1Manasseh khiah kumpibawi a cang fangin kum hlainih i le Jerusalem ah kum sawmnga le kum nga uk i. 2Ikhalselai Israel mite hleng hlanai Bawipa in hnawt hnak mi phun dangte ai ningdulkul bang in, Bawipa hmai ah a pha lo khiah bawn i. 3Ziangmanti fangin a paa Hezekiah ai bal zohnak a saanghmun ai raithawi hmun innte khiah sa leh sal i. Baalte ca in awlta khai sa i. Cen thing vumah khai milimte zuk i. Cen vancung ai arsite hmuahhmuah khai bia ai amahte naper sah i. 4Bawipa in, “Jerusalem ah i hming khiah kumkhua in um tuh i.” ti ai a relhnak Bawipa inn songah awltate khai sa i. 5Cen vancung ai arsite ca in Bawipa tualvan panih songah awlta khai sa bial i. 6Cen Hinnom Fapa Rawn zawllai ah khai a fapate khiah mai thawn hlu i. Cen amah in tlahsan ai dawite hmang ai polte khai thu zong de i. Bawipa hmai ah a pha lo tamngai bawn ai Bawipa khiah thintok ruai i. 7David le a fapa Solomon hnenah Pathian in, “Israel phun hmuahhmuah songin i rilhnak he inn songah le Jerusalem ah kumkhua in i hming dah tuh ing. 8Cen Moses kut ai i ruaihnak i dan upadi le thukhamte khiah a veksenin hlun lekhaw, amahte khiah a paate hnen ah i pehnak ram songin Israel mite khiah tlan ruai tuh nawn lo ing.” ti ai a ti hnak Pathian inn songah milim te zuk khiah dah i. 9Ciamanin Manasseh in Judah mite le Jerusalem ai umtute khiah Israel mite hlanai Bawipa in rekhnak mi phunte tahin a pha lo bawn tuhin sopaw i.
10Bawipa in Manasseh le a minungte hnenah rel napui ai amahte in ngai nuam lo i. 11Ciamanin Bawipa in Assiria kumpibawipa ai raalbawite khiah a hnenah hlat ai amahte in Manasseh khiah thir huk thawn duk ai dar thirri thawn pen ai Babylon ah thiar teu i. 12Ciatih in rimsu tuar fangin Manasseh khai a paate Pathian hmai ah thinniam ngai in um ai Bawipa a Pathian khiah ninghio kun ai, 13amah hnenah sawngen i. Ciafang in Bawipa in a ninghio kunhnak le a ngenhnak khiah saang sah le za sah manin Manasseh khiah Jerusalem ah kumpibawi cang tuhin kawih leh i. Ciafangin Manasseh in Bawipa khiah Pathian i ti in ling i.
14Ciafangin Manasseh in David Khua pua ah sen khiah Kihon in nitla hmunlam le zawllai hmunah le Nga Dawngkham tian in sa ai Ophel khiah cia sen in kulh ai a saang ngai in sa i. Ciafangin Judah ramai a kho ngai ai renhnak khuate songah raalbawite dah i. 15Ciafangin Manasseh in Bawipa inn songai ram dangte pathiante le milim te khiah lang sio i. Cen Bawipa inn sa hmun mual vumai le Jerusalem ai a sahnak awlta te khai a veksenin bal sio ai khua pua ah lon sio i. 16Cen Bawipa awlta khai rol leh ai a vumah remhnak a hlu le anhnak a hlu khiah hlu ai, Judah mite in Israel Bawipa Pathian khiah naper sah tuhin ruai i. 17Ikhalselai mite in a saanghmun ai raithawi hmun inn ah raithawi hlen i. Inapui ai Bawipa amahte Pathian hnen lekah raithawi i.
18Manasseh bawnhnak hmuahhmuah le a Pathian hnenah a sawngenhnak le Israel Bawipa Pathian hming in amah hnenah thurel tu prawfet te pong hnak khiah Israel kumpibawite ca-uk songah khum liang i. 19Cen a sawngenhnak le Pathian in a ninghio kunhnak saang sahhnak thu le a sualhnak le a khelhhnak hmuahhmuah le a thinniam ruai hlanai a saanghmun ai raithawihnak innte sa hmunte le thing vumah zukhnak le milim zuk a bawnhnakte khiah Hozai relhnak te lakah khum zo peu i. 20Ciafangin Manasseh khai a paate bangin thi ai amah inn ah vui i. Ciafangin a fapa Amon in amah ca in kumpibawi cang i.
21Amon khiah kumpibawi cang fangin kum kul hluannih i ai, Jerusalem ah kum nih uk i. 22Ikhalselai a paa Manasseh ai bawn bangin, ani in khai Bawipa hmai ah a pha lo bawn i. Ziangmanti fangin Amon in a paa ai bawnhnak milim zukte hnenah raithawi ai amahte na per sah i. 23Cen a paa bangin Bawipa hmai ah thinniam in um lo i. Ikhalselai Amon in sual amam i. 24Ciafangin a hnenumte in a thupniu in sawm tlaang ai, amah inn fawm ah rek lio i. 25Ikhalselai cia ram ai mite in Kumpibawipa Amon lakah a thupniu ai thusawm ai rektute khiah rek berh i. Ciafangin cia ramai mite in a fapa Josiah khiah amah ca in kumpibawi cang ruai i.