1Cia zan ah kumpibawipa khai mitmu thill nawn lo i. Ciamanin mi pakhat khiah kumpibawite bawnhnak khumhnak ca-uk khiah kawih ruai ai kumpibawi hmai ah siar i. 2Cia ca-uk songah dawngkham kiltu kumpibawipa hnenum a tilretsa pasal panihte Bikthana le Teresh in Kumpibawipa Ahasuras rek tum awng khiah Mordekai in rel awnghnak thu nganhnak lo um i. 3Ciafangin kumpibawipa in, “He ca in Mordekai khiah zai thawn upathnak pe awng pa?” ti in zawt i. Ciafangin kumpibawipa hnenumte in, “Zaikhai bawt sah lo i.” ti in sawn i. 4Ciafangin kumpibawipa in, “Tualvan ah aisu um pa?” ti in zawt i. Ciateng in Haman khiah amah ai bawnhnak thing vumah Mordekai khiah tar tuhin kumpibawipa so tuhin kumpibawipa inn hmai ai tualvan ah lo lut sawng i. 5Ciafangin kumpibawipa hnenumte in amah hnenah, “Haman um bang. Tualvan ah a ding in um i.” ti in sawn i. Ciafangin kumpibawipa in, “Lut ruai tuu-ih.” ti in ruai i. 6Ciamanin Haman khai lut ai, kumpibawipa in amah khiah, “Kumpibawipa in upat nuamhnak pa khiah zai bawt pha pa?” ti in zawt i. Ciafangin Haman in a thin songin, “Kumpibawipa in kaimah lo aisu upat nuam tuh i?” ti in ruat i. 7Ciamanin Haman in kumpibawi pa khiah, “Kumpibawipa in a upat nuamhnak pa khiah, 8kumpibawipa silhnak kumpibawi thuam le kumpibawipa tohnak siphuh le cia siphuh lu ah kumpibawi lukhuk khiah khuk tu seh. 9Ciafangin cia thuam le siphuh khiah kumpibawi pa tlangsuak a upaber kut ah pe tu selai, cia pa in kumpibawipa ai upat nuamhnak pa khiah silh tu seh. Ciafangin cia pa khiah siphuh to in khua songah fehpui in a hmai in, ‘Kumpibawipa ai upat nuamhnak pa khiah hetih bangin bawn tuh i.’ ti in au tu seh.” ti in sawn i. 10Ciafangin kumpibawipa in Haman hnenah, “Na relhnak bangin a rang ngai in thilthuam le siphuh khiah lang tulai, kumpibawipa kawl dawngkham ai totu Judah mi Mordekai khiah bawt tu. Na rel hnak khiah a veksen in bawn lo in lo um mah.” ti in ti i. 11Ciamanin Haman in thilthuam le siphuh khiah lang ai, Mordekai khiah silh ai Mordekai khiah siphuh vumah tauh ai khua songah a hmai in, “Kumpibawipa ai upat nuam hnak pa khiah hetih bangin bawn tuh i.” ti in au kong in fehpui i.
12Ciaben fangin Mordekai khai kumpibawipa kawl dawngkham ah let leh i. Ikhalselai Haman khai a rang ngai in kap kong in le a lu fun meng in a inn ah tlung i. 13Haman in a nu Zeresh le a rualpuite khiah he thu hmuah rel fangin, a mifim a rualpuite le a nu Zeresh in, “A hmai ah na sung liohnak Mordekai khiah Judah mi phun ilekhaw, amah khiah neh tuh lo ai amah hmai ah na sung tuh i.” ti in ti i. 14Amahte in ciatih in Haman thawn pong lak fangin, a tilretsa kumpibawipa hnenumte khiah hleng ai, Esther bawnhnak puai ah Haman khiah a rang ngai in kawih i.