1 Vanhang hnia ai zai zongza khiah a cuu nai tleuh i.
2 Te cu le thi cuu um i.
Cii cing cu le a cinghnak phai cuu um i.
3 Rek cu le urhnak bawl cuu um i.
A bal cuu le a sa cuu um i.
4 Kap cuu le hni cuu um i.
Lungsia in kah cuu le tlanglam cuu um i.
5 Lungto sep cuu le lungto khawl cuu um i.
Kuah dun cuu le kuah dun lo ai sup cuu um i.
6 A miat ngah cuu le sung cuu um i.
Thilri khawl cuu le lon cuu um i.
7 A zik cuu le a khui cuu um i.
Pong lo niu ai um cuu le pong cuu um i.
8 It dun cuu le hua dun cuu um i.
Raaltawng cuu le raalrem cuu um i.
9 Minungte in a perhnak in zai hnempuihnak ngah i? 10Minungte in naper in a cuu hmang tuhin Pathian in natuan pe khiah hmu zo ing. 11Pathian in zai hmuahhmuah khiah amahte cuu khim fang in mawi tuhin bawn zo i. Cen amahte thinlung ah khai a cuu bo nia um lo hmailam thuruat halhnak khai pe i. Ikhalselai aisu in khai a ngom ai panin a tong tian Pathian ai bawnhnak naper khiah ling sah thill lo i.
12 Cen amahte nun songah a pha bawn tuh le ang tuh khiah ciahnak in pha sawn um lo khiah ling ing. 13Cen aisu hmuah khai ei le ding in um in a naperhnak hmuahhmuah lakah ang tu seh. Cia khiah Pathian lehsawng i.
14 Cen Pathian ai bawnhnak menma hmuah khiah kumzangza in taang tuh i.
Pakhat khai belh tuh thill lo i.
Cen pakhat bang khai lang tuh thill lo i.
Mi te in Pathian khiah kih tuhin Pathian in bawn i.
15 Cen tunai a um lai thil khiah um awng zo i.
Cen a um tuh lai thil khai um awng zo i.
Pathian in a cang zohnak hlanlai thu khiah zong ngio i.
16 Cen vanhang hnia ah hete hmu ing:
A hmanniu ai thukhan hmun tuh ah a pha
lo sawn khiah ciata ah um i.
Dikcanghnak hmun tuh ah sual hnak khiah ciata ah um i.
17 I thin songin, “Pathian in mi dikcangte le mi sualte khiah thukhan sah tuh i.
Ziangmanti fangin ciata ah zai
hmuahhmuah bawnhnak tikcu le
zai hmuahhmuah perhnak tikcu um tuh i.” ti in ruat ing.
18 I thin songin, “Minungte thawn senghnak thu ah,
Minungte in amahte veve khiah
ramsa bang i, ti ling thai in
Pathian in amahte khiah cu i.”
ti in ruat ing.
19 Ziangmanti fangin, minungte hnenah
canghnak khiah ramsa te hnenah khai
cang ve i.
Amhate vumah thil pakhat hleng i.
Pakhat khiah thi bangin a khatta khai thi ve i.
A ngaingai in amahte veksenin haihawh pakhat nai i.
Minungte in ramsate hnak in
zai hnempui hnak nai lo i.
A veksen in thu lovang i.
20 A veksenin hmun khat ah feh tlang i. A veksenin laivut songin suakhnak i. A veksenin laivut cang leh tuh i. 21Aisu in minung rauhla khiah cunglam ah kaai ai, ramsa te rauhla khiah laivumah tolh khiah ling i? 22Ciamanin minungte in amahte naper hnak lakah ang hnak tahin pha sawn zaikhai um lo khiah hmu ing. Ziangmanti fangin cia khiah a co tuhhnak a rothill i. Ziangmanti fangin aisu in a hnua ai hleng tu tuh hmuh tuh in amah khiah kawih thill i?