1Aw Isreal, ning paate BAWIPA in ning pe tuhhnak ram songah lut in ning ping thill thai in le ning nung tuhin kaimah ai ning cukhnak thukham le thukhan hnakte khiah hlun tuhin ngai tu-ih. 2Kaimah ai ning ruaihnak BAWIPA ning Pathian thukham khiah ning hlun thai in i ruai hnak thu khiah belh mah ih. Cen hnuk khai hnuk tuh lo i si. 3Ning mit in Baal Peor ah BAWIPA bawnhnak khiah hmu zo i si. Ziangmanti fangin BAWIPA ning Pathian in ning lakai Peor ai Baal hluntu mite khiah hnawmcan sek i. 4Ikhalselai BAWIPA ning Pathian hluntu ningte khiah tunnia tian ning veksenin ning nung liang i. 5A ping tuhai ning feh hmun ramah hlun tuhin BAWIPA i Pathian in i ruai bangin a thukham le a thukhan hnakte khiah ning cuk zo ing. 6Ciamanin hlun tuh rori in ralring tuu-ih. Ziangmanti fangin he thukham za tu tuhte hmai ah he khiah ning fimhnak le ning linghnak i. Ziangmanti fangin amahte in, ‘He mi phun lian ngaite heh mifim le linghnak nai mite i.’ ti in ning rel tuh i. 7Ziangmanti fangin kin BAWIPA kin Pathian khiah kin nongniu ah um bangin aisu mi phun dangte in Pathian nai i? Ziangmanti fangin zaikhai i tu seh Amah khiah kin ko fangin kin nongniu ah um i. 8Cen tunnia ah ning hmai ai i dahhnak upadi dan songai thukham le dikcang ai thukhanhnak bang naitu mi phun lian aisu um i? 9Ning mit ai hmuhnak thilte khiah hai lo hnak tuhin le ning nun song ah ning thin song in pai lohnak tuhin ralring in a kungniu in hlun tuu-ih. Cen ning fate le ning tuute khai cuk tuu-ih. 10Horeb ah BAWIPA ning Pathian hmai ah ning ding nia ah BAWIPA in i hnenah, ‘He mite khiah i hnenah tai ruai tulai amahte khiah i thu za ruai tuh ing. Ciafangin amahte in laivum ah a nung song i kih hal in a fate khai cuk tu seh.’ ti in relhnak berber khiah cuk tuu-ih. 11Ciafangin ningte in a nong ah kawi ai mual ham ah ding ai mual tlang khiah mai in kang ai van vum tian in khuathim le mairo le khuathimpui in khuk i. 12Ciafangin BAWIPA in mai songin ning pon i. A aw tu za i si. Inapui a hmuihmel tu hmu lo i si. A aw lek za i si. 13Cifangin ningte in hlun ruaihnak a thukham, Thukham Sawmkhat khiah ning rel ai lung tlep panih vumah ngan i. 14Ciafangin ningte in ping tuhin ning ke thawn ning tan hmun ramah hlun tuhin thukhamte le thukhanhnakte khiah ning cuk tuhin BAWIPA in i ruai i.
15BAWIPA in Horeb ah mai songin ning pon fangin zai hmuihmel khai hmu lo khiah hih tuu-ih. 16Cialo fangin pasal le nupang bang zuk le 17laivum ai ramsa bang le van vumah a ko thawn zuang thai a ko nai vaniu zuk bang le 18laipua ah a bok ai vakte nunghing bang le laihnia ah ti songai nga bang in zuk bawn leisikhaw ning sual tuh i. 19Cen ning mit in van vum lamah hlir in van hang hnia ai mi hmuahhmuah hnenah co tuhin BAWIPA ning Pathian ai pehnak ni le hla le arsite khiah ning hmu fangin amahte khiah bia tuh lo i si. A hnenum cang tuh lo in khai ralring tuu-ih. 20Ikhalselai BAWIPA in ningte khiah tunnia ai bangin amah minung le a rothil ning cang tuhin Izip ramai thir lungthu songin ning suah zo i. 21Ciazolo ah ningmah manin BAWIPA khai i lakah raw ai BAWIPA ning Pathian ai rothil bang ai ning pehnak ram pha khiah lut tuh lo in Jordan run khai i tan siang lo i. 22Ikhalselai Jordan run khiah tan lo in he ramah i thi tuh i. Ikhalselai ningte in tu Jordan khiah tan tuh ai khia ram pha khiah ping tuh i si. 23BAWIPA ning Pathian in ningte thawn bawnhnak thukham khiah hai in BAWIPA ning Pathian in bawn tuh lo ai ning kham hnak zai thil hmuihmel bang milim zuk bawn tuh khiah ralring tuu-ih. 24Ziangmanti fangin BAWIPA ning Pathian khiah a kang thai berh mai i ai a iksik thai Pathian i.
25Ningte in fate le tuute nai in cia ramah ning tar fang in sualhnak bawn in zai thil bang in milim zuk khiah bawn in BAWIPA ning Pathian khiah thinraw ruai tuh ai a hmai ah sual leisikhaw, 26Jordan run khiah tan ai ning ping hnak cia ram songin ning rall siohnak tuhin tunnia ah van le laipua khiah tettikhantu tuhin ko ing. Cia ramah ning nun ning sau tuh lo ai ning thi tuh sio i. 27BAWIPA in minung phun cang lakah ning vai ruai tuhai BAWIPA in ning hnawt hnak mi phunte lakah a tlawm niu lek ning taang tuh i. 28Ciata ah khua khai hmu lo, khua khai za lo, rong khai ei lo, hnim khai hnim thiam lo, minung kut ai bawnhnak thing le lungto pathiante hnenum cang tuh i si. 29Ikhalselai ciata in BAWIPA ning Pathian khiah sii tuh i si. Ning thinlung le ning nunhnak a veksenin sii leisikhaw Amah khiah tawk tuh i si. 30Thin ning rimsu in hete hmuahhmuah khiah tunhnua ah ning vumah hleng fang in BAWIPA ning Pathian hnenah let in A aw khiah ning ngai fangin 31(BAWIPA ning Pathian khiah mi ngaihhar thai Pathian i) Amah in ning zam tuh lo ai ning hnawmcan tuh lo i. Cen ning paate hnenah a khamhnak thukham khai hai tuh lo i.
32Ning hlan ai a bo zo niakhua khiah zawt tu cuk ih. Pathian in laivum ah minung bawn khelleh ai panin vancung khatlam in khatlam ah he bang ai thil lianpui khiah bawn awng le za awng le awng lo khiah zawt tu cuk ih. 33Cen mite in mai songin Pathian ponghnak aw khiah ningte bang in za awng in nung awng awm? 34Ning mit hmuh in BAWIPA ning Pathian in Izip ramah huthawm lian ngai thawn bawn bangin Pathian in cu kong le ngaihsun urkul le hnikhnaihhnak le raal thawn le power lian ngai thawn Amah ca tuhin mi phun dang songin mi phun khat khiah lang awng awm?
35Hete khiah ningte in BAWIPA khiah Pathian i ti ning ling thillhnak tuhin ning hmuh i. Amah lo a dang Pathian um lo i. 36Ning cuk tuhin vancung in a aw ning za ruai i. Laivum ah a maipual khiah ning hmuh i. Cen mai songin a thu khiah za i si. 37Ning paate khiah it manin amahte hnua ai ning a tesin fate khiah ning ril i. Izip songin amah rori tel in a power lian ngai thawn ning suah i. 38Ning hnak in lian sawn le cak sawn mi phunte khiah ning hmai in hnawt ai amahte ram ah ning kawih ai amahte ram khiah ning rothil cang tuhin tunnia ah ning pe i. 39Ciamanin BAWIPA Amah rori khiah vancung ah le lai hnia ah Pathian i. Amah lo a dang Pathian um lo i. 40Ciamanin a dan upadi le a thukham hmuah hmuah khiah i ruaihnak bangin hlun tuh i si. Ciafangin ningmah le ning fate ca ah ning pha tuh ai kumzangza ai BAWIPA ning Pathian ai ning pehnak ramah nun sau in um tuh i si.” ti in rel i.
41Ciafangin Moses in Jordan runin helam ah khuapui pathum khiah 42a tum lo le hua awng napui lo ai a ompui rek ngah tu mirektu pa khiah he khuapuite pakhat khat ah tlan hmun tuhin, dah i. 43Reuben mite ca in nelrawn zawllai hmun ai Bezer khua dah i. Kad mite ca in Kilead khua dah i. Manasseh te ca in Bashan ai Kawlan khua khiah dah i.
44Hete khiah Moses in Israel mite hmai ah dahhnak thukham i. 45Hete khiah Moses in Israel mite khiah Izip in suak ben fangin Israel mite hnenah relhnak tetti khanhnak le dan upadi le thukhanhnakte i. 46Ciate khiah Israel mite in Izip in suak ai Moses le Israel mite in Heshbon ai umtu Amor te kumpibawi Sihon ram ai Beth Peor ralkhat ai rawn zawllai hmunah relhnak thu i. 47Cen amahte in Jordan ramin he lam nisuak hmun lam ai Sihon ram le Bashan kumpibawi Ok ram, Amor kumpibawi panihte ram khiah 48Arnon Run kamai Aroer ai panin Sion (Hermon) Mual vum le 49Jordan run in nisuak hmun lam zawllai hmuahhmuah Piskah mual hnia ai Arabah Tipui tianin ping sah i.