1Ning paate BAWIPA Pathian in ping tuhin ning pehnak ramah laivum ah ning nung song hmuah in ralring in hlun tuhhnak dan upadi le thukhanhnakte khiah hete i. 2Ning hnawthnak mite in amahte pathiante na per sah hmun mual sang vum i tu seh tlaang vum i tu seh thing hing hnia cang ah i tu seh cia hmun khiah hnawmcan tuh berh i si. 3Amahte awlta khiah hnawmcan sah tuh sek i si. Amahte khan khiah ek sah tuh sek i si. Amahte thing milim zuk khiah mai in tai sah tuh i si. Amahte suaihnak pathiante zuk khiah cem sah tuh sio i si. Cia hmunin amahte hming khiah hnawmcan tuh sio i si. 4Cia thilte thawn BAWIPA ning Pathian khiah bia tuh lo i si. 5Ikhalselai BAWIPA ning Pathian in a hming dah hmun tuh ai rilhnak inn khiah sii tuh ai ciata ah kawi tuh i si. 6Ciata ah mai ai taihnak a hlu, ning raithawihnak, ning sephuhtaphuh, ning kut ai hluhnak a hlu, a siang ai ning hluhnak le ning suum songai a te hmasaber kawlpaw le tuu le me khiah kawih tuh i si. 7Ciata ah BAWIPA ning Pathian hmai ah ei tuh ai BAWIPA ning Pathian in ning kut ai perhnak hmuahhmuah vumah hmuifu ning bur manin ang tuh i si. 8Tunin kinmah nuam tenin bawn bangin ciata ah bawn tuh lo si. 9Ziangmanti fangin tuntu BAWIPA ning Pathian ai ning pehnak comhmun le rothil hnenah hleng lai lo i si. 10Ikhalselai Jordan run khiah tan in BAWIPA ning Pathian in co tuhin ning pehnak ramah ning to fangin le ning raalte hmunin a muang niu in um tuhin ning dah fangin 11BAWIPA ning Pathian in a hming umhmun tuh ril tuh i. Ciata ah i ruaihnak, ning mai thawn taihnak a hlu, ning raithawihnak, ning sephuhtaphuh, ning kut ai hluhnak a hlu, BAWIPA hnenah a pha ber letlo hlu tuh ai ning khamhnak khiah kawih tuh i si. 12Ciafangin ningmah le ning fapate le ning fenute le ning pasal hnenum le ning nupang hnenum te kawmin BAWIPA ning Pathian hnenah ang tuh i si. Cen Levi te kawmin khai BAWIPA ning Pathian hnenah ang tuh i si. Ziangmanti fangin Levi te in ning lakah a covo le rothil nai lo i. 13Ning nuam hmun cang ah mai ai taihnak a hlu khiah hlu tuh lo in ralring tuu-ih. 14Ikhalselai BAWIPA in ning hin song ai rilhnak hmunah ning mai ai taihnak a hlu khiah hlu in ciata ah i ruaihnak khiah a veksenin bawn tuh i si.
15Ikhalselai ning kawl dawngkham songah ning rekhnak sa khiah ning nuam bangin ei thai i si. BAWIPA ning Pathian in ning pe zo ai hmuifu ning bur zo i. A ciang lo le a ciang sa te sakhi sa le kiho sate ei thai i si. 16A thi zong ei tuh lo i si. Ti bangin laipua ah lai tuh i si. 17Ikhalselai ning kawl dawngkham songah rongmu sephuhtaphuh le capittizu thar le ning thau le ning suum a te hmasaber kawlpaw le tuu le me le hlu tuhai ning khamhnak a hlu le ning siang manin ning hluhnak le ning kut ai hluhnak khiah ei tuh lo i si. 18Ikhalselai cia te khiah BAWIPA ning Pathian ai ril hmunah ning fapa le ning fenu le ning pasal hnenum le nupang hnenum le ning kawl dawngkham songai umtu Levi te kawmin BAWIPA ning Pathian hmai ah ei tuh i si. Ning kut ai perhnak a veksen ca in BAWIPA ning Pathian lakah ang tuh i si. 19Ning ram songah ning um song hmuah in Levi te khiah hai tuh lo in ralring tuu-ih.
20BAWIPA ning Pathian in thu ning kham bangin ning ramri khiah kau ruai fangin, sa ning rawp manin, ‘Sa ei ngang,’ti in ti leisikhaw ning duh zah in sa khiah ei tuu-ih. 21BAWIPA ning Pathian in a hming dah hmun khiah ning thawnin ning hla ze lekhaw, BAWIPA ai ning pehnak suum songin kawlpaw le tuu le me khiah ro tu i lai kaimah ai ruaihnak bangin ning duh zahin ning kawl dawngkham songah ei tuu-ih. 22Kiho le sakhi sa ei bangin ei tuu-ih. 23A thi zong ei tuh lo in ralring tuu-ih. Ziangmanti thi songah nunhnak um i. Nunhnak khiah a sa thawn ei tuh lo i si. 24Thi khiah ei tuh lo i si. Ti bangin laipua ah lai tuh i si. 25BAWIPA hmai ah ning bawnhnak khiah pha lekhaw ning song ai ning fate kawmin ning pha tuh i. Ciamanin thi khiah ei tuh lo i si. 26Ning naihnak a cianghlim thilte le ning khamhnak a hlu lek BAWIPA ai rilhnak hmunah kawih tuh i si. 27Cen mai thawn taihnak a hlu sa le a thi khiah BAWIPA ning Pathian ai awlta vumah hlu tuh i si. Ning raithawihnak a thi khiah BAWIPA ning Pathian awlta vumah lai tu i lai a sa khiah ei tuu-ih. 28I ruaihnak he thute khiah ngai in hlun tuu-ih. BAWIPA ning Pathian hmai ah a pha le a hman in ning bawn fangin ningmah le ning songai ning fate khai kumzangza in nunnuam tuh i.
29BAWIPA ning Pathian in ning ai hnawt tuhai ning fehhnak mite khiah ning hlanin hnawmcan in hnawt in ningte khai amahte ram ah ning um fangin 30amahte khiah ning hmai ah hnawmcan ben fangin, amahte khiah hlun in thang bangin ning awk ruai tuh khiah ralring tuu-ih. Cen amahte pathian thu khai, ‘He mite in a pathian khiah a kontih in na per sah i? Kai khai cung ve ngang’’ti in zawt mah ih. 31Anite bangin BAWIPA ning Pathian khiah bia tuh lo i si. Ziangmanti fangin BAWIPA in ningdul ai huahnak thil khiah amahte in amahte pathiante hnenah bawn i. Ziangmanti fangin amahte in amahte fapa le fenute khiah a pathiante hnenah mai in tai i. 32I ruaihnak menma hmuah hlun tuhin ralring tuu-ih. Belh khai belh tuh lo si. Cen hnuk khai hnuk tuh lo i si.