1India ramai panin Ethiopia ram tian ram za le kul hluan sarih uktu kumpibawipa Ahasuras khiah 2Susa khuapui songai a kumpibawi inn ah kumpibawi tauhkheng vumah to ai 3a ukhnak kum thumhnak khim fangin, a tlangsuak le a hnenumte veksen ca in puai lian ngai bawt sah ai Persia le Media raalbawite le a ram songai mi upa le ram-uk tute khai um i. 4Ciafangin kumpibawipa in a thilri naihnak le a sunparhnak khiah ni za le ni sawmriat song he mite hmai ah piah i. 5Cia nite bo fangin, Susa khuapui songai milian le mi cik te ca in ni sarih song, kumpibawipa inn ai vuandum songai tualvan ah puai bawt i. 6Cen ciata ah pon ngo le mepian ponte khiah thiam pha ngai thawn hual hnak ri thawn ngun tangka thawn bawnhnak thingpum thawn bilatmi khuam vum caang ah tar i. Cen amahte taalhmun tauhkheng te khai sui le ngun thawn bawnhnak i ai, lungto manhar le a ngo le a hang bilatmi thawn bawnhnak khang vumah tauh i. 7Amahte in zu khiah sui bel thawn suah i. Cen a bel te khiah pakhat le pakhat bang dun lo i. Kumpibawipa in hmunthiam bangin, zu khai tam rauh i. 8Amahte dan upadi bangin, zu ding tuhin aisu khai ruai bel lo i. Ziangmanti fangin amahte nuam bangin ding tuhin kumpibawipa in a inn sang ai a hnenumte khiah thu pe i. 9Kumpibawinu Vashti in khai Kumpibawipa Ahasuras inn ah nupangte ca in puai bawt ve i.
10Ni sarih nia ah kumpibawipa khai zukham in um fangin, Kumpibawipa Ahasuras hnenum a til retsa mi pasarih te Mehuman, Biztha, Harbona, Biktha, Abaktha, Zethar le Kharkas khiah 11mizapui le a tlangsuakte khiah a mawihnak hmuh nuamin Kumpibawinu Vashti khiah a lu ah kumpibawi lukhuk khu in kumpibawipa hmai ah kawih ruai i. Ziangmanti fangin Vashti khiah hmel mawi ngai i. 12Ikhalselai Kumpibawinu Vashti in kumpibawi pa hnenumte ai relhnak kumpibawipa thu khiah el ai kawi nuam lo i. Ciamanin kumpibawipa khai thinraw rauh ai a thin khiah mai bang in kang i.
13Ciafangin kumpibawipa in a tikcu a dan ling thiamte mifim te (ziangmanti fangin kumpibawi pa in dan upadi le thuhman ling tute khiah zawt de i) 14a rinsanhnak ber Persia le Media ramai ai a bawi ber le amah thawn a nong ber mi pasarihte Kharshena, Shethar, Admatha, Tarshish, Meres, Marsena le Memukan te hnenah, 15“Kumpibawinu Vashti khiah dan upadi bangin a kontih in bawn nga sing? Ziangmanti fangin amahin Kumpibawipa Ahasuras hnenumte in thanhnak kumpibawi ai thu khiah ngai nuam lo i.” ti in zawt i. 16Ciafangin Memukan in kumpibawipa le a tlangsuakte hmai ah, “Kumpibawinu Vashti in kumpibawipa lak lekah khelh lo ai tlangsuak veksente le Kumpibawipa Ahasuras ram hmuahhmuah ai umtu mi veksen lakah khelh i. 17Ziangmanti fangin, ‘Kumpibawipa Ahasuras in Kumpibawinu Vashti khiah a hmai ah kawi tuhin ko ai, kawi nuam lo i.’ ti in kumpibawinu nuncan khiah nupui hmuah hmuah in za tuhai a pate khiah nautat tuh i. 18Tunnia rori ah Persia le Media ai bawinu hmuahhmuah in kumpibawipa tlangsuak te hnen ah kumpibawinu nuncan khiah za tuhai, a rauh ngai in nautat hnak le hauhnak suak tuh i. 19Ciamanin kumpibawipa lungkhim lekhaw, Vashti khiah Kumpibawipa Ahasuras hmai ah dak nawn ma seh. Cen kumpibawipa in Vashti ca in Vashti hnakin pha sawn nupang khiah dah tuhin thu suah tu selai, cia thu khiah zaikom in khai thleng leh tuh lo in Persia le Medes dan upadi songah khum tu seh. 20Kumpibawipa ai suahhnak thu khiah a lian ngai a ukhnak ram songah than fangin, nu te veksenin a pa te khiah a lian a cik ti lo in zul tuh i.” ti in sawn i. 21Ciatih ai a sawnhnak khiah kumpibawipa le a tlangbawi te lungkhim manin kumpibawipa in Memukan thu bangin bawn i. 22Ciafangin kumpibawipa in a ram-uktute veksen hnenah, amahte lai le amahte pon in, a pa khiah amah inn uktu tuhin dah tuhai amahte pon ten in rel tuhin lai kuat i.