17Judah kumpibawi Ahaz khiah kum hlainih kumpibawi per fangin, Elah fapa Hoshea khiah Samaria ah Israel kumpibawi cang ai kum kua uk i. 2Amah in Bawipa lakah sualhnak bawn i. Inapui ai a hlanai Israel kumpibawite bangin sual lo i. 3Assiia kumpibawi Shalmaneser in Hoshea khiah sim ai, Hoshea khai a kuthnia ah um ai, Hoshea in amah hnenah ngunkhuai tangka pe i. 4Ciafangin Assiria kumpibawipa in Hoshea in tapung tho tuumhnak khiah ling sah lio i. Ziangmanti fangin Hoshea in Izip kumpibawi So hnenah a hnenumte hlat ai, kum khat hnua kum khat a ngunkhuai khiah Assiria kumpibawipa hnenah pe lo i. Ciamanin Assiria kumpibawi in amah khiah pom ai thawnghla i.
5Ciafangin Assiria kumpibawi khai Israel ram pumpalah ah feh ai, Samaria ah hong ai Samaria khiah kum thum songah kulh i. 6Hoshea ukhnak kum kua fangin, Assiria kumpibawipa in Samaria khiah lang ai Israel mite khiah Assiria ah phur ai, Halah le Kozan Run vumai Habor ah le Mede te khua cang ah dah i. 7Ciatih bangin Israel mite in Izip ram le Izip kumpibawi Pharoah kut songai suah tu amahte Bawipa Pathian lakah sual ai, a dang pathiante sawn kih ai, 8Israel mite le amahte bawnhnak Israel kumpibawite hmai ah Bawipa ai hnawt sahhnak mi phunte thu le dan upadi sawn hlun i. 9Cen Israel mite in a thupniu in amahte Bawipa Pathian hmai ah bawn ai, amahte ca tuhin amahte khua caang ah, raalvil hmun khua le a renhnak khua caang ah a saanghmun ah raithawi hmun bawn i. 10Amahte in mual saang vum le thinghing hnia caangah milim zuk le khante khiah sa i. 11Amahte hlanai Bawipa ai thiarhnak minung te bangin, amahte in a saanghmun caang ah rimhmui tai ai Bawipa thinraw ruai tuhin a pha lo bawn in thintok ruai i. 12Ziangmanti fangin, Bawipa in amahte hnenah, “Hetih bangin bawn tuh lo i si.” ti in rel napui ai amahte in milim te khiah bia tekto i.
13Ikhalselai Bawipa in Israel le Judah mite hnenah a prawfette songin, “Ning sualhnak lampui in let in ning paate hnenah i hnenum prawfette songin i relhnak thu le dan upadi khiah hlun tuu-ih.” ti in tiam napui i. 14Ikhalselai amahte in ngai nuam lo ai, amahte Bawipa Pathian sang awng lo tu a paate bangin ungtuang in um i. 15Amahte in Bawipa in a paate thawn thukham dunhnak le a dan upadite khiah el ai, amahte lakah a tettikhanhnakte khiah daih sah lo i. Bawipa in ning hiang cingkim ai mi phun dangte bangin bawn mah ilaw ti ai tiamhnak thu khiah el ai milimte khiah hlun ai milimte khiah bia i. 16Ciatih bangin amahte in amahte Bawipa Pathian thukham khiah a veksenin zam ai, milim le kawlpaw zuk panih le thing thawn bawnhnak zuk le van vumai arsi hmuahhmuah khiah bia ai Baal khai na per sah i. 17Amahte fapa le fenute khiah mai in tai in raithawihnak in hmang ai, dawi khiah hmang ai tlahsan i. Bawipa raw ruai tuhin Bawipa hmai ah sualhnak bawn tuhin amahte pum khiah zuar i. 18Ciamanin Bawipa khai Israel mite lakah thinraw rauh ai, amahte khiah a veksenin a hmai in tlan ruai sio i. Judah hin siar lo pakhat khai taang lo i.
19Judah in khai amahte Bawipa Pathian thukham khiah hlun lo ai, Israel mite bawnhnak khiah cung ve i. 20Ciamanin Bawipa in Israel tesin fate khiah a veksenin hnawl berh ai amahte khiah rimh ai, Amah hmai in amahte khiah lon berh hlan lo, miroktute kut songah ap i. 21Ziangmanti fangin, Bawipa in Israel khiah Judah ram songin khan ai, amahte in Nebat fapa Jeroboam khiah kumpibawi ah bawn i. Ciafangin Jeroboam in Israel mite khiah Bawipa hlun siang lo in hnawt ai, amahte khiah sual lianpui bawn ruai i. 22Ziangmanti fangin, Israel mite in Jeroboam sualhnak veksen khiah hlun ai, cia sualhnak hmunin tlan tau lo i. 23Ciamanin Bawipa in a hnenum prawfet veksen songin rel bang in, Israel mite khiah a hmai in tlan ruai sio i. Ciamanin tunnia tian in Israel mite khiah amahte ramin Assiria ramah phur sio i.
24Ciafangin Assiria kumpibawipa in Babylon le Kuthah le Ava le Hamath le Sepharvaim ai mite khiah lang ai Samaria khua te songah Israel mite ca in haih i. Amahte in Samaria khiah ping ai Samaria khua caang ah um i. 25Amahte in Samaria khua caang ah to ngom fangin Bawipa khiah bia hal lo i. Ciamanin Bawipa in amahte hnenah chintitte hlat ai a hrekkhatte khiah chintitte in rek i. 26Ciamanin amahte in Assiria kumpibawipa hnenah, “Samaria khua caang ah na dahhnak na thiarhnak mi phundangte in, he ramai Pathian bia dan ling lo manin, Amah in chintitte hlat ai amahte hrekkhat khiah rek i. Ziangmanti fangin amahte in he ramai Pathian bia dan ling lo i.” ti in rel i. 27Ciafangin Assiria kumpibawipa in, “Cia ramai ning kawihhnak phungki khiah cia ramah kuat leh tuu-ih. Amah khiah cia ramah um tu selai, amahte khiah cia ram ai Pathian bia dan khiah cuk tu seh.” ti in ruai i. 28Ciafangin amahte in Samaria ai phurhnak phungkite songin phungki pakhat khiah kawih ai Bethel ah khuato ai Bawipa bia dan khiah cuk i.
29Ikhalselai mi phun caangin amahte pathian ten bawn ai amahte umhmun khua caang ah, Samaria mite ai sahnak a saanghmun ai innah amahte pathian ten dah i. 30Babylon mite in Sukkoth Benoth bawn i. Kuth mite in Nerkal bawn i. Hamath mite in Ashima bawn i. 31Avi mite in Nibhaz le Tartak bawn i. Sephar mite in amahte fate khiah Sepharvaim te pathiante Adramelek le Anammelek hnen ah mai in tai ai hlu i. 32Ciatih bangin amahte in Bawipa khiah kih ai, amahte phun caang songin a saanghmun ai zuk hmai ah raithawi tu tuhin phungki te khiah ril i. 33Amahte in Bawipa khiah bia napui ai, amahte um awng hmun amahte ramai bangin amahte pathian ten khai bia pah hlen i. 34Tunnia tianin amahte bia dan kel in bia hlen i. Amahte in Bawipa khai bia lo ai, Israel ti in Bawipa in kohnak Zakuk tesin fate hnenah Bawipa in pe hnak dan le upadi le thukhamte khai hlun cuang lo i. 35Bawipa in Israel mite thawn thukham dun fang in, “A dang pathiante khiah bia tuh lo i si. Amahte hmai ah sikhu tuh lo i si. A na khai per sah tuh lo i si. Rai khai thawi tuh lo i si. 37 Cen ningmah ca in Amah in nganhnak dan le upadi le thukhamte khiah a kung niu in a kumkhua in hlun tuh i si. A dang pathiante khiah bia tuh lo i si. 38Cen ningmah thawn ai lungkhim dunai thukhamhnak khiah hai tuh lo i si. A dang pathiante khai bia tuh lo i si. 39Ikhalselai Bawipa ning Pathian lek bia tuh i si. Amah in ning raalte veksen hmunin ning suah tuh i.” ti in rel i. 40Ikhalselai amahte in ngai nuam lo ai amahte bia dan kel in bia ngio i. 41Ciatih bangin he mi phun dangte in Bawipa khiah bia kong in amahte in mi zukte khai bia pah i. Ciatih bangin amahte fate le a fate fate in khai a paate bangin tunnia tianin bawn hlen i.