1Solomon in Bawipa inn le kumpibawipa inn sa ben khelleh kum kul hnua fangin, 2Hiram in Solomon pehnak khuate khiah Solomon in sa leh ai cia khuate ah Israel mite khiah um ruai i. 3Solomon khai Hamath Zobah ah kawi ai cia khua khiah neh lio i. 4Cen nelrawn songah Tadmor khai sa i. Cen Hamath ah rong pamhmun khuate khai sa i. 5Solomon in Beth Horon Cungta le Beth Horon Hniata le khuapui tamngai khai sen le kawl dawngkham le thir pumte kawmin kulh i. 6Baalath le rong pamhmun khuate le a siphuh leng khawi hmun khuate le siphuhto ralkapte umhmun khuate le Solomon in Jerusalem khua ah le Lebanon ah le a ukhnak ram songah a sa nuamhnak bang in sa i.
7Israel minungte lo a taanghnak Amor mi, Hit mi, Periz mi, Hiv mi, Jebus mi, 8(Israel mite in a vuva ai rek ben lohnak mite tesin fate) hete songin Solomon in kuli khuai ai tunnia tianin ciatih bang i hlen i. 9Ikhalselai Solomon in Israel mite khiah kuli in hmang lo i. Amahte khiah a raalbawi, a captain, a siphuh leng uktute le siphuh to ai raalkapte in hmang i.
10A daangte khiah Solomon naper tute khawngtute bawi in dah i. Cia mite khawngtute khiah zanih le sawmnga um i.
11Ikhalselai Solomon in Pharoah fenu khai David Khua in Solomon ai sakhnak innah thawn i. Ziangmanti fangin Solomon in, “I nu khiah Israel kumpibawipa David inn ah um tuh lo i. Ziangmanti fangin Bawipa thingkuang hleng hmunte khiah a cianghlim i.”ti in ti i.
12Solomom in kawka hmai ah a sahnak Bawipa awlta vumah mai thawn taihnak a hlu khiah Bawipa hnenah 13nisiar ai a hlu tuhhnak zah in le Moses ai ruaihnak thukham bangin Sabbath le Hla Thar le kum siar ai puai pathum te, Col tel lo Sangreu Puai, Zarh Puai le Tabernacle Puai fang ai hluhnak khiah hlu i. 14A paa David ai thu bangin, amahte pawl bangin naper tuhin phungkite khiah dah ai Levi te in Pathian cuan tuhin le phungkite khiah nisiar in a kul bangin bawm tuh in dah i. Cen dawngkham kiltute khai amahte pawl bangin dawngkham cang kil tuhin dah i. Ziangmanti fangin cia khiah Pathian minung David ai ruaihnak thu i. 15Amahte in kumpibawipa ai phungkite ruaihnak le Levi mite ruaihnak thu khiah tangka khawihmun thu tian in a veksenin hlun i. 16Solomon naperhnak khiah Bawipa inn a ham ai pan nia ai panin in a ben tian a veksenin bawn liang i. Ciamanin Bawipa inn khiah sa ben i.
17Ciafangin Solomon khai Edom ramai varkam vumai Ezion Keber le Elath ah feh ai ciata ah timbaw tamngai sa i. Ezion Keber khiah Edom ramai Tipui San varkamah um ai Elath hiang ah i. 18Ciafangin Hiram in Solomon hnenah timbawte khiah a hnenumte kut in le tipui lam lingtu a hnenumte kawmin kuat i. Anite khai Solomon hnenumte kawmin Ophir ah feh ai, ciata ah sui talan zali le sawmnga tawk ai Kumpibawipa Solomon hnenah kawih i.