1Ciafangin Elisha in a fa nung ruai sah leh hnak nupui nuu hnenah, “Tho tulai na innkua kawmin ram dang ah vai tuu-ih. Ziangmanti fangin Bawipa in rian kum sarih song he ramah tlung ruai tuh i.” ti in rel i. 2Ciamanin cia nuu khai tho ai Pathian minung paa ai relhnak bangin bawn ai a innkua kawmin Filistin ramah kum sarih vai i. 3Kum sarih hnua fangin cia nuu khai Filistin ramin tlung leh i. Ciafangin ani khai a inn le a lo te khiah ngen leh tuhin kumpibawipa hnenah kawi i. 4Ciafangin kumpibawipa in Pathian minung paa hnenum Kehazi hnenah, “Elisha ai bawnhnak naper lian ngai ngai te khiah a veksenin i rel tu.” ti in ngen i. 5Elisha in mi thi nung ruai leh thu khiah Kehazi in kumpibawipa rel laitak in, a fa nung ruai sah lehhnak cia nupui nuu khai a inn le a lo ngen tuhin kumpibawipa hnenah lo kawi ngelcel i. Ciamanin Kehazi in, “I bawipa, aw kumpibawipa, cia nuu khiah he nuu i. Cen a fapa khiah Elisha ai nung ruai lehhnak i.” ti in rel i. 6Kumpibawipa in cia nuu khiah zawt fangin cia nuu in rel i. Ciamanin kumpibawipa in a nalaang pakhat khiah ko ai, “He nuu naihhnak le a lo songai suakhnak khiah Filistin ramah a vai nia ai panin tunnia tian a veksenin khirh leh tu seh.” ti in ruai i.
Ben-Hadad thihnak thu
7Ciafangin Elisha khai Damaskhas ah feh ai, Siria kumpibawipa khiah lo ur i. Ciafangin amah khiah, “Pathian minung paa khiah heta ah hleng i.” ti in rel i. 8Ciafangin kumpibawipa in Hazael hnenah, “Na kutah lehsawng lang tulai, Pathian minung paa hnenah kawi tulai, ‘He urhnak songin i cak leh ngai im?’ ti in amah in Bawipa khiah i zawt sah tu seh.” ti in ruai i. 9Ciamanin Hazael khai Damaskhas ai thil pha pha lehsawng khiah kala-uk sawmli phurh ai Elisha tawk tuhin kawi i. Ani khai Elisha hmai ah ding ai, “Na fapa Siria kumpibawipa in, ‘He urhnak songin i cak leh ngai im?’ ti in na zawt tuhin i hlat i.” ti in rel i. 10Ciafangin Elisha in amah hnenah, “Feh tulai, ‘Na cak tuh rori i.’ ti in rel tu. Ikhalselai amah khiah thi tuh ngaingai khiah Bawipa in i hmuh zo i.” ti in ti i. 11Ciafangin Elisha in Hazael khiah mitkhep lo in sik meng fangin, Hazael khai zakthi i. Ciafangin Pathian minung paa khai kap i. 12Ciafangin Hazael in, “I bawipa, zaimanin kap i si?” ti in zawt i. Ciafang Elisha in, “Aw nangmah in Israel mite vumah a pha lo bawn tuh i si. Amahte buanhmun khuate khiah mai thawn tai sah tuh i si. A tlangvalte khiah vangsau thawn rek sah tuh i si. A fate khiah seu tuh sio i si. Naupaai nupangte khiah a pum at in kholh sah tuh sio i si.” ti in rel i. 13Ciamanin Hazael in, “Na hnenum kaimah in ciabang hlaihor ai bawn tuh khiah zai bang minung i tuh ing? Uico i awng ing?” ti in sawn i. Ciafangin Elisha in, “Bawipa in nangmah khiah Siria kumpibawi cang tuhin i hmuh zo i.” ti in rel i. 14Ciafangin ani khai Elisha hmunin feh ai a bawipa hnenah hleng fangin, a bawipa in, “Elisha in zai na rel pa? ti in zawt i. Ciafangin amah in, “Na cak tuh rori i ti in i rel i.” ti in sawn i. 15Ikhalselai ani khai a thangha fangin, pon sah ngai khiah lang le ti songah nim ben fangin, cia pon thawn a hmai khiah khuk sah ai Ben-Hadad khai thi i. Ciafangin ani ca in Hazael in kumpibawi cang i.
16Israel kumpibawipa Ahab fapa Joram in kum nga uk fangin, Jehoshaphat khiah Judah kumpibawi lo i awng le, a fapa Jehoram khiah Judah kumpibawi cang pan i. 17Amah khiah kumpibawi cang fangin kum sawmthum le kum nih i ai, Jerusalem ah kum riat uk i. 18Ahab innkua te bangin, ani khai Israel kumpibawi te bangin nung i. Ziangmanti fangin Ahab fenu khiah a nu i. Ciamanin Bawipa hmai ah sualhnak lek bawn i. 19Ikhalselai Bawipa in David hnenah amah le a fapate hnenah mai-inn khiah kumzangza in pe tuhin thukham manin, David manin Bawipa in Judah khiah hnawmcan nuam lo i. 20Ciafangin Edom mite in Judah kuthnia in suak tuhin tawng ai, amahte in kumpibawi ril i. 21Ciamanin Joram le a siphuh lengte a veksen kawmin Zair ah feh i. Ani khai zanlai in tho ai amah le a siphuh leng khawngtu bawite khiah a kulhtu Edom mite khiah taih i. Ikhalselai amahte khiah sung ai amahte buk ten ah tlung sek i. 22Ciatih bangin tunnia tianin Edom khiah Judah kuthnia ah um lo i. Ciateng in Libnah mite khai Judah kuthnia in suak tuhin tawng ve i.
23Joram ai bawnhnak khiah a veksenin Judah kumpibawite thuanthu ca-uk songah khum i lo im? 24Ciamanin Joram khai a paate bangin thi ai a paate thawn David Khua ah vui i. Ciafangin a fapa Ahaziah in a in kumpibawi tuan i.
25Israel kumpbawi Ahab fapa Joram in kum hlainih uk fangin, Judah kumpibawi Jehoram fapa Ahaziah in kumpibawi tuan pan i. 26Ahaziah khiah kumpibawi cang pan fangin kum hluannih i ai, Jerusalem ah kum khat uk i. A nuu khiah Israel kumpibawi Omri tunu Athaliah i. 27Amah in Ahab innkuate bangin nung ai, Ahab innkua te in sual bangin Bawipa hmai ah sualhnak lek bawn i. Ziangmanti fangin amah khiah Ahab tupa i.
28Ciafangin ani khai Ahab fapa Joram thawn Siria kumpibawipa Hazael tawng tuhin Ramoth Kilead ah feh i. Ciafangin Siria mite in Joram khiah kha lio i. 29Ciafangin Kumpibawipa Joram in Siria kumpibawipa khiah Ramah ah tawng fangin, Siria mite in Joram khiah kha lio manin, Joram khai Jezreel ah a urhnak bawl tuhin let i. Ciafangin Judah kumpibawipa Jehoram fapa Ahaziah khai Ahab fapa Joram khiah ur manin fan tuhin Jezreel ah feh i.