1Raaltawng tuhin ning feh fangin ning hnak in tam sawn mi le siphuh le siphung lengte khiah ning hmu fangin amahte khiah kih mah ih. Ziangmanti fangin Izip ramin ning suahtu ning Bawipa ning Pathian khiah ning hnenah um i. 2Raal ning tawng banghma fangin phungki pa in mi zapui hnenah kawi in thurel tu seh. 3Phungki pa in, “Aw, Israel mite, ngai tuu-ih. Tunnia ah ning raalte tawng banghma i hang i si. Thin zul mah ih. Lau mah ih. Thing biakbo in um mah ih. Amahte in ning lau ruai ma seh. 4Ziangmanti fangin ning Bawipa ning Pathian khiah ningmah thawn feh tuhai ning tawng sah tuhai ning o tuh i. 5Ciafangin raalbawite in mite hnenah, ‘Inn thar sa in a hluh man lai lo aisu um i si? Cia pa khiah a inn ah tlung tu seh. Cialo fangin raaltawng in thi pang selai mi dang in a inn khiah hluh sah tuh i. 6Cen vuandum bir in a thai ei man lai lo aisu um i si? Cia pa khai inn ah tlung tu seh. Cialo fangin taaltawng in thi pang selai mi dang in ei sah tuh i. 7Cen fenu pakhat khiah thawlthan in hoi man lai lo aisu um i si?Cia pa khiah a inn ah tlung tu seh. Cialo fangin raaltawng in thi pang selai mi dang in cia nuu khiah nu sah tuh i.’ tin rel tu seh. 8Ciafangin raalbawite in mite hnenah, ‘Cen thinlau le thinzul in um aisu um i si? Cia pa khiah a inn ah tlung tu seh. Cialo fangin a unaute khiah amah bangin thinzul ruai tuh i.’ti in rel tu hlaihlo seh. 9Ciatihin raalbawite in mi zapui hnenah thurel ben fangin raalkapte vumah captainte dah tuhai amahte in mi zapui khiah konghoi tuh i.
10Khua pakhat ning tawng tum fangin amahte khiah remhnak khuan pe tuu-ih. 11Amahte in ning lut lekhaw cia khua songai mi hmuah khiah ning hnenum cang tu seh. 12Cen cia khua in ning lut nuam lo in ning tawng tum lekhaw cia khua khiah kulh tuu-ih. 13Bawipa ning Pathian in cia khua khiah ning kut songah ning ap fangin pasal hmuah a veksenin vangsau thawn rek tuh sio i si. 14Ikhalselai nupang le naupang le khua songai suumte le thilrite khiah ningmah in ping tuhai Bawipa ning Pathian ai ning pehnak ning raalte rong khiah ei sah tuh i si. 15Ciatih bangin he mi phunte khuapui hlah hmuah ning thawn a hla ngai ai khuate vumah a veksenin bawn tuh i si. 16Ikhalselai Bawipa ning Pathian in rothil ai co tuhin ning pehnak he mite khuatu a songai haihawh ai umtu hmuah pakhat khai nung in taang ruai tuh lo i si. 17Ikhalselai amahte khiah Bawipa ning Pathian ai ning ruaihnak bangin, Hit mite, Amor mite, Khanaan mite, Periz mite, Hiv mite le Jebus mite khiah rek tuh sio i si. 18 Cialo fangin amahte in amahte pathian hnenah bawnhnak a ningdulkul thil khiah ning cuk tuhai Bawipa ning Pathian lakah ning sual ruai tuh i.
19Khuapui pakhat khiah tawng tuhin a rai ngai ning kulh fangin a thingte khiah haihpui thawn vong tuh lo i si. Ei thil thai thingkung khiah khua kulhnak in hmang tuhin vong mah ih. Ziangmanti fangin lo ai thingkung khiah minung rong i. 20A ei pha lo thingkung lek vongin ning tawng tute khua khiah neh hlan lo khua kulhnak in vong tuu-ih.