Amnon le Tamar thu
1Ciafangin David fapa Absalom in Tamar tihnak farnu pakhat nai ai amah khiah mawi ngai i. David fapa Amnon in Tamar khiah tlak i. 2Amnon khai a farnu Tamar manin thincawl rauh in um ai, a ur in ur ngal i. Ziangmanti fangin Tamar in tlangval thawn itkhat awng lai lo i. Amnon in Tamar lakah bawn tuh khai mawi lo i. 3Ikhalselai Amnon in rual pakhat nai ai a hming khiah Jonadab i. Amah khiah David u Shimeah fapa i. Jonadab khiah ngian nai bik i. 4Ciafangin amah in Amnon hnenah, “Kumpibawi fapa i lon si ai zaimanin ni khat hnua ni khat na rom riaro i? I rel na nuam lo im?ti in zawt i. Ciafangin Amnon in amah hnenah, “I u Absalom farnu Tamar khiah tlak ing.”ti in rel i. 5Ciafangin Jonadab in Amnon hnenah, “Na khuahluan vumah it tulai a ur tuah tu. Na paa in na fan fangin, amah hnenah, ‘Ninghio in i farnu Tamar khiah kawi tu selai, i mit hmuh in a kut in rong i suan sah tu selai, a kut songin ei ngang.’ti in rel tu.”ti in ruai i.
6Ciamanin Amnon khai taal ai ur khel i. Kumpibawipa in fan fangin, Amnon in kumpibawipa hnenah, “Ninghio in i farnu Tamar khiah kawi ruai tulai, i mit hmuh in pawnghmuk panih i bawt tu selai a kut songin ei ngang.”ti in rel i. 7Ciafangin David in Tamar khiah a inn ah ko ai, “Na u Amnon inn ah kawi tulai, rong suan tu.”ti in ruai i. 8Ciamanin Tamar khai a u Amnon inn ah kawi i. Amnon khai a taal in um i. Tamar in sangvut khiah lang ai hmet ai Amnon hmai ah pawnghmuk in bawn ai em i. 9.Ciaben fangin pakan songah a hmai ah bung i. Ikhalselai Amnon in ei nuam lo i. Ciafangin Amnon in, “I hmunin mi vesken tlan tu seh.”ti in ti ai mi veksen khai tlan i. 10Ciafangin Amnon in Tamar hnenah, “Khan songah rong kawih tulai, na kut song in ei ngang.”ti in ti i. Ciafangin Tamar in a emhnak pawnghmuk khiah a u Amnon hnenah khan songah tlum i. 11Tamar in ciatihin a hnenah kawih fangin, Amnon in Tamar khiah pom ai amah hnenah, “Itkawm nga sing, i farnu.”ti in rel i. 12Ciafangin Tamar in, “I lo i, i u. I ruai bel mah. He bang heh Israel ramah bawn dan lo i. He bang voihnak khiah bawn mah. 13I zakthihnak khiah a konah kawi ruai thill tuh ing? Cen nang khai Israel ah mivoi bang na cang tuh i. Ciamanin, ninghio in kumpibawi hnenah ngen tulai, na sianglo in um tuh lo ngawn i.”ti in ti i. 14Ikhalselai a relhnak khiah ngai nuam lo i. Ikhalselai amah khiah thahat sawn manin, cia nuu khiah neh ai itpui i.
15Ciafangin Amnon in cia nuu khiah hua rauh i. Amah in cia nuu huahnak khiah a tlakhnak tah in rauh sawn i. Ciafangin Amnon in amah hnenah, “Tho tulai tlan tu teu.”ti in ruai i. 16Ciafangin cia nuu in, “I lo i. Hetih ai i tlan ruai heh i vumah na bawn zohnak tahin sia sawn i.”ti in ti i. Ikhalselai amah in ngai nuam lo i. 17Ciafangin a hnenumte khiah ko ai, “He nuu khiah sumpua ah suah tu i lai, dawng kalh tuu-ih.”ti in ruai i. 18Ciafangin Tamar in pianzia tamngai nai thuam lo sil i. Ziangmanti fangin kumpibawi fenu tlangval thawn it awng lote in ciatih in thuam de i. Ciafangin a hnenum in cia nuu khiah sumpua ah suah ai dawng kalh i.
19Ciafangin Tamar khai a lu ah vutkuang dah ai a pianzia tamngai nai thuam khiah zik ai a kut khiah a lu vumah dah in kap kongin feh i. 20Ciafangin a hmingpa Absalom in a hnenah, “Amnon na u in na itpui im? I farnu, pong lo niu in um tu hlen. Amah khiah na u i. A thupui in lo ruat mah.”ti in rel i. Ciamanin Tamar khai a hming pa Absalom innah lungsia ngai in um i.
21Ikhalselai kumpibawipa David in he thu khiah za fangin, thinraw ngai i. 22Absalom in a nau Amnon hnenah a pha le a sia khai pong lo i.Ziangmanti fangin Amnon in a farnu Tamar khiah a nuam lo puipa ai itpui manin hua i.
23Kum nih fangin, Absalom tuhmul mettute khiah Efraim ram hiang Baal Hazor ah kawi ai, Absalom in kumpibawi fapate khiah a vekin ko i. 24Absalom khai kumpibawipa hnenah kawi ai, “Na hnenum in tuhmul mettute nai ing. Kumpibawipa le a hnenumte khiah na hnenum thawn ninghio niu in kawi tuu-ih.”ti in ti i. 25Ciafangin kumpibawipa in, “I fapa, tunin kin veksenin kawi pha lo i. Na rim mawh ze ngai.”ti in sawn i. Amah khiah so napui ai kawi nuam lo i. Ikhalselai hmuifu bur i. 26Ciafangin Absalom in, “Ilekhaw, i nau Amnon khiah ninghio in kin kawm in kawi ruai tu.”ti in ti i. Ciafangin kumpibawipa in, “Zaimanin nang thawn kawi tuh i?”ti in ti i. 27Ikhalselai Absalom in ngen bel manin, Amnon le kumpibawi fate khiah amah thawn feh ruai i.
28Ciafangin Absalom in a hnenumte khiah, “Amnon khiah cul tu i lai, amah khiah capittizu thawn kham fangin, ‘Amnon seu tuu-ih.’ ti in ning rel fangin, amah khiah rek tuu-ih. Lau mah ih. Ning ruai zo i lo ing? Raalpha tu i lai kih mah ih.”ti in tiam cia i. 29Ciafangin Absalom hnenumte in Absalom ai ruai bangin Amnon vumah bawn i. Ciafangin kumpibawipa fate khai a veksenin tho ai amahte lak vum ten ah to ai tlan sio i.
30Anite khai ciatih in lamah a tlan teng fangin, David hnenah, “Absalom in kumpibawi fate a veksenin rek sio ai pakhat khai taang bul lo i.”ti in thuthan i. 31Ciafangin kumpibawipa khai tho ai, a thilthuam khiah zik ai laipua ah taal ai, a hnenumte khai amahte thilthuam zik in ding tlang i. 32Ciafangin David u Shimeah fapa Jonadab in, “Kumpibawipa fate hmuah rek sio i ti in i bawipa in lo vuah ma seh. Ziangmanti fangin Amnon lek thi ngawn i. Ziangmanti fangin Amnon in Tamar khiah itpui nia ai panin hetih bangin bawn tuhin Absalom in tumciahnak i. 33Ciamanin kumpibawi pa in kumpibawi fate khiah a veksein thi i ti in ruat ma seh. Ziangmanti fangin Amnon lek thi ngawn i.”ti in rel i. 34Ikhalselai Absalom tu tlan teu i. Ciafangin tlangval pakhat khai khuahlir in sik fangin a hnualam ai mual naak ai lampui vumah mi tam ngai kawi khiah hmu i. 35Ciafangin Jonadab in kumpibawipa hnenah, “Kumpibawi fate hleng i hang. Na hnenum in na rel bangin khim i.”ti in ti i. 36A pong ben sawng fangin, kumpibawi fate khai hleng ai, anite khai kap tlang i. Ciafangin kumpibawipa le a hnenumte khai lungsia ngai in kap tlang i.
37Ikhalselai Absalom tu tlan teu le Keshur kumpibawi Ammihud fapa Talmai hnenah feh i. Ciafangin David in a fapa khiah nisiar in kah i. 38Kumpibawipa David in Absalom hnenah kawi tuh khiah umm rauh i. Ziangmanti fangin Amnon thi zo manin ani khai thinnuam leh i.