1Cia khelleh fangin Moses le Aaron khai Pharaoh hnenah kawi ai, “Bawipa Pathian in, ‘Nelrawn songah puai i bawt tuhin i minungte hlat tu.’ ti in ti i.” ti in rel i. 2Ciafangin Pharaoh in, “Israel mite hlat tuhin a thu i ngai tuhhnak Bawipa khiah aisu i pa? Bawipa khiah aisu i ti ling lo ing. Cen Israel mite khai hlat tuh lo ing.” ti in sawn i. 3Ciafangin anite in, “Hebru te Pathian thawn tawk dun zo i ing. Ciamanin Bawipa Pathian hnenah raithawi tuhin feh kin siang tu. Cialo fangin urhnak thawn i hlahle vang thawn kin rek mawh ngai.” ti in rel i. 4Ciafangin Izip kumpibawipa in, “Moses le Aaron, ziangman in amahte khiah naper sul ruai i si? Ning naper hmunah feh tuu-ih.”ti in ruai i. 5Ciafangin Pharaoh in, “He ramah minung ning tam ngai i. Amahte khiah naper lo in dah i si.” ti in ti i. 6Ciamanin Pharaoh in cia nia ai panin kuli khawngtute le mi uktute khiah, 7“Ukkhe bawn tuhin ni dang bang in amahte khiah hampa ro pe tuh lo i hang i si. Amahte in hampa ro si tu seh. 8Cen ukkhe khiah ni dang zah in bawn tu seh. Tlawm ruai mah ih. A thazawng manin, ‘Kin Pathian hnenah raithawi nga sing.’ ti in amahte in au i. 9Amahte khiah a har amam in naper per ruai tuu-ih. Ciafangin anite in thudon khiah sang awl tuh i.” ti in a ming suah i.
10Ciafangin kuli khawngtute le mi uktute khiah Israel mite hnenah kawi ai Pharaoh in, “‘Hampa ro ning pe tuh lo ing. 11Ciamanin ningmah hlanlam hampa ro si tuh i si. Cen ning ukkhe khai tlawm ruai tuh cuang lo i si.’ti in ti i.”ti in rel i. 12Ciamanin Israel mite khai Izip ram pumpalah ah hampa ro ca in rong kuang ro si tuhin vak i. 13Ciafangin kuli khawngtute in amahte hnenah, “Hampa ro ning nai fangin nisiar ai ning bawnhnak ukkhe zah in tunin khai bawn tuu-ih.” ti in rel leklo ai 14Pharaoh kuli khawngtute ai dahhnak Israel mi-uktute khiah vit ai, “Zaimanin hmasa bangin mania le tunnia ah ukkhe ning bawn vo bawn lo i si?” ti in ti i.
15Ciafangin Israel mi-uktu te in Pharaoh hnenah kawi ai, “Zaimanin na hnenumte khiah hetih tluk in rimh i si? 16Na hnenumte khiah hampa ro pe lo i si. Ikhalselai ukkhe kin bawn ruai i si. Na hnenumte khiah kin vit i. Inapui ai a khelhtu tu na minungte i bang.” ti in ti i. 17Ciafangin Pharaoh in, “Ningte khiah mi thazawng i bang i si. Ning thazawng manin, ‘Bawipa hnenah raithawi tuhin feh nga sing.’ ti ai rel hnelhno i si. 18Ciamanin feh tuu-ih. Naper tuu-ih. Hampa ro ning pe tuh lo i. Ikhalselai ning bawn kel zahin ukkhe bawn tuh i si.” ti in rel i. 19Amahte khiah, “Ni khat ai ning bawn kulhnak ukkhe khiah tlawm ruai tuh cuang lo i si.” ti in rel manin amahte vumah harsahnak hleng tuh i ti ling i.
20Anite khai Pharaoh hmunin suak ai Moses le Aaron khai amahte iang in tawk fangin 21amahte in, “Bawipa in ning sik tu selai lo ning cawh tu seh. Ziangmanti fangin Pharaoh le a tlangsuakte lakah haihfu bangin kin naam ruai i si. Amahte kut songah kin rek tuhin vangsau pe zo i si.” ti in hau i.
22Ciafangin Moses le Aaron khai Bawipa hnenah kawi ai, “Aw Bawipa, he mi te hnenah ziangmanin rimsu harsahnak hleng ruai i si? Ciamanin i feh ruai i sim? 23Na hming in pong tuhin Pharaoh hnenah i feh khelleh ah amah in he mite vumah rimsuhnak lek pe ai nang in le he mite khiah a kut songin suah cuang lo i si.”ti in ti i.