1Kumpibawipa Belshazzar in a tlangsuak te thawngkhat ca in puai lian ngai bawn ai, cia thawngkhat te thawn capittizu ding i. 2Ciatih in Belshazzar in zu tep teng fangin, a pa Nebukhadnezzar in Jerusalem temple ai phur hnak sui le ngun bel te khiah kumpibawipa le a tlangsuak te le a nu te le a nunawn te kawm in cia songin capittizu ding tuhin Belshazzar in kawih tuhin thu pe i. 3Ciafangin amahte in Jerusalem ai Pathian inn songai langhnak sui bel te khiah kawih ai kumpibawipa le a tlangsuak te le a nu te le a nunawn te khiah cia thawn in ding i. 4Anite khai capittizu khiah ding ai sui le ngun le dar le thir le thing le lungto pathiante khiah cuan i.
5Ciafangin ciateng ah minung kut zungte khiah dak ai, mai-inn varhmun hmai ai kumpibawipa inn songai bilatmi mathnak bangkhang vumah lai ngan i. Kumpibawipa in lai ngan tu kut khiah hmu i. 6Ciafangin kumpibawipa mithmai khai thleng ai, lau rauh manin a khuk te khai thing biabo ai a ke te khai tha nai nawn lo i. 7Ciafangin kumpibawipa in aw cawm ngai thawn arsi sik thiam te le Khaldean te le pol te khiah kawih ruai i. Ciafangin kumpibawipa in Babylon ai mifim te hnenah, “He lai nganhnak khiah siar thiam in a dikbe i let sah thiam tu pa khiah, pon num silh tuhai a hawng ah sui khi awr tuh le kumpibawi ukhnak songah uk tu pathum hnak i tuh i.”ti in rel i. 8Ciafang in kumpibawipa mifim te khai kawi napui ai a ngan hnak lai khiah siar thiam lo i. Cen kumpibawi hnenah a dikbe khai let sah thiam lo i. 9Ciafangin Kumpibawipa Belshazzar khai thin lau rauh ai a hmai khiah thleng ai a tlangbawite khai thincawl in um i.
10Ciafang in kumpibawinu khai kumpibawipa le a tlangsuak te thu relhnak manin puai bawn hmun khaan songah lut i. Ciafangin kumpibawi nu in, “Aw kumpibawipa, kumzangza in na nung tu seh. Thincawl in um mah. Na mithmai khai sia mah. 11Na kumpibawi ram songah a Cianghlim Pathian Rauhla nai tu mi pakhat um i. Na paa san lai ah, amah song ah khuavar le thiam hnak le fim hnak khiah pathian te fim hnak bang um i. Na paa Kumpibawipa Nebukhadnezzar, kumpibawipa na paa in amah khiah mitkher thiam te le arsi sik thiam te le Khaldean te le pol te lakah a bawi ber in dah awng i. 12Kumpibawipa in Belteshazzar ti ai kohnak Daniel in fim hnak le ling hnak le mang let thiam hnak le a ling har ngai santeh hnak te khiah ling thiam le let thiam manin amah khiah ko tulai, na let sah tuh i.”ti in rel i.
13Ciamanin Daniel khai kumpibawipa hmai ah kawih i. Ciafangin kumpibawipa in Daniel hnen ah, “Nangmah khiah i paa kumpibawipa in Judah ram ai thawngtla ai kawih hnak Daniel i aw sim? 14Na song ah Pathian Rauhla um manin, nangmah in khuavar le thiam hnak le a pha ngai fim hnak nai i ti in na zazo ing. 15Tun in arsi sik thiam mifim te khiah he lai ngan hnak siar in a dikbe i rel tuhin i hmai ah kawi zo i. Ikhalselai amahte in he lai khiah i let sah ben lo i. 16Cen nangmah in a ling har ngai thu te khiah let thiam i ti in na zazo ing. He lai nganhnak khiah siar thiam in a dikbe i let sah thiam lesikhaw, pon num na silh tuhai na hawng ah sui khi na awrh tuh ai kumpibawi ukhnak songah uk tu pathum hnak i tuh i si.”ti in ti i.
17Ciafangin Daniel in kumpibawi hnenah, “Na lehsawng khiah nangmah in nai tu hlen. Ihlahle mi dang pe tu. Ikhalselai he lai ngan hnak khiah kumpibawi hnenah siar sah tuh ing. Cen a let hnak a dikbe khai na rel tuh ing. 18Aw kumpibawipa, a Saangber Pathian in na paa Nebudkhadnezzar khiah kumpibawi cang ruai ai thangphat hnak le zul hnak thawn kumpibawi ram pe i. 19Pathian in amah khiah kumpibawi cang ruai manin, mi phun hmuahhmuah le ram hmuahhmuah le pon hin caang pong tute in amah khiah kih in thing biakbo in um i. A nuam hnak mi te khiah rek i. A nuam hnak mi te khiah nung ruai i. A nuam hnak te khiah do i. A nuam hnak mi te khiah niam ruai i. 20Ikhalselai a thin khiah hngal fangin amah khiah a kumpibawi tauhkheng vumin lon i. Amahte in a thangphat hnak khiah sut lio i. 21Ciaben fangin amah khiah minung te lak in hnawt ai, a thinlung khiah ramsa bang in bawn sah ai, amah khiah hampalak ai lak te umhmun ah um i. Amahte in kawlpaw bang in hampa ei ruai ai amah in a Sangber Pa in minung te kumpibawi ram khiah uk ai cia ram khiah a nuam bang in a ril hnak pa hnenah pe i, ti khiah a ling hlan lo a ruang khiah van ai naidawh thawn beh i. 22Ikhalselai a fapa nangmah Bel shazzar in hete khiah a veksen in ling napui ai na thinlung khiah niam nawn lo i si. 23Nangmah in nangmah veve khiah vancung Bawi pa lakah hngal i si. Amahte in Pathian inn songai bel te khiah na hmai ah kawih ai nangmah le na tlangsuak te le na nu te le na nunawn te thawn cia bel song in capittizu ding i si. Ciafang in khua khai hmu lo za khai za lo ling khai ling lo sui le ngun le dar le thir le thing le lungto pathiante khiah cuan i si. Inapui ai na haihawh le na nuncan hmuahhmuah a veksen in a kut songah na awh sah tu Pathian khiah thangphat lo i si. 24Ciafangin he kutzung te khiah amah in hlat ai he lai khiah ngan i.
25He khiah a ngan hnak lai i.
MENE, MENE, TEKEL
UPHARSIN
26He khiah a let hnak a dikbe i. Mene: Pathian in na kumpibawi ukhnak camcu khiah na siar sah ai siar ben zo i. 27Tekel: Nangmah khiah zazu thawn na teh ai na sam lio i. 28Peres: Na kumpibawi ukhnak ram khiah khan zo ai Medes le Persia mite hnenah pe zo i.”ti in rel i. 29Ciafang in Belshazzar in ruai bangin, amahte in Daniel khiah pon num silh ai a hawng ai sui khi awrh le amah khiah kumpibawi ukhnak ram songah uk tu pathum hnak tuhin thu suah i.
30Cia zan rori ah Khaldean te kumpibawipa Belshazzar khiah rek lio i. 31Ciafangin Medes te Darius in kumpibawi ram khiah co ai amah khiah kum sawmruk le kum nih i.