1Ciafangin BAWIPA in Moses hnenah, “Tunin Pharaoh vumah i bawn tuhhnak hmu tuh i hang si. I huthawm manin amah in i minungte khiah hlat tuh i. I huthawm manin amah in amah ramin amahte khiah hnawt tuh sio i.” ti in rel i.
2Cen Pathian in Moses hnenah, “Kaimah khiah BAWIPA ing. 3Abraham le Aizek le Zakuk hnen ah a Saangber Pathian ti in hleng ing. Ikhalselai amahte in i hming khiah BAWIPA i ti in ling ruai lo ing. 4Cen ram dang mi bang ai amahte umhmun Khanaan ram khiah pe tuhin amahte thawn thukam dun i ing. 5Ciazolo ah Izipte in sal ai hmang manin a rimh a kham ai auhnak Israelte aw khai zazo ing. Cen amahte thawn i thukamhnak khai hih hlen ing. 6Ciamanin Israel mite hnenah, ‘Kaimah khiah BAWIPA ing. Ciamanin Izip te kuthnia in ning luat ruai tuh ing. Amahte sal in ning luat ruai tuh ing. I huthawm thawn ning tlanh tuhai amahte khiah a rauh ngai in cawh tuh ing. 7I minung ah ning cang ruai tuh ing. Cen kaimah khiah ning Pathian i tuh ing. Ciafangin ningte in kaimah khiah Izip mite kut songai ning suahtu ning Pathian BAWIPA i ti ling tuh i si. 8Cen i kut tung ai Abraham le Aizek le Zakuk hnenah i kamhnak ramah ning kawih tuh ing. Cia ram khiah ningte in ping tuhin ning pe tuh ing. Kaimah khiah BAWIPA ing.”ti in rel i. 9Moses in he thute khiah Israel mite hnenah rel i. Ikhalselai amahte khiah rimsu ze le thinhnawm ze manin sang lo i.
10Ciafang in BAWIPA in Moses hnenah, 11“Israel mite khiah a ram songin suak ruai tuhin rel tuhin Pharaoh hnenah feh tu.”ti in ruai i. 12Ikhalselai Moses in BAWIPA hnenah, “Israel mite rinin i thu i ngai lo fang tu zaimanin Pharaoh in i ngai tuh ce i? Ziangmanti fangin a naal ngai in pong thiam lo ingkhaw.”ti in ti i. 13BAWIPA in Moses le Aaron hnenah Israel minungte le Pharoah te thu khiah rel ai Israel mite khiah Izip ramin suah tuhin ruai i. 14Hete khiah Israel mi upate pawl i: Israel fa upaber Reuben fate khiah Hanok le Pallu le Hezron le Karmi i. Hete khiah Reuben te phun i. 15Simeon fate khiah Jemuel le Jamin le Ohad le Jakin le Zohar le Khanaan nupui fa Shaul te i. Hete khiah Simeon te phun i. 16Hete khiah cazin songai khumhnak bangin Levi fate hming i: Kershon le Kohath le Merari te i. Levi khiah kum za le kum sawmthum le kum sarih tian nung i. 17Kershom fate khiah amahte phun bang in Libni le Shimei i. 18Kohath fate khiah Amram le Izhar le Hebron le Uzziel te i. Kohath khiah kum kum za le kum sawmthum le kum thum tian nung i. 19Merari fate khiah Mahli le Mushi i. Hete khiah cazin songai khumhnak bangin Levi phunte i.
20Amram in a paa farnu Jokhebed nu ai ciate in Aaron le Moses nai i. Amram khiah kum kum za le kum sawmthum le kum sarih tian nung i. 21Izhar fate khiah Korah le Nephek le Zikhri te i. 22Uzziel fate khiah Mishael le Elzaphan le Sithri te i. 23Aaron in Amminadab fenu le Nahshon farnu Elisheba nu ai amahte in fate Nadab le Abihu le Eleazar le Ithamar nai i. 24Korah fate khiah Assir le Elkanah le Abiasaph te i. Hete khiah Korah te phun i. 25Aaron fapa Eleazar in Putiel fenute pakhat khiah nu ai anite in Phinehas nai i. Hete Levi te phun pawl i.
28Hete khiah BAWIPA in, “Amahte phun bangin Izip ram in Israel mite khiah suah tuu-ih.”ti ai ruaihnak Aaron le Moses te i.
27Amahte khiah Izip kumpibawi Pharaoh hnenah Israel mite khiah Izip ramin suah tuhin Pharaoh reltu te Moses le Aaron te i.
28BAWIPA in Izip ramah Moses hnenah thurel fangin, 29“Kaimah khiah BAWIPA ing. Na hnenah i relhnak hmuah Izip kumpibawi Pharaoh rel tu.” ti in ruai i. 30Ikhalselai Moses in BAWIPA hnenah, “A naal ngai in pong thiam lo ing. Ciamanin zaimanin Pharaoh in i ngai tuh i?”ti in sawn i.