1Mepian le a num le thiam san thawn cianghlim khaan songah naperhnak tuhin thuamte bawn ai Bawipa in Moses ruai bangin Aaron thuamte khai bawt i. 2Cia sui le mepian le a num le a san ri le a pha rauh ri thawn ephod khiah khui i. 3Ciafang amahte in mepian le a num le a san le a pha rauh ri te thawn cawih tuhin cia sui khiah a pa niu niu in seu ai sui ri cang tuhin at i. 4Cia ephod khiah kodar ah phur thai in kodar ri panih khiah a ning veve ah khui i. 5Cen ephod penhnak elpen khai Bawipa in Moses ruai bangin sui le mepian le a num le a san ri le a pha rauh ri thawn khui i. 6Ciaben fangin onyx tihnak lungto khiah tar ai sui ri thawn kulh ai cia lungto vumah Israel fate hming ngan i. 7Cia lungtote khiah Bawipa in Moses ruai bangin Israel fate hihhnak tuhin ephod kodar vumah tauh i.
8Sohnar thuam khai ephod bang in a pha rauh in sui le mepian le a num le a san ri le a mawi ngai ri thawn khui i. 9Cia sohnar thuam khiah hlep nih in hlep fangin a saulam le a kaulam khiah a bang vek i. 10Cia pon vumah lungto tluang li in bet i. A hmasaber tluang khiah sardius, topas le emerald i. 11Tluang nihhnak khiah tarkhuis le safai-a le diamon i. 12Tluang thumhnak khiah jasin le akate le amethist i. 13Tluang lihnak khiah beryl le onyx le jasper i ai ciate khiah sui ri thawn kulh i. 14Israel mite phun hlainih zah in lungto khai hlainih um i. Cen Israel fate hlainih khiah amahte phun hlainih hming bangin lungto vumah laingan thiamtu pa ai ngan bangin ngan i. 15Cen cia sohnar a ning veve ah sui ri phiarhnak bang ri bawn i. 16Sohnar pon ca in sui kual panih bawn ai sohnar ning veve ah khui i. 17Ciaben fangin cia sui ri khiah sohnar ning ai sui kual songah mun i. 18Cen a khatta lam sui rihual khiah sui thil hnenah khui ai ephod kodar pon vum a hmailam ah khui i. 19Sui kual panih bawn ai sohnar ning nih lam ephod songlam ah khui i. 20Cen a dang sui kual panih khai ephod kodar pon ah khui i. Cia khiah ephod hmailam le el penhnak a mawi ngai ai takhnak pon par ah i. 21Ciafangin cia sohnar pon khiah a kual thawn ephod kual hnenah mepian thawn a mawi ngai ai takhnak ephod elpen vumah sohnar khiah ephod hmunin dolh tuh lo in pen i. 22Cen ephod pon khiah mepian thawn bawn i. 23A laiteng ah a lu kua um ai cen cia kua khiah zik lohnak tuhin a cingkim in raaltawnghnak angki hawng bangin pon thawn khui i. 24Cen cia pon par khiah mepian le a num le a san pon le a pha ngai thiam thawn taleti thai bawn i. 25Cen cia taleti thaite laklawh ah a cingkim in sui khawnglawng niu niu khui i. 26Bawipa in Moses ruai bangin, taleti pakhat hnua ah sui khawnglawng pakhat ti in cia pon par cingkim ah khui i.
27Cen Aaron le a fate ca in a pha ngai thiam thawn a mawi ngai in angki saupui bawt i. 28Cen a pha ngai pon thawn lupawng le a mawi ngai lukhuk le bawngbi comniu khai bawt i. 29Bawipa in Moses ruai bangin a pha ngai thiam le mepian le a num le ri san thawn hawngah vehhnak pon khai bawt i.
30Cen sui a cit thawn pakan pakhat khiah bawn ai pakan vumah:
Bawipa HNENAH CIANGHLIM TU SEH,
ti in ngan i. 31Bawipa in Moses ruai bangin cia pakan khiah mepian ri in khih ai lupawng vum a hmailam ah dah i.
32Ciatih bangin tawkdun hmun tabernacle buk khiah sa ben i. Ciatih bangin Israel mite in Pathian in Moses ruaihnak bangin anite in khai bawn sio i. 33Ciafangin amahte in cia tabernacle le a buk le a thilrite: a penhnak kilip, thingtlepte le a zauhnak thingtlepte le a khuamte le a munhmun kuate le 34a san ai nimhnak betza phaw thawn bawnhnak a khuk le khaandanhnak pon le 35Tettikhanhnak thingkuang le a thingpum thawn, cen ngaihharhnak tauhkheng le 36cabuai le a belte kawmin, cen sangreu le 37Mei-inn varhmun le a mei-innte (a mei-innte a cialiang in) le a thilrite, cen meivarhnak thau le 38sui awlta le nawih tuhhnak thau le mei ai taihnak rimhmui le tabernacle dawngkham berhnak pon le 39dar awlta le dar meitai hmun le a thingpum le a belte le dar bel pui le a tauhhmun le 40tualvan ai tarhnak ponte le a khuamte le a munhmun tuh kuate thawn, cen tualvan kawl dawngkham berhnak pon le a rite le a tarhmunte le tabernacle ah hmang tuhhnak belte le pumkhawm hmun buk ca le 41Cianghlim khaan songah naper fang ai sil tuhhnak a cianghlim thuamte le phungki Aaron sil tuhhnak a cianghlim thilthuam le a fate in phungki naper fangin sil tuhhnak thilthuam te khiah Moses hnenah kawih i.
42Bawipa in Moses ruai bangin Israel mite in a veksenin bawn i. 43Ciafangin Moses in khai ciate perhnak khiah check ai lo ben peu sek i. Bawipa ruaihnak bang in amahte in bawn sio i. Ciafangin Moses in amahte khiah hmuifu bur i.