1A panihhnak ram khiah Simeon in ngah ai Simeon hin songah amahte songkhat ca i. Amahte ro khiah Judah te ro songah um i. 2Amahte ro cohnak khiah Beersheba (Sheba), Moladah, 3Hazar, Shual, Balah, Ezem, 4Eltolad, Bethul, Hormah, 5Ziklak, Beth Markaboth, Hazar Susah, 6Beth Lebaoth, le Sharuhen: khuapui hlaithum le khuate nau; 7Ain, Rimmon, Ether, le Ashan: khuapui pali le khuate naute i. 8Cen he khuapuite hiang cingkim ai khuate naute khai Nekev ai Ramah tihnak Baalath Beer tianin amahte ai i. He khiah Simeon hin mite in amahte songkhat ai cohnak ro i. 9Simeon fate cohnak ram khiah Judah fate ram hrekkhat songah um i. Ziangmanti fangin Judah fate ram khiah amahte ca ah lian ze i. Ciamanin Simeon fate in Judah fate lakah cohnak ro nai i.
10A pathum ram khiah Zebulun fate in amahte songkhat bangin ngah ai amahte ramri khiah Sarid tian i. 11Amahte ramri khiah nitla hmunlam le Maralah ah feh ai Dabbasheth in Jokneam ziatlam ai var ti hlun i. 12Ciafangin Sarid in nisuak hmunlam Khisloth Tabor lamah kawi ai Japhia khiah khel ai Daberath lamah feh i. 13Ciata in Kat Hepher ziatlam in Eth Kazin lamah kawi ai Neah ramri Rimmon tian kawi i. 14Ciafangin a ramri khiah Hannathon saklam in vel ai Jiphthah El ah tong i. 15Cen Kattath, Nahallal, Shimron, Idalah le Bethlem khai telh ai khuapuite 12 le khuate naute khai um i. 16He khuapuite le khuate naute le ram khiah Zebulun fate le a songkhat te ai cohnak ram i.
17A palihnak ram khiah Issakhar le a fate le a songkhatte in co i. 18Amahte ram khiah Jezreel ah kawi ai Khesulloth, Shunem, 19Hafraim, Shion, Anaharath, 20Rabbith, Kishion, Abez, 21 Remeth, En Kannim, En Haddah, le Beth Pazzez te khai telh i. 22A ramri khiah Tabor, Shahazimah le Beth Shemesh tian ban i. Amahte ramri khiah Jordan ah tong i. Khuapui 16 le khuate naute kawm i. 23 He khuapuite le khuate naute khiah a ram kawmin Issakhar hin te ai cohnak ro i.
24A panga hnak ram khiah Asher hin te a songkhat te in co i. 25Amahte ramri khiah Helkath, Hali, Beten, Achshaph, 26Alammelech, Amad le Mishal te i. Nitla hmunlamah Shihor Libnath rawnti hlunin Kharmel Mual tian i. 27Ciata in nisuak hmunlam Beth Dakon lamah kawi ai Zebulun le Jiphthah El Rawn tian hleng i. Ciata in saklam ah kawi ai Beth Emek le Neiel khiah kaan ai Kabul khiah kekeh lamin vel i. 28Ciasong ah Ebron, Rehob, Hammon, le Kanah khiah Sidon a Lian sawn tianin telh i. 29Ciata in a ramri khiah Ramah le a kulhhnak Tyre khuapui lamah feh ai ciata in Hosah ah kawi le tipui hiang ai Akzib ah tong i. 30Cen Ummah, Aphek le Rehob khai telh i. Khuapui kul hluannih le khuate naute kawm i. 31He khiah Asher hin te in amahte songkhat bangin cohnak ram le khuapui le khuate naute i.
32A paruk hnak ram khiah Napthali fate le a songkhat te in co i. 33Amahte ramri khiah Heleph in pan ai Zaanannim makeng thing le Adami Nekeb le Jabneel le Lakkum tian in telh ai Jordan ah tong i. 34Heleph in a ramri khiah nitla hmunlam Aznoth Tabor lamah kawi ai ciata in Hukkok lamah ah feh le a hlanglam ai Zebulun ram le nitla hmunlamai Asher ram thawn peh dun ai nisuak hmunlam Jordan hiang ai Judah ah tong i. 35A kulhhnak khuapuite khiah Ziddim, Zer, Hammoth, Rakkath, Chinnereth, 36Adamah, Ramah, Hazor, 37Kedesh, Edrei, En Hazor, 38Iron, Migdal El, Horem, Beth Anath le Beth Shemesh i: khuapui hlaikua le khuate naute kawm i. 39He khiah Napthali hin te in amahte songkhat bangin cohnak ram le khuapui le khuate naute i.
40A pasarih hnak ram khiah Dan hin te in amahte songkhat bangin co i. 41Amahte ramri khiah Zorah, Eshtaol, Ir Shemesh, 42Shaalabbin, Aijalon, Jethlah, 43Elon, Timnah, Ekron, 44Eltekeh, Kibbethon, Baalath, 45Jehud, Bene Berak, Kath Rimmon, 46Me Jarkon, le Rakkon le Joppa hiang ai ram te i. 47Dan fate ramri khiah hete kaan ah i. Ziangmanti fangin Dan fate in Leshem te khiah tawng ai ping i. Vangsau thawn amahte khiah tawng ai a ram khiah ping sah ai cia ramah to i. Cia ram khiah amahte paa Dan hming lang in Leshem Dan ti in ko i. 48He khiah Dan hin te in amahte songkhat bang in cohnak ram le khuapui le khuate naute i.
49Amahte in cia ram khiah amahte co tuhin a ramri bangin khan ben fangin Israel mite in Nun fapa Joshua khiah amahte lakah co tuhin ro pe i. 50Bawipa ai ruaihnak bangin Joshua in ngenhnak Efraim mualtlang lakai Timnah Serah khua khiah amahte in pe i. 51He ro te khiah phungki Eleazar le Nun fapa Joshua le Israel hin lakai mi upate in Bawipa hmai Shiloh ah tawkdun hmun tabernacle dawngkham ah zemhnak ro te i.