakber tuhin khua tamngai sa i. 6A sahnak khuate khiah Bethlehem, Etam, Tekoa, 7Beth Zur, Sokhoh, Adullam, 9Kath, Mareshah, Ziph, 9Adoraim, Lachish, Azekah, 10Zorah, Aijalon, le Hebron te i. Hete khiah Judah le Benjamin ramai a kho ngai ai renhnak khuate i. 11Raalkapte umhmun innte khiah a kho ngai in ren ai, ciata ah raalbawite le rong le thau le capittizu te khawi i. 12Cen khua cang ah lumte le feipuite thawn cia khuate khiah kho ruai i. Cen Judah le Benjamin mite khiah amah in uk i.
13Cen phungkite le Levi te khai amahte umhmun Israel ram ten in Rehoboam thawn tang i. 14Ziangmanti fangin Levi te in amahte lairam le naihhnakte khiah zam ai Judah le Jerusalem ah thawn i. Ziangmanti fangin Jeroboam le a fate in amahte khiah Bawipa phungki tuan siang lo i. 15Jeroboam in amah ca in a sanghmun ai raithawi hmun ca le khuavangte ca le a bawnhnak kawlpaw niu milimte ca in phungkite dah i. 16Levi mite tlan fangin, Israel Bawipa Pathian khiah amahte thinlung ngaingai ai sii tu Israel mi veksen khiah, a paate Bawipa Pathian hnenah raithawi tuhin Jerusalem ah kawi i. 17Ciatih bang in amahte in Judah kumpibawi ram khiah kho ruai ai Solomon fapa Rehoboam khiah kum thum song bawm i. Ziangmanti fangin amahte in kum thum song David le Solomon vak bangin vak i.
18Ciafangin Rehoboam in Mahalath nu i. Mahalath khiah David fapa Jerimoth le Jess fapa Eliah fenu Abihail te fenu i. 19Cia nuu thawn Jeush le Shamariah le Zaham nai i. 20Cia nuu hnua ah Absolom tunu Maakah nu ai, Maakah in Abijah le Attai le Ziza le Shelomith nai i. 21Rehoboam in Absolom tunu Maakah khiah a nu dangte le a nunawn dangte tahin it sawn i. Ziangmanti fangin amah in nu hlairiat le nunawn sawmruk nai ai fapa kul hluanriat le fenu sawmruh nai i. 22Rehoboam in Maakah fapa Abijah khiah a unaute lakah a bawi ber in dah i. Ziangmanti fangin Abijah khiah kumpibawi cang ruai tum i. 23Rehoboam in a fate khiah a fim ngai in sik ai a hrekkhat a fapate khiah Judah le Benjamin ram ai a kho ngai ai renhnak khua cang ah thawn ruai i. Cen amahte ca in nu khai a tamngai sii sah i.