Pul No. 8: Khokhuak
1Ciafangin Bawipa in Moses hnenah, “Pharaoh hnenah kawi tu. Ziangmanti fang in he ngaihsunurkulte khiah amah hmai ah bawn tuhin a thin khiah ruh ruai ing. Cen a hnenumte thin khai ruh ruai ing. 2Ciamanin ningte in kaimah khiah Bawipa i ti ning ling thillhnak tuhin Izip ramah Izip mite hmai ah i bawnhnak ngaihsunurkulte khiah ning fate le ning fate ai fate hnenah rel tuh i si.” ti in rel i.
3Ciamanin Moses le Aaron khai Pharaoh hnenah kawi ai, “Hebrute Bawipa Pathian in, ‘Zaicam tian i hmai ah thinniam lo in um tuh i si? Na i per sah tuhin i minungte khiah hlat tu. 4I minungte khiah hlat siang hlahlesikhaw na ram songah khokhuakte khiah thangha ah hleng ruai tuh ing. 5Cia khokhuakte khiah laipua vumah dim tuh bial ai aisu in khai laipua hmu thill tuh lo i. Rial ai taanghnak lam khai cia khokhuakte in ei tuh ai hampalak ai thing hmuahhmuah khai ei tuh sio i. 6Cia khokhuakte khiah na inn le na hnenumte inn le Izip minungte inn hmuahhmuah dim tuh i. Ciabang khiah ning paa te le a paate laivum ah po khelleh ai panin hmu awng lo i.’ti in rel tu.”ti in ruai i. Moses khai ciapah tlan i. 7Ciafangin Pharaoh hnenumte in Pharoah hnenah, “He pa in zaicam tian hnai kin hnok ruai tuh i? Israel mite khiah amahte Bawipa Pathian bia tuhin hlat tu sio. Izip ram khiah hnawm berh khiah ling lo i sim?”ti in ti i. 8Ciafangin Moses le Aaron khai Pharaoh hmai ah kawi ai, Pharaoh in amah te hnenah, “Feh in ning Bawipa Pathian khiah bia tuu-ih. Ikhalselai aisute feh tuh i?”ti in zawt i. 9Moses in, “Kin naupangte le kin pasalte le kin fapa le kin fenute le kin sumhnam kawmin kin veksenin feh tuh i ing. Ziangmanti fangin Bawipa puai bawt tuh i ing.”ti in sawn i. 10Ciafangin Pharaoh in amahte hnenah, “Ning nu le ning fate kawm in ning hlat ta lengkhaw Bawipa in lo ning kilkhawl ta tu selaw. Ralring tuu-ih. Ziangmanti fangin a pha lo bawn ning nuam ngio i. 11Ciatih i tuh lo i. Ning pasalte lek in Bawipa bia tuu-ih. Ziangmanti fangin cia khiah ning daihhnak i awng i.”ti in ti ai amahte khiah Pharaoh in hnawt i.
12Ciafangin Bawipa in Moses hnen ah, “Izip ramah khokhuakte hleng tuhin na kut khiah Izip ram vumah pharh tulai Izip ramai hnuh le rial tla hnua ai a taang hnak lam ei tuhin kho khuakte suak tu seh.” ti in ruai i. 13Ciafangin Moses in a tokrolh khiah Izip ram vumah dang fangin Bawipa in nisuak hmun lamin khuahu khiah zanvar le sunnivui in zuang ruai ai a thangha fangin cia khuahu in khokhuakte khiah hleng bial i. 14Ciafangin khokhuakte khai Izip ram veksen ah hleng bial ai Izip ramah a dim in um i. Cia khokhuakte in cia ram khiah siatsuah ai he hlanah ciabang khokhuakte khiah um awng lo ai tunhnua ah khai ciabang khokhuak khiah um tuh nawn lo i hang. 15Khokhuakte in laivum pumpalah khiah khuk ai laivum khai hang bel in um i. Amahte in cia ram ai hnuhhing hmuah le rial tla hnua ai taang hnak thing thai khiah ei sio i. Ciamanin Izip ram hmuahhmuah ah thinghnah hing khai um veng lo i.
16Ciafangin Pharaoh in Moses le Aaron khiah a rang ngai in ko ai, “Ning Bawipa Pathian le ning lakah sual ngah te ing. 17Ciaman he velkhat ngawn sual i hlat rih tulai ning Bawipa Pathian in he thihhnak khiah lang leh tuhin ninghio i kun sah tuhin na ngen ing.”ti in ti i. 18Moses khai Pharaoh hnenin suak ai Pathian hnenah ninghio ngen i. 19Ciafangin Bawipa in nitla hmun lamin khuahu zuang ruai ai khokhuakte khiah a veksen in Ti San songah lan ruai berh ai Izip ramah khokhuak pakhat bang khai taang leh lo i. 20Ikhalselai Bawipa in Pharaoh thin khiah ruh ruai manin Pharaoh in Israel mite khiah hlat siang cuang lo i.
Pul No. 9: Khuathim
21Ciafangin Bawipa in Moses hnen ah, “Na kut khiah van lamah tung tulai Izip ramah kut thawn tok thai dawn dawn khuathim hleng tu seh.”ti in ruai i. 22Ciamanin Moses in a kut khiah van lamah tung le ciafangin Izip ramah ni thum song khua thim meng i. 23Amahte in pakhat le pakhat khai hmu dun thill lo ai nithum song aisu khai amahte umhmun in tho lo i. Ikhalselai Israel mite umhmun ah tu khuavar liang i. 24Ciafang Pharaoh in Moses khiah ko ai, “Feh in Bawipa khiah bia tuu-ih. Ning kawlpawte le sumhnamte zong hlum tuu-ih. Cen ning fate khai keng tuu-ih.”ti in rel i. 25Ikhalselai Moses in, “Kin Bawipa Pathian hnenah hlu tuhin mei thawn ai tai ai hlu tuhhnak sate kin pe kul i si. 26 Kin kawlpawte khai keng kul i ing. Pakhat bang khai hlum thill lo i ing. Ziangmanti fangin a hrekkhat thawn kin Bawipa Pathian bia tuh i ing. Cen ciata kin hleng fangin zai thawn in Bawipa bia tuh khiah kinmah rinin ling lai lo i ing.” ti in sawn i.
27Ikhalselai Bawipa in Pharaoh thin khiah ruh ruai meng ai Israel mite khiah hlat siang thotho lo i. 28Ciafangin Pharaoh in Moses hnenah, “I hnenin tlan tu. I hmai i hmu tuh nawn lo in ralring tu. Ziangmanti fangin i hmai na hmu nia ah na thi tuh i!”ti in rel i. 29Moses in, “Na relhnak bangin khim tu seh. Na hmai na hmu tuh lo i hang ing.”ti in sawn i.