Fapa upaber thi i
1Ciafang Bawipa in Moses hnenah, “Pharaoh le Izip vumah pul pakhat hleng ruai tuh i lai ing. Ciaben fangin amah in ning hlat tuh i. Ning hlat fangin heta in ning vek in ning hnawt tuh sio i. 2Ciamanin pasal pui le nupui hmuah in a ompuite hnenah sui le ngun thilrite ngen tu seh.”ti in ruai i. 3Ciafangin Bawipa in Israel mite khiah Izip mite in daih thai in bawn i. Cia zolo ah Moses khiah Izip ram le Pharaoh hnenumte le Izip minungte in upat rauh i.
4Ciafangin Moses in, “Bawipa in, ‘Seulai fangin Izip ram songah feh tuh ing. 5Pharaoh fa a te hmasaber ai panin fangrial hmunai naper nupang hnenum fa a te hmasaber le sumhnam fa a te hmasaber tian in Izip ram songai a te hmasaber fa khiah thi tuh i. 6Ciafangin Izip ram pumpalah ah he hlanah khai um awng lohnak le tunhnua ah khai um tuh awng lohnak lungsia rauh in kaphnak um tuh i. 7Ikhalselai Israel minungte lakah tu uico rinin aisu khai ca tuh lo i. Ciafangin Bawipa in Izip le Israel te khiah a tumce in dah khiah ling tuh i si.’ti in ti i.”ti in rel i. 8“Cen he na hnenumte in i hnenah kawi tuh ai, ‘Na hlun tute kawmin tlan tu sek ih.’ti in khukhlep in i bia tuh i. Ciaben fangin suak tuh ing.”ti in ti ai Moses khai thinraw ngai in Pharaoh hmai in suak i.
9Ikhalselai Bawipa in Moses hnen ah, “Pharaoh in na ngai tuh lo i. Ciamanin Izip ramah i ngaihsunurkul khiah a tam ngai in zaai ruai tuh ing.”ti in rel i. 10Ciamanin Moses le Aaron in Pharaoh hmai ah he ngaihsunurkulte a veksenin bawn ai Bawipa in Pharaoh thin khiah ruh ruai ai Pharaoh in Israel mite khiah a ram in suak siang lo i.