1 Aisu khiah mifim pa bang i?
Aisu in thu te khiah let thiam i?
Mi pa khiah a fimhnak in a hmai zal ruai i.
A mithmai khiah nem ruai i.
2 “Pathian hnenah na khamhnak thu manin kumpibawi thu pehnak khiah ngai tu. 3A hmai in a hnawraw in suak mah. Cen a pha lo lamah taang mah. Ziangmanti fangin amah in a nuam bang in bawn i.” tin na rel ing.
4 Kumpibawipa relhnak thu khiah thupui ngai i.
Ciamanin aisu in amah hnenah, “Zai bawn i si?”ti in zawt thill i.
5 A thu pehnak bangin hlun tu vumah harsahnak hleng tuh lo i.
A fim thinlung in a cuu le a bawn dan ling thiam i.
6 Ziangmanti fangin, cia pa rimsuhnak khiah
a rauhngai intam khalselai,
zai hmuahhmuah khiah a cuu le a bawn dan um i.
7 Ziangmanti fangin zai cang tuh khiah amah in ling lo i.
Ciamanin zaikom fangin cang tuh khiah aisu in amah khiah rel thill i?
8 Aisu in khai hlivua khiah uk thill lo i.
Aisu in khai thihhnak nia khiah uk thill lo i.
Raaltawng teng in aisu khai raalkap in suak thill lo i.
Ciamanin sualhnak in sualhnak bawntute khiah hlat tuh lo i.
9 Vanhang hnia ah naperhnak hmuahhmuah khiah i ngaisung fangin, he khiah hmu ing: Mi pakhat in mi dang pakhat khiah uk manin amah ca ah hnophnak cang i.
10 Ciafangin mi sual pa vui khiah hmu ing. Cia pa in a cianghlim hmun songah kawi ai feh awng de i. Cia pa khiah amahte naper hmun khuate in hai berh i. Cia khai thu lovang i. 11Sualhnak naper khiah cawh vut de lo manin, minungte thinlung ah sualhnak bawn tuh khiah a dimin um ngio i. 12Misual pa in vel zakhat sual in nun saupui nung khalselai, Pathian kih tu le a hmai ah a kih tute khiah pha tuh hlen khiah ling ing. 13Ikhalselai misual te khiah pha tuh ngio lo i. Cen a nun khai sau tuh ngio lo i. Ziangmanti fangin amah in Pathian khiah kih lo i. A nunhnak khiah a hlaa bang teng i.
14 Cen laivumah a dang thu lovang um leh thio i. Zai i ti fangin, misual te bawnhnak bang in ngah tu mi dikcang te um ai, mi dikcang te bawnhnak bang in ngah tu misual te um i ti i. Cia khai thu lovang i ti ing. 15Ciamanin hiam ngai in um tuh khiah pha i ti in ruat ing. Ziangmanti fangin, minungte in vanhang hnia ah ding le ei le hiam ngai ai um tahin pha sawn khiah a dang um lo i. Ciafangin vanhang hnia ah Pathian in pehnak nun song ai a perhnak hmuahmuah hiam ngai in cia pa in per tuh i.
16 I thinlung in fimhnak ling tuhin ruat fangin le sun le zan mitmu lo ai laivum ah mi te ai naperhnak khiah i cul fangin, 17Pathian ai bawnhnak khiah a veksen in hmu ing. Aisu in khai vanhang hnia ai canghnak khiah ling liang thill lo i. Siarmawiti in sii napui ai, cia pa in a dikbe pauh liang in ling thill lo i. Mifim pa in ling liang ing, ti rin in a ngaingai in ling liang thill lo i.